1, 2. Akoñi añinza awana kukalanyi muyipompelu yayivulu?

NKOÑI wañinza wadiña tuhu kwakwihi nakumanisha kuhanjeka nezanvu dawaeluda. Chayishinshikiliyi hamesu, watiyili muzañalu waweni nanawa atubiña adikita nawa hakachi kawu amakwawu adiña akula dehi neyi atata jindi. Ilaña kudi chuma chalema chamwakamishili, wayihwili nindi, “Amana kwami, chumanyi chimuneli hakwila mudizishi amana kwetu kulonda akameneña nyidimu yamuchipompelu?” Aeluda anukili mazu ahosheliyi nkoñi wañinza hampinji yahempwiliyi cheñi chipompelu, wayilejeli nindi atela kushaku maana hakudizisha antu amakwawu. Nkumininaku, eluda wumu wahosheli nindi, “Kuhosha hohu chalala, kwosi mudimu wutunazati.” Aeluda amakwawu niwena etejeleli.

² Neyi wudi eluda mukwaKristu, nineyi wunateli kuhosha chochimu neyi chahosheluwu awa aeluda? Hekwawu wunateli kuhosha momumu. Kunyeñumuka mukaayi kejima akoñi añinza awana neyi muyipompelu yayivulu mudi kukankila kweneni kutalisha hakudizisha amana kwetu atwansi niakulumpi kulonda ashikuhu hakuhemba nyikoku. Chumichi chinateli kuleta kukala kweneni. Muloñadi?

3. (a) Indi Nyikanda Yajila yamwekeshaña ñahi kulema kwakudizisha amakwawu, nawa muloñadi wejima wetu chitwatela kushaku muchima? (Talenu tumazu twaheshina.) (b) Aeluda amakwawu chayikalilaña ñahi kuwana mpinji yakudizisha amana kwetu?

³ Chakadi nikujina, neyi mudi akabiña mweluka nenu kudizisha antu amakwawu hichuma chalema.a Mweluka nenu amana kwetu amavulu anakukeñeka kulonda akwashi mudimu wakuhemba yipompelu kwikala yakola kuspiritu nikukwashaku yipompelu yayiha yinakutuñewa. (Tañenu Isaya 60:22.) Mweluka cheñi nenu Izu daNzambi dayikonkomwenaña ‘kudizisha akwenu.’ (Tañenu 2 Timotewu 2:2.) Kufwana aeluda ashimunawu kumatachikilu chinateli kuyikalila kwila mwenimu. Chineli mwakamenaña chisaka chenu, mudimu wakumujimba, nyidimu yamuchipompelu niyuma yikwawu yamwekanaña mukukasumwisha, chinateli kuyikalila kuwana mpinji yakudizisha amakwawu muchipompelu. Chili tudi nanyidimu yayivulu, tuhanjekenu chichalemena kwikala nampinji yakudizisha amakwawu.

KUDIZISHA ANTU AMAKWAWU HICHUMA CHALEMA

4. Chumanyi chaleñelaña aeluda mpinji yikwawu kulabajala hakudizisha amana kwetu?

⁴ Chumanyi chaleñelaña aeluda amakwawu kukañanya kuwana mpinji yakudizisha amakwawu? Hadaha, amakwawu atoñojokaña nawu: ‘Kudizisha amakwawu kwalema, ilaña hikwesekana nanyidimu yikwawu yamuchipompelu yakeñekaña kuzatilahu swayuku. Neyi nibula kunyakashana kudizisha amakwawu, chipompelu chikutwalekahu nakuzatika.’ Hela chakwila nyidimu yikwawu yakeñekaña kuzatilahu swayi-swayi, neyi mulabajala kudizisha amana kwetu mukuzeyesha chipompelu.

5, 6. Chumanyi chitunateli kudizila kuchakutalilahu chañendeshi nimunjila mwawahishilañayi injini yindi, nawa chumichi chinateli kuzatika ñahi kutalisha hakudizisha amakwawu muchipompelu?

⁵ Toñojokenu hanichi chakutalilahu: Ñendeshi weluka nindi hakwila yahembi injini yamotoka yindi chiwahi, watela kutalaña oyelu yamotoka mpinji yejima. Hela chochu, nateli kutoñojoka nindi kusha manji mumotoka dichi chuma chakeñekaña nankashi kubadika kutala oyelu. Kafwampi, neyi kusha manji mumotoka yindi nehi, motoka yinateli kujima. Nateli kutoñojoka nindi ‘neyi hinikweti mpinji yakuhimpa oyeluku, motoka yikutwalekahu kwenda hadi mpinji yantesha.’ Hanu dinu kukalanyi kwafumañamu? Neyi ñendeshi yatwalekahu kushintajala kuwahisha injini yamotoka, ifuku dimu motoka yakafwa chikupu. Neyi chumichi chimwekana, wukukisa mpinji nimali amavulu hakwila yawahishi motoka yindi. Chumanyi chitunakudizilaku?

⁶ Aeluda akweti nyidimu yalema nankashi yakalakalañawu mukunyakashana, ilaña neyi alabajala chipompelu chikuzeya. Kufwana ñendeshi ashimunawu muchakutalilahu watwalekañahu kusha manji mumotoka, aeluda atela ‘kushinshika yuma yabadika kulema.’ (Fwi. 1:10) Hela chochu, aeluda amakwawu ekala nanyidimu chikupu yayileñelaña akañanyeña kuwana mpinji yakudizisha amakwawu, dikwila nawu kuwahishaña injini mpinji yejima. Neyi aeluda alabajala kudizisha amakwawu, mukuhita kwampinji chipompelu hichikwikala nawamana kwetu ashikahuku akuzataña nyidimu yejima yakeñekañaku.

7. Twatela kuyimona ñahi aeluda ekala nampinji yakudizisha amakwawu?

⁷ Chakadi nikujina, hitwatela kutoñojoka netu kudizisha amakwawu hichuma chabula kulemaku. Aeluda ekalaña nampinji yakudizisha amana kwetu abula kukuluka yitembi, hiyankoñi akweti maana nawa akwashaña chipompelu chejima. (Tañenu 1 Petulu 4:10.) Indi chipompelu chahetelañamu ñahi?

NEYI MUDIZISHA AMAKWAWU AKAYIKWASHA NYIDIMU

8. (a) Yumanyi yayileñelaña aeluda kudizisha amakwawu? (b) Mudimwinyi wakunyakashana wazatañawu aeluda azatilaña kudi “kukankila kweneni”? (Talenu chikasha chikwila nawu “Mudimu Watela Kuzatewa muKunyakashana.”)

⁸ Niaeluda akuluka yitembi atela kwiluka nawu neyi hiyakushinakaja hiyakuzataña nyidimu neyi chazatileñawu muchipompelu mafuku akunyimaku. (Mika 6:8) Atela kwiluka cheñi nawu, ‘mpinji nakululakana chayilulakenu’ kunateli kuhimpa chikupu wuswa wawu wakwakamena nyidimu yamuchipompelu. (Mukwa. 9:11, 12; Yak. 4:13, 14) Hamuloña wakukeña kwakamena nyikoku yaYehova, aeluda akweti kashinshi azatishaña mpinji yawu hakudizisha amana kwetu achidi atwansi yuma yinadizuwu hayaaka yinamuzatiluwu Nzambi nakashinshi.—Tañenu Masamu 71:17, 18.

9. Yumanyi yikamwekana kumbidi yaleñelaña mudimu wakudizisha amakwawu wikali walema?

⁹ Indi aeluda adizishaña amakwawu ekala alema ñahi kudi nyikoku? Akoleshaña mpanda yachipompelu. Munjilanyi? Aeluda azataña nañovu hakudizisha amana kwetu amavulu aleñelaña chipompelu kwikala chakola nikunuñañana chayinu mpinji, sweje-e mumpinji yalukadi lweneni lunakwinza. (Ezek. 38:10-12; Mika 5:5, 6) Aeluda, tunayilembeleli netu shenu maana hakudizisha amakwawu muyuma yashiyashana yamumudimu wenu wakushimwina makonu.

10. Chumanyi chatela kwilawu eluda hakwila ekali nampinji yakudizisha amakwawu?

¹⁰ Kafwampi, tweluka netu mpinji yimwazatishaña hakwakamena nyidimu yikwawu yamuchipompelu yalema, nawa yayileñela mubuli kwikala nampinji. Dichi, mwatela kwambula mpinji yenu kulonda muyizatisheña hakudizisha amakwawu. (Mukwa. 3:1) Neyi mukudizisha amakwawu akayikwashaku nyidimu kumbidi.

KEÑENU NJILA YAYIWAHI YAKWILUKILAMU MUNTU IMUNAKUDIZISHA

11. (a) Njilanyi jajiwahi jashimunawu aeluda akumatuña ashiyashana adizishaña amakwawu? (b) Kwesekeja naYishimu 15:22, muloñadi chichalemena kulondela njila jashimunawu aeluda amakwawu?

¹¹ Katataka, izanvu dawaeluda dakwashili amana kwawu kukulilaku kuspiritu ayihwili njila yazatishañawu hakudizisha amakwawu.b Hela chakwila chihandilu chanawa aeluda chashiyashana, ilaña ashimwini yuma yoyimu. Chumichi chamwekeshañadi? Chamwekeshaña nawu kufumba kwashindamena muBayibolu kwakwashaña antu adizaña ‘ejima muyipompelu yejima’ neyi chochichadiña mumafuku akapostolu Pawulu. (1 Kor. 4:17) Dichi, muchinu chibaaba nichinalondeluhu tukudiza jinjila jazatishañawu awa aeluda. (Yish. 15:22) Hakwila tupeleshi yuma, chinu chibaaba chikutena antu adizishaña akwawu nawu, “antañishi” nawa antu adizaña nawu, “atudizi.”

12. Ntañishi watela kukeña njilanyi, nawa muloñadi?

¹² Ntañishi watela kukeña njila yayiwahi yakwilukilamu muntu wunakudizishayi. Neyi chochadimañayi ndimi hela kuwahisha iseki henohu kanda yatumbi mbutu, dichi ntañishi niyena watela kuloñesha muchima wamuntu henohu kanda yatachiki kumudizisha yuma yayiha. Indi ntañishi nateli kukeña ñahi njila yayiwahi yakwilukilamu muntu wunakudizishayi? Kuhitila mukulondela njila yoyimu neyi yazatishiliyi kaprofwetu wumu wakunyaka. Hinjila yamuchidinyi yeniyi?

13-15. (a) Mudimwinyi watambwililiyi kaprofwetu Samweli? (b) Samweli wazatili ñahi mudimu windi? (Talenu mwevulu wakutachikilahu.) (c) Muloñadi aeluda makonu chiyatela kushilaku muchima kuniyi nsañu yamuBayibolu yahosha hadi Samweli?

¹³ Yaaka yakubadika 3,000 yinahituhu, Yehova wamulejeli kaprofwetu wakashinakaji Samweli nindi: ‘Kumadiki, hampinji yoyeniyi, nakakutemeshela muntu wakwituña daBenjamini, wakamuwayishi manji ekali nlomboli yawantu ami aIsarela.’ (1 Sam. 9:15, 16) Samweli welukili nindi mudimu windi wawunlomboli wamanini nawa Yehova wamulejeli kuwayisha muntu wakamuswana. Samweli watela watoñojokeli nindi, ‘Nateli kumukwasha ñahi iwu muntu kulonda yazati iwu mudimu?’ Wawanini njila nawa dimu mweliliyi.

¹⁴ Ifuku dalondeleluhu, Samweli wamumweni Sawulu nawa Yehova wamwilili nindi: ‘Talaku iyala inakuleja!’ Kuhiñahu, Samweli wazatilili hayuma yatoñojokeliyi. Wamwilili Sawulu nindi adyili hamu mwitala dakudyila. Wamwinkeli Sawulu nikalama kindi yitwamu yayiwahi nawa ninyisunyi yambiji yayiwahi, nawa wamulejeli nindi: ‘Nonaku wudyi muloña diyi yakwambwilawu kufumisha hinatambikili antu.’ Nkumininaku, kaprofwetu Samweli wamusendeli Sawulu kwitala dindi iku anakuhanjeka. Samweli wazatishili chiwahi kana kapinji kiyadiileñawu yakudya nikuhanjeka hakwenda kulonda yaloñeshi muchima waSawulu. Dichi wamutambikili Sawulu hetala dahewulu. Chikwelili melela Samweli “hakuhanjika naSawulu hewulu detala” kushika nimpinji yakukama. Chikwachili, Samweli wamuwayishili Sawulu, kumupwepujola nikumuleja nshimbi jajivulu. Nkuminaku wamulejeli Sawulu kuya, iku namukwashi dehi nanyidimu yakazatayi.—1 Sam. 9:17-27; 10:1.

¹⁵ Kuwayisha muntu kulonda yekali nlomboli wamunza, hikwesekana nakudizisha mana kwetu kulonda yekali eluda hela nkoñi wakuzatila muchipompeluku. Hela chochu, njila yazatishiliyi Samweli yinateli kuyidizisha aeluda yuma yalema makonu. Tuhanjekenu hanjila jiyedi.

ANTAÑISHI AKEÑAÑA KUDIZISHA NAWA AMABWAMBU ALALA

16. (a) Samweli watiyili ñahi chelili aIsarela akeñi mwanta walukanu? (b) Chililwinyi chamwekesheliyi Samweli hakuzata mudimu windi wakumuwayisha Sawulu?

¹⁶ Ikalenu namuchima wakukeña, bayi wakubula kukeñaku. Samweli chatiyiliyi nawu aIsarela anakukeña mwanta walukanu, waneñeli nawa wamweni nindi antu jindi anamukaani. (1 Sam. 8:4-8) Nawa Samweli hakeñeleña kwila chuma chamulejeluwu antu jinduku, chakwila Yehova wamulejeli mapampa kasatu nindi yitiyilili. (1 Sam. 8:7, 9, 22) Hela chochu, Samweli hamuhembeleli nkunyi iwu muntu wamuswaninuku. Yehova chamulejeliyi nindi yamuwayishi Sawulu, iwu kaprofwetu wovwahilili bayi neyi chakumukanjikijaku ilaña namuchima wakukeña.

17. Indi aeluda makonu amwekeshaña ñahi chililu chaSamweli, nawa muzañalwinyi watiyañawu?

¹⁷ Kufwana Samweli, aeluda akuluka yitembi makonu amwekeshaña yililu yayiwahi hakudizisha amakwawu. (1 Pet. 5:2) Aeluda amuchidiwu hiyashintajalaña hakudizisha amakwawu muloña wakuchiina kuyitambula nyidimu yikwetuwu muchipompeluku. Antañishi ekala namuchima wawuwahi amonaña atudizi nawu hiyakwakudibecha nawuku, ilaña nawu ‘hiyakwawu akwakukalakala hamu nawu,’ nawa alema muchipompelu. (2 Kor. 1:24; Heb. 13:16) Nawa antañishi abula lwisu azañalalaña hakumona atudizi anakuzatisha wuswa wawu hakukwasha chipompelu.—Yil. 20:35.

18, 19. Indi eluda nateli kuloñesha ñahi muchima wakadizi, nawa kwila mwenimu kwalemenadi?

¹⁸ Ikalenu ibwambu, bayi neyi ntañishi hohuku. Ifuku dayiliyi Sawulu kudi kaprofwetu Samweli, wadi kumwichila Sawulu chipunda chamanji kumutu hohu nakumutemesha neyi mwanta wamuha chakadi kumuleja nshimbi jajivulu. Ilaña, Samweli wekalili nampinji yakuloñesha muchima waSawulu chovu-chovu. Hanyima yakudya, kolola nyendu, kuhanjeka hampinji yayilehi nikunooka, dihu hamweniyi kaprofwetu nindi himpinji yayiwahi yakumuwayisha Sawulu.

¹⁹ Munjila yoyimu, ntañishi niyena makonu watela kudizisha amakwawu kuhitila mukuwana mpinji yayiwahi yakunooka nikwikala nawubwambu wawuwahi nakadizi. Njila jikuzatishayi eluda hakwila yekali nawubwambu wamuchidiwu jikushiyashana kwesekeja nachekala chisemwa niiluña dawu. Hichidi namuloña nakumwashakamañaku, ikalenu nampinji yakwikala hamu nakadizi kulonda yeluki nindi ‘mwamulemesha.’ (Tañenu Aroma 12:10.) Chakadi nikujina, atudizi akusakilila chikupu hakukeña kumukuyimwekeshela nichimukuyakamena.

20, 21. (a) Munateli kulumbulula ñahi ntañishi wamuwahi? (b) Yumanyi yitwakahanjekahu muchibaaba chinalondeluhu?

²⁰ Aeluda anukenu nenu: Ntañishi wamuwahi bayi neyi himuntu wakeña kudizisha akwawu hohuku, ilaña wakeñaña muntu wunakudizishayi. (Esekejenu Yowanu 5:20.) Kadizi welukaña nindi ntañishi yami wukweti kukeña nawa yililu yamuchidiwu yikumukwasha kulonda yashuku maana kuyuma yimunakumudizisha. Dichi enu aeluda, hampinji yimunakudizisha ikalenu amabwambu, bayi neyi antañishi hohuku.—Yish. 17:17; Yow. 15:15.

²¹ Hanyima yakuloñesha muchima wakadizi, eluda watela kumuleja yuma yakeñekaña. Njilanyi jatela kuzatishayi eluda? Iji njila twakajihanjeka muchibaaba chinalondeluhu.

1. (a) Kufuma tuhu kushankulu ambuña Nzambi eluka nawudi hakudizisha amakwawu, nawa chumichi chinateli kuzatika ñahi makonu? (b) Yumanyi yitukuhanjeka muchinu chibaaba?

KUFUMA tuhu kushankulu ambuña Nzambi eluka nawu kudizisha amakwawu mwafumaña yuma yayiwahi. Nkakulula Abarama ‘watwalili antu jindi amayala afundishiliyi njita’ kulonda amupulwishi Loti nawa awa mayala amupulwishili. (Kutach. 14:14-16) Mumafuku aMwanta Davidi, akwakwimbila mwitala daNzambi ‘afundishiluwu kumwimbila Yehova’ amuhamekeli Nzambi. (1 Kushi. 25:7) Makonu, tunakulwa njita yakuspiritu naSatana niantu jindi. (Efwes. 6:11-13) Tunakuzata cheñi nañovu kulonda tumuhamekeña Yehova. (Heb. 13:15, 16) Dichi, kufwana ambuña Nzambi akushankulu, hakwila tuzati chiwahi atela kutudizisha. Muchipompelu, Yehova wayinka aeluda mudimu wakudizisha amakwawu. (2 Tim. 2:2) Njilanyi jazatishañawu aeluda akuluka yitembi hakudizisha amana kwetu hakwila ashikuhu kwakamena nyikoku?

MUKOLESHENU KADIZI KUSPIRITU

2. Eluda watela kwiladi henohu kanda yamudizishi mana kwetu wabula kushikahu yuma yikwawu, nawa muloñadi?

² Chineli mudi aeluda anateli kuyesekeja nandimi. Henohu kanda yatumbi mbutu, ndimi washaña wushi hamaseki kulonda mbutu yikuli chiwahi. Munjila yoyimu, henohu kanda mumudizishi mana kwetu wabula kushikahu yuma yikwawu, mwatela kwiluka nsona jikwawu jimwatela kumuleja kulonda muloñeshi muchima windi hayuma yayivulu yikudizayi.—1 Tim. 4:6.

3. (a) Indi eluda nateli kuzatisha ñahi mazu aYesu ekala haMaku 12:29, 30 hakumukwasha kadizi? (b) Kulomba kukulombayi eluda kunateli kumukwasha ñahi kadizi?

³ Hakwila mwiluki yitoñojoka niyililu yindi kutalisha hansañu yalala yaWanta, mwatela kumwihula nenu, ‘Indi kudihana kwenu kudi Yehova kunahimpi chihandilu chenu munjilanyi?’ Ilu lwihu lunateli kuleñela kutachika kuhanjeka hachuma chaleñelaña mudimu wetu wajila tuwuzateña namuchima wejima. (Tañenu Maku 12:29, 30.) Chimwamanisha kuhanjeka muniyi njila munateli kulomba kudi Yehova kulonda yamwinki kadizi spiritu yindi yajila hakwila yimukwashi kudiza chiwahi. Chinateli kumukolesha mana kwetu neyi yatiya chimukumulombelelaku.

4. (a) Shimunenu yakutalilahu yamuBayibolu yinateli kumuleñela kadizi kupama kuspiritu. (b) Chikonkwanyi chikwetuwu aeluda hakudizisha amakwawu?

⁴ Hakutachika kumudizisha, munateli kuhanjeka hansañu yamuBayibolu yinateli kumuleñela kadizi kwiluka kulema kwakwikala namuchima wakudihana, kumukuhwelela nikudizoza. (1 Anya. 19:19-21; Nehe. 7:2; 13:13; Yil. 18:24-26) Yililu yeniyi yinateli kumukwasha kadizi neyi chochakwashaña wushi iseki. Yikumukwasha kukula swayi kuspiritu. Eluda wakuFrance wejina daJean-Claude wahosheli nindi: “Chikonkwanyi chami chakudizisha kadizi chekala chakumukwasha kupama kuspiritu. Nekalaña nampinji yakutañila hamu nsona yimu nakadizi kulonda ‘nitoneshi mesu’ akadizi yeluki ‘yuma yakuhayamisha’ yekala Mwizu daNzambi.” (Mas. 119:18) Njilanyi jikwawu jimunateli kumukoleshelamu kadizi?

MULEJENU YIKONKWANYI NIMULOÑA WATELA KUYISHIKIJILAYI

5. (a) Indi kuhanjeka nakadizi hayikonkwanyi yakuspiritu kwalemenadi? (b) Muloñadi aeluda chiyatela kudizishilawu amana kwetu achidi atwansi? (Talenu tumazu twaheshina.)

⁵ Mwihulenu kadizi nenu, ‘Yikonkwanyi yakuspiritu yiwukweti?’ Neyi hakweti chikonkwanyi chakuspirituku, mukwashenu yemiki chikonkwanyi chimu chinateli kushikijayi. Mulejenu namuzañalu chikonkwanyi chakuspiritu chimwemikili nimuzañalu wumwatiyili hampinji yimwachishikijili. Hela chakwila iyi njila yinateli kumwekana neyi yamukunkulwayi, ilana yakwashanaña. Eluda nawa payiniya wejina daVictor, wakuAfrica, wanukaña nindi: “Hinachidiña kansi eluda wañihwili malwihu antesha amawahi kutalisha hayikonkwanyi yami. Ana malwihu ankwashili kutachika kutoñojoka chikupu hamudimu wami wakushimwina.” Aeluda akuluka yitembi eluka kulema kwakutachika kudizisha amana kwetu achidi anyanya kuhitila mukuyinka nyidimu yamuchipompelu yatela kuzatawu kwesekeja nayaaka yikwetuwu. Neyi muyidizisha muniyi njila henohu achidi atwansi chikuyikwasha kushinshika hayikonkwanyi yakuspiritu yinateli kuyikwasha neyi anakuli dehi hampinji yakamonañawu yuma yayivulu yaluwañeshaña.—Tañenu Masamu 71:5, 17.a

6. Chumanyi chalemesheliyi Yesu hakudizisha amakwawu?

⁶ Munateli cheñi kumusañumuna kadizi kwikala nampwila yakuzata bayi neyi kuhitila mukumulumbulwila hohu yuma yatela kwilayuku, ilaña nimuloña wukuletesha yeli mwenomu. Neyi mumuleja muloña watelela kwililayi mwenomu, mukumwimbujola Ntañishi Muneni Yesu. Chakutalilahu, henohu kanda yayinki apostolu indi mudimu wakwilisha atumbanji, Yesu wayilejeli muloña waweni watela kwovwahilawu. Wahosheli nindi: “Ñovu jamwiwulu nijahamaseki jejima anajinyinki.” Wabombeleluhu cheñi nindi: ‘Yenu mwakelishi atumbanji munyunza yejima.’ (Mat. 28:18, 19) Munateli kumwimbujola ñahi Yesu hakudizisha amakwawu?

7, 8. (a) Indi aeluda makonu anateli kumwimbujola ñahi Yesu hakudizisha amakwawu? (b) Indi kumuhameka kadizi kwalemenadi? (c) Njilanyi jinateli kukwasha aeluda kudizisha amakwawu? (Talenu chikasha chinakwila nawu, “Chakudizisha Antu Amakwawu.”)

⁷ Mulumbulwilenu kadizi muloña washimunawu muNsona hayuma yinamuleji kwila. Neyi mwila mwenimu dikwila nawu munakumudizisha chakuzatisha nshimbi jamuBayibolu. Chakutalilahu, neyi munamwinki mana kwetu mudimu wakuhemba njila yaya Hetala daWanta nawunyonji, munateli kutaña nsona yaTitusa 2:10 nakumulumbulwila nenu mudimu wumunamwinki wakuwahisha Itala daWanta wakwashañaku ‘kuwahisha ntañishilu yaNzambi, Chamwinu chetu.’ Mulejenu cheñi kadizi kwakamenaku atushinakaji amuchipompelu nichiyinateli kuhetelamu neyi yazataña mudimu windi chiwahi. Kumuleja kadizi muniyi njila hampinji yimunakumudizisha chikumukwasha kusha maana hakukwasha antu bayi neyi hakuhemba hohu nshimbuku. Wukuzañalalaña hakumona amana kwetu niahela muchipompelu chiyanakuhetelamu munyidimu yinakuzatayi.

⁸ Mwatela cheñi kumuhameka kadizi chinakuzatishayi yuma yimunakumuleja. Kwila mwenimu kwalemenadi? Kumuhameka kadizi chakufuma hamuchima chidi neyi munakutukumwina mbutu, kukumukwasha kuzata chiwahi.—Esekejenu Matewu 3:17.

KUKALA KUKWAWU

9. (a) Kukalanyi kwamonañawu aeluda ekala mumatuña aheta kutalisha hakudizisha amakwawu? (b) Muloñadi amana kwetu atwansi amakwawu chiyabulilañawu kulemesha chalala muchihandilu chawu?

⁹ Aeluda ekala mumatuña mwekala maheta anateli kumona kukala kukwawu, kwakukolesha amana kwetu apapatishewa dehi adi muyaaka yamuma 20 hela 30 hakwila azateña nyidimu yamuchipompelu. Twehwili aeluda akuluka yitembi amumatuña aheta 20 kulonda atuleji muloña waleteshaña amana kwetu atwansi kubula kushaku maana kunyidimu yamuchipompelu. Ñakwilu yitwatambwilili yadiña yoyimu, yakwila nawu: Hampinji yakulileñawu, atwansi amakwawu hiyayikwashileña kufwila yuma yakuspirituku. Atwansi amakwawu, akeñeleña kwimika yikonkwanyi yakuspiritu, ilaña anvwali jawu adiña nakuyikolesha kufwila nyidimu yakumujimba. Atwansi amuchidiwu hiyalemesheli chalala muchihandilu chawu chikupuku.—Mat. 10:24.

10, 11. (a) Indi eluda nateli kumukwasha ñahi mana kwetu chovu-chovu wunakumwekana neyi nakujinoka kulonda yihimpi yitoñojoka yindi? (b) Nsañwinyi yamuBayibolu yinateli kuzatishayi eluda hakumukwasha iwu mana kwetu, nawa muloñadi? (Talenu tumazu twaheshina.)

¹⁰ Neyi mana kwetu nakumwekana neyi nakujinoka, hakuhita mpinji hakwila muhimpi yitoñojoka yindi, ilaña munateli kumukwasha. Neyi chochololañayi ndimi mutondu windi kulonda wukuli chiwahi, anenu nawu munateli kukwasha amana kwetu chovu-chovu kulonda eluki kulema kwakuhimpa yitoñojoka yawu nakwiteja nyidimu yamuchipompelu. Hanu dinu munateli kwilaña?

¹¹ Ikalenu nampinji yakwikala nawubwambu nanowu mana kwetu. Mana kwetu watela kwiluka nindi niyena wukweti mudimu muchipompelu. Dichi mukuhita kwampinji, mwatela kuhanjeka nindi hansona jamuBayibolu nikumukwasha kulonda atoñojoki hakudihana kwadihaniniyi kudi Yehova. (Mukwa. 5:4; Isa. 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Munateli kumwihula nenu, ‘Yumanyi yiwamukanini Yehova hampinji yiwadihanini kudi yena?’ Esekenu kusañumuna muchima windi kuhitila mukumwihula nenu, ‘Wunakutoñojoka neyi Yehova watiyili ñahi chiwapapatisheweli?’ (Yish. 27:11) ‘Indi Satana watiyili ñahi?’ (1 Pet. 5:8) Bayi mudiwula yuma yikufuma mudi mana kwetu neyi mumutañila chiwahi nsañu yamuBayibolu.—Tañenu Aheberu 4:12.b

ATUDIZI, IKALENU ASHINSHIKA

12, 13. (a) Chililwinyi chamwekesheliyi Elisha hakwikala kadizi? (b) Indi Yehova wamukiswilili ñahi Elisha hakwikala washinshika?

¹² Enu amana kwetu atwansi, ninenu mwatela kuzata nyidimu muchipompelu. Chililwinyi chikuyikwasha kuzata chiwahi? Hakwila twakuli, tushinshikenu yuma yamwekeni muchihandilu chakadizi wakunyaka.

¹³ Kwakwihi nayaaka 3,000 yinahituhu, kaprofwetu Elija wamwilili kansi Elisha nindi yekali kalama kindi. Chakadi nikushintajala, Elisha wetejeli iwu mudimu nawa wamukwashileñaku ona kashinakaji nyidimu yikwawu. (2 Anya. 3:11) Chelili yaaka yitanu nachimu yakumudizisha hiyikumana, Elisha welukili nindi Elija keña yamanishi kuzata mudimu windi muIsarela. Hayina mpinji Elija wamulejeli ibwambu dindi wadizishiliyi chiwahi nindi yaleki kumulondela, ilana Elisha wamulejeli mapampa kasatu nindi: “Hinukukushiyaku.” Wafuukwiluhu kubula kumushiya ntañishi yindi. Mukuhita kwampinji Yehova wamukiswilili Elisha hakashinshi kindi kamwekesheliyi kuhitila mukumona Elija chamuhukwiluwu muchihayamisha.—2 Anya. 2:1-12.

14. (a) Indi atudizi makonu anateli kumwimbujola ñahi Elisha? (b) Muloñadi chichalemena kadizi kwikala washinshika?

¹⁴ Munateli kumwimbujola ñahi Elisha makonu? Nyakalenuña kwiteja nyidimu, kushilahu ninyidimu yamwekenaña neyi yalema wanyi. Monenuña ntañishi yenu nenu hibwambu denu nawa musakililenuña chinakuzatayi nañovu hakuyikwasha. Chimukumwakula chikumwekesha nawu: “Hinukukushiyaku.” Sweje-e dinu, ikalenu ashinshika hampinji yimunakuzata mudimu wejima wunayinkuwu. Chumichi chalemenadi? Muloña neyi mumwekesha nenu mwashinshika nawa ayikuhwelela, aeluda akwiluka nawu Yehova nakukeña kuyinka nyidimu yikwawu yamuchipompelu.—Mas. 101:6; tañenu 2 Timotewu 2:2.

LEMESHENU AELUDA AKULUKA YITEMBI

15, 16. (a) Munjilanyi Elisha mwamulemesheleliyi ntañishi yindi? (Talenu mwevulu wakutachikilahu.) (b) Indi Elisha wakolesheli ñahi akwawu atuprofwetu?

¹⁵ Nsañu yahosha hadi nswana yaElija, Elisha, yamwekeshaña cheñi nawu amana kwetu makonu atela kulemesha aeluda akuluka yitembi. Chelili aElija naElisha afumi kuYeriku kwayiluwu nakuhempula izanvu dawatuprofwetu, awa mayala ayedi ayili kuKaloña Yodana. Chashikiluwu kukaloña, ‘Elija hakunona ihina dindi hakudivuñavuña hakweta hamenji menji hiyakwambuka hakachi hiyakuzambuka heseki dawuma.’ Chelili anazambuki dehi kaloña heseki dawuma, awa amayala atwalekeluhu ‘kuhanjeka iku anakuya.’ Elisha hatoñojokeli nindi neluki dehi yuma yejimaku. Elisha watwalekeluhu kutiyilila mazu ejima amulejeleñawu kudi ntañishi yindi kushika nimpinji yamuhukwiluwu. Nkumininaku, Elija amuhukwili muchihayamisha. Chafuntiliyi kuchikumu chaYodana, Elisha weteli hamenji nehina daElija, hakutambika nindi, “Yehova Nzambi yaElija wudi kudihi?” Menji ambukili cheñi hakachi.—2 Anya. 2:8-14.

¹⁶ Komana munamoni nenu chihayamisha chatachi chakoñeliyi Elisha chadifwanini nachihayamisha chakukumishaku chakoñeliyi Elija? Chumichi chatudizishañadi? Elisha hatoñojokeleña nindi chineli yena diyi washaliluhu wateleleli kuzata yuma munjila yambukaku nachazatileñayi Elijaku. Ilana, Elisha watwalekeluhu nakwimbujola Elija chazatileñayi mudimu windi, dikwila nawu wamulemesheli ntañishi yindi nawa chumichi chakwashili akwawu atuprofwetu. (2 Anya. 2:15) Elisha wazatili mudimu windi wawukaprofwetu hadi yaaka 60, nawa Yehova wamukwashili kukoña yihayamisha yayivulu kubadika niyakoñeliyi Elija. Chumanyi chiyanateli kudizilaku atudizi makonu?

17. (a) Atudizi makonu anateli kwimbujola ñahi yililu yaElisha? (b) Mukuhita kwampinji, Yehova nateli kuzatisha ñahi atudizi ashinshika?

¹⁷ Bayi mutoñojoka nenu chayinkawu kuzata nyidimu muchipompelu, mwatela kushikena dakuhimpa yuma kulonda muzateña munjila yambukaku nachazatileñawu akwenuku. Ilukenu nenu hiyenu mwatela kuhimpa yuma kulonda mwili chimunakukeñaku, ilaña chipompelu dichi chatela kuhimpa yuma kwesekeja nanshimbi yahanaña kuloñesha kwaYehova. Kufwana Elisha welili yuma yakukolesha akwawu atuprofwetu kuhitila mukumulemesha ntañishi yindi Elija nikuzatisha njila jazatishileñayi, anenu nawa munateli kukolesha akwenu akwakwitiya nikulemesha aeluda akuluka yitembi kuhitila mukutwalekahu kuzatisha nsañu yamuBayibolu yayilejeluwu. (Tañenu 1 Akorinda 4:17.) Chakadi nikujina, chimweluka yuma munateli kudikwasha nawakwenu hakuhimpa yuma yinateli kukwasha chipompelu kwendela hamu nakuloñesha kwaYehova. Neyi chochamukwashiluwu Elisha, mukuhita kwampinji Yehova nateli kuyikwasha enu atudizi ashinshika kukoña yuma yamaneni kubadika antañishi jenu.—Yow. 14:12.

18. Indi kudizisha amana kwetu muyipompelu kwalemenadi makonu?

¹⁸ Tunakuhweleli netu njila jinashimunuwu muchinu chibaaba nimuchibaaba chinafumuhu, jikukwasha aeluda kwikala nampinji yakudizisha amakwawu. Amana kwetu amakwawu niwena etejaña yuma yinakuyidizishawu nikuyizatisha chiwahi hakuhemba nyikoku yaYehova. Neyi mwila mwenimu mukukwasha yipompelu yamukaayi kejima nikutukwasha hamuntu hamuntu kulonda twikali ashinshika hampinji yikamwekana yuma yayiwahi kumbidi.