Hampinji yikwadiña chaaña, Yehova wamulejeli Elija nindi: ‘Yaña kuZarefwati. Kwenoku ntuluwa wukukwinka yakuda.’ Chashikiliyi kuyiisu yamusumba, Elija wamweni ntuluwa kazweñi nakuchaya nchawa. Wamulombeli menji akunwa. Iwu mumbanda chayileñayi nakuleta menji, wamubidikili nindi: “Mwani, wunletelihu nikachikunku kadinkendi.” Ilaña iwu ntuluwa wamulejeli nindi: ‘Hinikweti dinkendi dakukwinkaku. Nikweti hohu wuña walembuluka washikila nimanji antesha akuloñesha nachu yakuda yantesha yinukuda ami nimwanami weyala.’ Elija wamulejeli nindi: ‘Yehova nashiiki nindi neyi wukuñochela dinkendi, wuña weyi walembuluka nimanji akumanaña wanyi sampu nvula yinanoki cheñi.’

Dichi iwu ntuluwa wayili kwitala nawa wamwocheleli kaprofwetu kaYehova dinkendi. Neyi chashiikiliyi Yehova, iwu ntuluwa nimwanindi adiña nayakuda mpinji yejima hikwadiña chaaña. Nsaba jindi jawuña walembuluka nimanji jamanineña wanyi.

Kuhiñahu kwamwekeni chuma chatama. Mwanindi wakatili nankashi nawa wafwili. Wamulembeleli Elija nindi amukwashi. Elija wamutambwili iwu mwana mumakasa amama yindi nawa wamutwalili mukapeka kahewulu mwitala damama yindi. Wamukaamikili hakadidi nawa walombeli nindi: ‘Eyi Yehova, mwani mufuntishili iwu mwana wumi windi.’ Wuneluki chaletesheli ichi chuma chakoñeliyi Yehova chiikali chakuhayamisha? Muloña kwesekeja nachitweluka, hikwadiñahu muntu asañwiliwu cheñi kunyimaku. Nawa iwu ntuluwa nimwanindi hiyadiña aIsarelaku.

Ilaña iwu kansi wekalili cheñi nawumi, nawa watachikili kwoona! Elija wamulejeli ntuluwa nindi: ‘Talaña! Mwaneyi iwu wamumi.’ Wazañaleli chikupu nawa wamulejeli Elija nindi: ‘Chalala eyi wudi muntu waNzambi. Neluki chumichi muloña eyi wahoshaña hohu yuma yinakulejiyi Yehova.’

Neyi wudi hawindu muchipañu chindi muYezireyeli, Mwanta Ahabi wamweneña itempa danyivinyu deyala wejina daNaboti. Ahabi wakeñesheli idi itempa, nawa wakeñeleña kudilanda kudi yena. Ilaña Naboti wakaanini kumulandisha muloña Nshimbi jaYehova hijetejeli kulandisha mpata yawuswanaku. Komana Ahabi walemesheli mwafuukwiliyi Naboti hakwila chuma chaloña? Inehi. Ahabi wazuwili nankashi. Wahilili chakwila wakañenyeña nikufuma mukapeka kindi kakukaama, nawa wakaanineña nikuda.

Mwadi watama Yezebeli, ñoda Ahabi, wamulejeli nfumwindi nindi: ‘Yeyi mwanta waIsarela. Wunateli kwikala nayuma yejima yiwunakukeña. Nukukutambwila ayina mpata.’ Wasonekeleli akulumpi amumusumba nyikanda, nakuyileja nindi amwinki Naboti muloña wakumutuka Nzambi nawa amujahi namalola. Akulumpi elili yuma yejima yayilejeliwu kudi Yezebeli. Kuhiñahu, Yezebeli wamulejeli Ahabi nindi: ‘Naboti nafwi. Itempa danyivinyu dinekali deyi.’

Naboti hidiyi hohu muntu ajahiliwu kudi Yezebeli chakadi muloñaku. Wajahili antu amavulu adiña amukeña Yehova. Wadifukwileña kudi ankishi nawa welileña niyuma yikwawu yatama. Yehova wamweni yuma yatama yejima yakoñeliyi Yezebeli. Chumanyi chamwililiyi?

Ahabi chafwiliyi, mwanindi Yehorami wekalili mwanta. Yehova watemesheli Yehu nakumubabesha Yezebeli nichisaka chindi.

Yehu wakandamini hekalu dindi nakuya kuYezireyeli, kwashakamineñayi Yezebeli. Yehorami wayili nekalu nakudibulakana naYehu nawa wamwihwili nindi: ‘Komana hakachi ketu hadi kuwunda?’ Yena waakwili nindi: ‘Hakwikala kuwunda wanyi muloña mama yeyi, Yezebeli, nakukoña yuma yatama.’ Yehorami wafwilileña nindi ateñululi ikalu dindi kulonda atemuki. Ilaña Yehu wamwasili Yehorami muvu nawa wafwili.

Kuhiñahu Yehu wayili kuchipañu chaYezebeli. Chatiyiliyi nindi Yehu nakwinza, wadipenteli, wawahishili nsuki jindi nawa wayili nakumuhembelela hawindu yahetala dindi dahewulu. Yehu chashikiliyi, Yezebeli wamwimushili nawinyi. Yehu wayibidikili ambuña aYezebeli emeni kwakwihi nayena, nindi: “Munatilenu heseki!” Amushinjikilili hawindu, waholokeli heseki nawa wafwili.

Kuhiñahu, Yehu wajahili anyana kaAhabi awamayala 70 nawa wafumishili kudifukula kwaBayali mwituña. Wunamoni neyi Yehova weluka yuma yejima nawa wababeshaña hampinji yatelela antu elaña yuma yatama?