Mukanda wamuBayibolu Naambala 64—3 Yowanu
Nsoneki: Kapostolu Yowanu
Awisonekeleli: muEfwesesa, hela kwakwihi
Awimanishili Kuwisoneka: Kwakwihi na 98 C.E.
IWU MUKANDA amusonekeleli Gayusi, mwiniKristu washinshika wakeñeliyi Yowanu chikupu. Idi ijina adilukili chikupu mumafuku achipompelu chakusambila. Damwekanaña mapampa kawana muyibalu yikwawu yaNyikanda yachiGriki yawiniKristu, yahoshaña hadi antu asatu amboka-mboka indi kwiji awaana. (Yil. 19:29; 20:4; Rom. 16:23; 1 Kor. 1:14) Kwosi wunsahu wukwawu wukumushimuna chikupu Gayusi wasonekeleliyi Yowanu wukubadika haniwu. Tweluka hohu netu Gayusi wadiña wamuchipompelu chawiniKristu, wadiña ibwambu daYowanu wakeñeliyi chikupu, nawa diyi wasonekeleluwu mukanda, dichimwekalila izu dakwila nawu “eyi” dakutena muntu wumu.
2 Chineli mazu akutachika nachu kwimusha niakukumisha nachu adifwana namazu adi muYowanu Wamuchiyedi nawa nsoneki nadilumbululi yomweni nindi “ami mukulumpi,” hitwatela kujinokaku netu kapostolu Yowanu diyi wasonekeli iwu mukanda. (2 Yow. 1) Kufwanañana kwansañu ninhoshelu kwamwekeshaña nawu awusonekeleli muEfwesesa hela kwakwihi, mu 98 C.E., mpinji yasonekeliwu nyikanda yikwawu yiyedi. Muloña wakwihiha, ansoneki atachi hiyavulileña kusoneka nsañu yekalamuku, ilaña wawanikaña handandanda yatachi yaNyikanda yonenewa hamu nawaYowanu Wamuchiyedi.
3 Mumukanda windi Yowanu wamuhameka Gayusi hakutambwila amana kwetu endaña, nawa watena kukala kwadiña naDiyotefwesi kwakukeña kwikala muneni. Chinamwekani neyi Demeterusa atenawu diyi watwalili mukanda kudi Gayusi, nawa atela amutemesheli kudi Yowanu nawa wakeñekeleña kumutambwila kudi Gayusi halwendu lwindi, kwesekeja nachasonekeluwu hamukanda. Neyi chochitwamwiluka Gayusi, aDiyotefwesi niDemeterusa twayilukila hohu munsañu yitwatañaña muniwu mukanda. Hela chochu, iwu mukanda watulejaña nsañu yantesha yayiwahi yakudikunda kwawamana kwetu akumatuña ashiyashana mukachi kawiniKristu akusambila. Hakachi kayuma yikwawu, hadiña chaaku chakutambwila enyi endeleña “hansañu yejina” hela chakwila mwiniitala hayilukaku.—Vasi 7.
CHIWAWAHILA
5 Kapostolu Yowanu wemika chakutalilahu chakwikala nkoñi wamuwahi hakukwasha chipompelu kudikiña kuyuma yatama. Spiritu yakukeña niyakutambwila enyi yatandili muchipompelu ayihamekeli chikupu, nawa ateleleli kutwalekahu kwikala namuzañalu, kulonda amana kwawu amuchipompelu “nienyi” (antu abuliliwu kwiluka kudi eniKristu ayitambwilili) enjileña mukachi kawu ekali “akwakukalakala hamu nansañu yalala.” (Mavasi 5, 8) Hela chochu, Diyotefwesi wadiña namesu akudisamba, chuma chamutiyishaña Yehova kutama, nawa wadiwileña wunlomboli waNzambi, nikuhosha mazu atama hadi kapostolu Yowanu. (Yish. 6:16, 17) Wadiña nakukañesha chipompelu chawiniKristu kubula kutambwila enyi. Dichaletesheli Yowanu kuhosha hatooka nindi iyi yililu yatama nikuhakwilaku kukeña kwalala kwawiniKristu muchipompelu. Ninetu makonu twatela kwikala adikita hakwikala adizoza, nakwenda muchalala, nikumwekesha kukeña kwaNzambi nikuhana, kwesekeja nanshimbi yashimunayi Yowanu nindi: “Muntu welaña chachiwahi wakudi Nzambi. Muntu welaña chatama hanamoni Nzambuku.”—3 Yowanu 11.