Anyanta amavulu ayuulileña wanta waIsarela wanyichidi 10 elileña yuma yatama, ilaña Ahabi diyi waswejeli. Wasumbwili mumbanda watama wadifukwileña kudi Bayali. Ijina dindi Yezebeli. Ahabi niYezebeli enzesheli ituña nakudifukula kwaBayali nawa ajahili atuprofwetu twaYehova. Yehova welili ñahi? Wamutemesheli kaprofwetu Elija kuya nakumuleja Ahabi nsañu.

Elija wamulejeli Mwanta Ahabi nindi muloña wayilwilu yindi yatama, muIsarela himukunokaña nvulaku. Hadi yaaka yisatu nakubadikahu, mbutu hiyameneneñaku, nawa antu afwileña nzala. Nkumininaku, Yehova wamutemesheli cheñi Elija kudi Ahabi. Mwanta wamulejeli nindi: ‘Yeyi wunakuleta kukala! Yuma yejimiyi yinamwekani muloña waneyi.’ Elija wamwakwili nindi: ‘Yami inaleti ichi chaaña wanyi. Yeyi wunakojeji muloña wakudifukula kudi Bayali. Twilenu chuma chikutukwasha kwiluka. Pompeshaku muza niatuprofwetu aBayali haMpidi yaKarimeli.’

Antu apompeli hampidi. Elija wahosheli nindi: ‘Fuukulenuhu. Neyi Yehova diyi Nzambi walala, mulondelenu. Ilaña neyi Bayali diyi, mulondelenu. Ichi dichuma chitukwila. Atuprofwetu aBayali 450 akuloñesha mulambu nawa akutambika nzambi yawu, ninami nawa nukuloñesha mulambu nawa nukutambika Yehova. Yowu wukwakula nakesi diyi Nzambi walala.’ Antu etejeli mwahosheliyi.

Atuprofwetu aBayali aloñesheli mulambu. Ifuku dejima damukuma amutambikileña nzambi yawu nawu: “Eyi Bayali, twaakuli!” Bayali chabuliliyi kwakula, Elija wamusupishili. Elija wahosheli nindi: ‘Bidikishenuña. Hadaha wudi mutulu, nawa kunakukeñeka muntu wakumuhindwisha.’ Nichikwelili melela, atuprofwetu aBayali atwalekelihu kutambika. Ilaña kwosi wayakwili.

Elija washili mulambu windi hakameña nawa wechililihu menji hejima. Kuhiñahu Elija walombeli nindi: ‘Eyi Yehova, mwani lekaku awa antu eluki nawu yeyi Nzambi walala.’ Hohenohu, Yehova watemesheli kesi kufuma mwiwulu nakwocha mulambu. Antu abidikili nawu: “Yehova diyi Nzambi walala!” Elija wahosheli nindi: ‘Bayi muleka atuprofwetu aBayali atemukiku!’ Hanodu ifuku, atuprofwetu 450 aBayali ayijahili.

Kadivu kanyanya chikamwekeni hakaluñalwiji, Elija wamulejeli Ahabi nindi: ‘Nvula yeneni yinakwinza. Loñeshaku ikalu deyi wuyi kwitala.’ Iwulu deyilili namavu, mpepela yakunkili nawa nvula yeneni yatachikili kunoka. Nkumininaku, chaaña chamanini. Ahabi watemwishili nankashi ikalu dindi. Yehova wamukwashili Elija kutemuka chikupu kubadika ikalu! Komana kukala kwejima kwamweneñayi Elija kwamanini? Tuyenu tutali.

Yezebeli watiyili yuma yayimwekeneni atuprofwetu aBayali, dichi wahilili nankashi. Wamutemesheleli Elija mazu nindi: ‘Kumadiki, nineyi wakafwa neyi chafwiliwu atuprofwetu aBayali.’ Elija watiyili woma nankashi nawa watemukilili muchinkalampata. Walombeli nindi: ‘Eyi Yehova, kunahu. Nleki kwami nifwi.’ Iku nazeyi, Elija wakaamini mutulu mwishina damutondu.

Kañelu wamuhindwishili nawa wamulejeli mukuwunda nindi: “Hindukaku wudii.” Elija wamweni dinkendi danjiñumuki dadiña hamalola ataata ninsaba yamenji. Wadiili nikunwa, kufumahu wakaamini cheñi. Kañelu wamuhindwishili cheñi nakumwila nindi: ‘Daku. Watela kwikala nañovu muloña lwendu luwukwenda lwalulehi.’ Dichi wadiili cheñi. Kuhiñahu wendeli mafuku 40 mwaana niwufuku, sampu nichashikiliyi kuMpidi yaHorebi. Kwenoku weñilili mwiyeñu nakukaama. Ilaña Yehova wahosheli nayena. Wamwihwili nindi: “Elija, wunakwiladi kunu?” Waakwili nindi: ‘AIsarela anafumpi chitiyañenu chatiyañeniwu naneyi. Anakisañani tumeña tweyi nawa anajahi niatuprofwetu tweyi. Ichi dinu anakukeña kujaha ninami.’

Yehova wamulejeli nindi: ‘Yaña wimani hampidi.’ Hakutachika, kwiyeñu kwakunkili mpepela yeneni. Kuhiñahu, kwenjili mutentanshi nikesi. Nkumininaku, Elija watiyili izu dawunda, datiyakeneneña mwishina. Wadibutili kumesu nachakuvwala chindi nawa wemeni hanji kwiyeñu. Kuhiñahu Yehova wamwihwili chuma chaletesheli atemuki. Elija wahosheli nindi: “Yami wunashalihu hohu.” Ilaña Yehova wamulejeli nindi: ‘Wunashali nkaweyi wanyi. Kudi amakwawu 7,000 muIsarela achidi kudifukula kudi ami. Yaña wumutondi Elisha ekali kaprofwetu wukukusinsa.’ Hohenohu, wayili nakwila mwamulejeliwu kudi Yehova. Wunakutoñojoka neyi nineyi Yehova nateli kukukwasha neyi wila chuma chinakukeñayi nindi wili? Eña, wukukukwasha. Tutalenu chuma chamwekeni hikwadiña chaaña.