Kukwasha Antu muKaayi Kejima Kwiluka Kutaña niKusoneka

Agostinho washakamaña mwituña daBrazil wahosheli nindi: “Nakulilili hafamu twadiña atuzweñi chikupu nalekeli shikola kulonda kuzataku nyidimu yakukwasha chisaka.” Agostinho welukili kusoneka nikutaña chashikijiliyi yaaka 33. “Wahosheli nindi kudiza kutaña nikusoneka kwankwashili kutachika kudimona nami nidi muntu walumbuluka.”

Agostinho wudi hakachi kawantu 250,000 anakwashiwu kudi aYinsahu jaYehova kwiluka kutaña nikusoneka hadi yaaka 70 yinahitihu. Muloñadi aYinsahu jaYehova chadizishilañawu antu kwiluka kutaña nikusoneka? Antu anahetelimu ñahi muniyi shikola?

Chayikalilaña Antu Kwiluka Yuma Neyi Eluka Wanyi Kutaña niKusoneka

Mu 1935, aYinsahu jaYehova adiña nakushimwina nsañu yayiwahi mumaluña 115. Hakwila ashiki antu ahoshaña madimi acheñi hanyichima amishonali avumishileña jimpanji jamuBayibolu, jakubalumuna dehi nawa mpinji yikwawu ahanineña nyikanda kudi antu amunodu iluña mumadimi awu. Hela chakwila antu amavulu amwekesheli mpwila yakudiza Bayibolu, ilaña kubula kwiluka kutaña nikusoneka kwayiletesheli chiikali chakala kudiza.

Muloña wakwila atwesheleña wanyi kutaña Bayibolu halwawu, chayikalilileña kwiluka chakuzatisha yishina yamuBayibolu. (Yoshuwa 1:8; Masamu 1:2, 3) Chayikalilaña cheñi kuzata nyidimu yakuSpiritu. Chakutalilahu neyi anvwali eluka wanyi kutaña, chakeñekaña kuzata nañovu hakwila nawu adizishi anyanawu chahosha Bayibolu. (Kuhituluka 6:6, 7) AYinsahu abulili kwiluka kutaña chayikalilileña kudizisha antu amakwawu kuzatisha Bayibolu.

Kutañisha Antu Kwiluka Kutaña Nikusoneka

Mu 1940 nimu 1950, manakwetu Nathan H. Knorr nimanakwetu Milton G. Henschel, wejima wawu ayedi diwu adiña nakulombola mudimu wazatañawu aYinsahu jaYehova, endeli mumaluña amavulu nakukwashana mudimu wakushimwina. Mumaluña amavulu mwavulili antu abula kwiluka kutaña nikusoneka, akolesheli tusanji twanyitayi twamunana maluña kushaku ntajikilu yakuyidizishila awa antu mumatala awanta.

Tusanji twanyitayi twatemesheli nshimbi jakulondela kuyipompelu hakudizisha awa antu. Jinfulumendi jikwawu jadiña nanjila ninyikanda yatela kuzatishawu aYinsahu hakudizisha. Chakutalilahu, kasanji kamutayi muBrazil, atambwilili nyikanda yakudizishamu niyuma yikwawu yakuzatisha hakudizisha kufuma kudi nfulumendi nawa ayitemesheli kuyipompelu. Mumatuña amakwawu aYinsahu alandili iyi yuma yakuzatisha kuniyi progiramu awenawu.

Shikola yakudizisha kwiluka kutaña hela kusoneka ayishiliku kukwasha amayala niambanda kansi hela mukulumpi. Nkeñelu yayeni yadiña yakukwasha antu eluki kutaña mumadimi awu hela chakwila muyipompelu adizishileña mumadimi amboka-amboka.

Progiramu Yakwashaña Antu

Antu anahetelimu ñahi muniyi progiramu yakwiluka kutaña nikusoneka? Chinsahu wakuMexico wahosheli nindi: “Chayinu mpinji inakutiyishisha chikupu mwatalisha Bayibolu, nawa yinakunshika hamuchima. Kwiluka kutaña kunankwashi kwikala wakasunuka kuhosha nawantuñi nami nawa nashimwinaña antu nsañu yayiwahi yamuBayibolu.”

Progiramu yakukwasha antu kwiluka kutaña nikusoneka yinayikwashi kwiluka yuma yayivulu kubadika hohu hakutiyishisha Bayibolu. Isaac wakuBurundi wahosheli nindi: “kwiluka kutaña nikusoneka kunankwashi kwiluka nyidimu yakutuña. Nazataña mudimu wakutuña nawa chayinu mpinji nalombolaña mudimu weneni wakutuña.”

Jesusa wakuPeru wadiña nayaaka 49 hampinji yatachikiliyi kuya kushikola yakudiza kwiluka kutaña nikusoneka wahoshaña nindi: “Hakwikala mumbanda wasumbuka natela kumona wuseya nimajina ayuma yinakulanda hachisankanu. Ilaña kunyima chumichi chadiña nakunkalila. Innakusakilila haniyi shikola muloña yinankwashi, kulandila chisaka chami yuma chakubula kwakama.”

Hadi yaaka yayivulu yinahitihu, akwawuswa mumatuña amboka-mboka anahameki aYinsahu jaYehova hakwikala naniyi progiramu yakudizisha antu kwiluka kutaña nikusoneka. Makonu aYinsahu jaYehova achindi kudizisha antu kwiluka kutaña nikusoneka kuzatisha iyi progiramu niyozelu yinavuliliku hadi yaaka yinahitihu. Anasoneki nikupulinta mabroshuwa kwakwihi na 224 miliyoni mumadimi 720 kulonda kukwasha antu abula kwiluka hela elukaku chati kutaña.a