Mukuloñesha kwetu hitwekala nawakulumpi achipompelu afwetañawuku. Ilaña neyi chochiyelileña muchipompelu chawakwaKristu hampinji yichatachikili, atondaña ankoñi ashikahu kulonda ‘abiñeña chachiwahi chipompelu chaNzambi.’ (Yililu 20:28) Awa amana kwetu apama kuspiritu alombolaña chipompelu nikuchibiña “bayi chakukanjikijaku, chiña nakutiya kuwaha mwaya muchima waNzambi; bayi nakulonda kuheta kwatamaku, chiña namuchima wakukeñamu.” (1 Petulu 5:1-3) Atuzatilaña nyidimwinyi?

Atwakamenaña nikutuhemba. Aeluda atufumbaña naNsona nikukwasha chipompelu kukundama kwakwihi naYehova. Eluka nawu Nzambi wayinka iwu mudimu walema, dichi aeluda hiyayuulaña antu jinduku, ilaña atuleñelaña kwikala namuzañalu. (2 Akorinda 1:24) Kufwana kabiña wakamenaña chikupu nyikoku yindi yejima, aeluda azataña nañovu kulonda eluki antu amuchipompelu hamuntu hamuntu.—Yishimu 27:23.

Atutañishaña chakwila mwaya muchima waNzambi. Mulungu nimulungu aeluda atutañishaña hakupompa kwachipompelu kulonda akoleshi chikuhwelelu chetu. (Yililu 15:32) Awa amana kwetu adihana alombolaña cheñi mumudimu wakushimwina, twazatilaña hamu nawu nawa atudizishaña njila jejima jakushimwinamu.

Atukoleshaña hamuntu hamuntu. Hakwila nawu atukwashi kukolesha wulunda wetu naYehova, enzaña kumataletu nakuhanjeka nanetu hela Hetala daWanta nakutukwasha nikutukundeja naNsona.—Yakoba 5:14, 15.

Kubombela hanyidimu yawu yamuchipompelu, aeluda amavulu azataña nyidimu yakumujimba niyamuchisaka yakeñekaña mpinji nikuyizata swayi. Twatelela kuyilemesha awa amana kwetu azataña nañovu.—1 Atesalonika 5:12, 13.

• Indi aeluda azataña nyidimwinyi muchipompelu?

• Munjilanyi aeluda mwamwekeshelañawu nawu atwakamenaña?

Bayibolu yashimuna mazanvu ayedi awamana kwetu akwaKristu azataña nyidimu yamuchipompelu, ‘atubiña niankoñi akuzatila.’ (Afwilipi 1:1) Kwekala aeluda niankoñi akuzatila amavulu akalakalaña muchipompelu. Nyidimwinyi yazatañawu ankoñi akuzatila yatuheteshaña?

Akwashaña izanvu dawaeluda. Ankoñi akuzatila, atwansi niakulumpi amakwawu akweti wulunda wawuwahi naYehova, ayikuhwelela nawa asha muchima kunyidimu yawu. Azataña nyidimu yalema yamuchipompelu niHetala daWanta yabula kukundama kumudimu wakutañisha nikubiña. Chumichi chayikwashaña aeluda kusha maana kukutañisha ninyidimu yakubiña.

Azataña nyidimu yayiwahi. Ankoñi akuzatila amakwawu ayinkaña mudimu wawukalama wakutambwila antu ejima anakwinza kukupompa. Amakwawu azataña mudimu wakwakamena yihoshelu, kuhana nyikanda, kuchinda mali achipompelu nimudimu wakwinka antu amuchipompelu maluña akushimwinamu. Akwashaña cheñi mudimu wakuwahisha Itala daWanta. Aeluda anateli kuyileja kulonda akwashuku atushinakaji. Ankoñi akuzatila adihanaña hakuzata nyidimu yejima yayinkañawu nawa antu ejima muchipompelu ayilemeshaña hanyidimu yawu yadikitañawu.—1 Timotewu 3:13.

Amwekeshaña yililu yayiwahi neyi amayala akwaKristu. Ankoñi akuzatila ayitondaña muloña wayililu yawu yayiwahi yawakwaKristu. Neyi anakuhana jimpanji hakupompa, akoleshaña chikuhwelelu chetu. Kuhitila mukumwekesha yililu yayiwahi mumudimu wakushimwina, atukwashaña kulonda tudikiteña chikupu. Hamuloña wakwila azatilaña hamu nawaeluda, aletaña muzañalu nikunuñañana. (Aefwesesa 4:16) Mukuhita kwampinji, niwena anateli kushikahu nakwikala aeluda.

• Indi ankoñi akuzatila hiyantu amuchidinyi?

• Indi ankoñi akuzatila akwashaña ñahi chipompelu kulonda chizateña chiwahi?

Nyikanda yawakwaKristu yachiGriki yatena aBaranaba nikapostolu Pawulu kakavulu. Awa amayala akalakeleña neyi ankoñi endaña, nawa ahempwileña yipompelu yatachi. Muloñadi? Adiña nakwakamena nankashi chihandilu chawamana kwawu akuspiritu. Pawulu wahosheli nindi wakeñeleña ‘kufunta nakuhempula hempula ana kwetu’ nakutala chashakamineñawu. Wadihanini kwenda jikilomita jajivulu kulonda yayi nakuyikolesha. (Yililu 15:36) Makonu ankoñi endaña afwilaña kwila chuma chochimu.

Enzaña nakutukolesha. Nkoñi wañinza wejima wahempulaña yipompelu 20 hela kubadikahu, wazataña mulungu wumu hachipompelu chimu kapampa kayedi hachaaka. Tunateli kuhetela chikupu muyuma yamonañawu awa amana kwetu muchihandilu chawu niañodi jawu neyi asumbula. Afwilaña nankashi kwiluka atwansi niakulumpi, nawa akeñaña kuya nanetu mumudimu wamwiha nikudi atudizi etu aBayibolu. Awa ankoñi abiñaña nyikoku nawaeluda, atukoleshaña, ahanaña cheñi jimpanji jakutukolesha hakupompa kwachipompelu nihakupompa kwamaneni.—Yililu 15:35.

Afwilaña kutwiluka wejima wetu. Ankoñi endaña akamenaña chikupu chinakuhandawu ana kwetu kuspiritu muyipompelu. Ahumañanaña nawaeluda niankoñi akuzatila nakuhituluka muyuma yazatiluwu chachiwahi nikuyileja njila jajiwahi jakuzatilamu nyidimu yawu. Akwashaña apayiniya kulonda akalakaleña chiwahi mumudimu wawu, nawa atiyaña kuwaha hakudiluka nawantu amaha nikutiya chiyanakuyilaku hambidi kuspiritu. Awa amana kwetu ejima adihanaña chikupu neyi ‘akwakukalakala hamu netu atukalakelaña.’ (2 Akorinda 8:23) Twatela kwimbujola chikuhwelelu chawu nichadihanawu kudi Nzambi.—Aheberu 13:7.

• Indi ankoñi añinza ahempwilañadi yipompelu?

• Munateli kuhetelamu ñahi neyi anayihempuli?

Neyi kunamwekani kukala, aYinsahu jaYehova akwashaña swayi-swayi ana kwawu anamoni kukala. Kuzata muniyi njila kwamwekeshaña nawu twadikeña chikupu nawakwetu. (Yowanu 13:34, 35; 1 Yowanu 3:17, 18) Twayikwashaña munjilanyi?

Twahanaña mali. Chelili muYudeya muholoki nzala yakapwelendendi, akwaKristu akusambila amuAntiyoki atemesheli mali akukwasha amana kwawu akuspiritu. (Yililu 11:27-30) Chochimu, neyi tutiya nawu amana kwetu mumatuña acheñi anakumona kukala, twayitemeshelaña mali kuhitila muchipompelu kulonda ayinki anakaankili yuma yinakukeñeka.​—2 Akorinda 8:13-15.

Twayikwashaña muyuma yakeñekaña. Aeluda adi mwiluña munamwekani kukala akeñakeñaña antu ejima amuchipompelu kulonda eluki nawu aYinsahu ejima adikoku nawa adi chiwahi. Kometi yakwashaña antu yatalaña mudimu wakwinka ana kwetu yakudya, menji akunwa, yakuvwala niyihemba. A Yinsahu amavulu eluka nyidimu yakeñekaña adihanaña kuzatisha mali awu nikuzataku mudimu wakukwasha antu adi mukukala hela kuwahisha matala anakisiki niMatala aWanta. Kunuñañana kutwadiluñishaña mukuloñesha niyuma yitwadizaña hakuzatila hamu yatuleñelaña kunyakala kupompesha yuma yinakukeñeka niakwakuzata neyi kudi kukala. Hela chakwila twakwashaña ‘akwakwitiya kwakukuhwelela,’ twakwashaña cheñi amakwawu neyi chinatwesheki chili etiya mukwitiya kwacheñi.​—Aŋalija 6:10.

Twayikundejaña nikuyikolesha nansona. Antu anakabakani nawubanji wadimwekenaña akeñaña kuyikundeja chikupu. Hampinji yamuchidiwu, Yehova “Nzambi wakukundeja kwejima” watukoleshaña. (2 Akorinda 1:3, 4) Twatiyaña kuwaha kuleja antu anakabakani yikaninu yamuBayibolu, nikuyilumbulwila netu Wanta waNzambi keña wufumishuhu kukala kwejima kwaletaña makabi.​—Chimwekeshu 21:4.

• Muloñadi aYinsahu chiyanyakelañawu kukwashana neyi kunamwekani wubanji wadimwekenaña?

• Kukundejanyi kwamunsona kutwatela kukundeja antu anapuluki?

Henohu wudi kwakwihi nakufwa, Yesu wahanjekeli nawatumbanji twindi aPetulu, Yakoba, Yowanu niAnderi kwankankawawu. Hampinji yashimwineñayi dehi Yesu chinjikijilu chakwinza kwindi mumafuku akukuminina, wehwili lwihu lwalema nindi: ‘Indi nduñu wamaana nikashinshi, anenkuwu kudi nkaka yindi mudimu wakuhemba mukala windi, akenkaña akwetala dindi yakudya yawu hayinkelañawu hayinkelañawu, hinyi?’ (Matewu 24:3, 45; Maku 13:3, 4) Yesu wayilejeleña atumbanji twindi nindi hakwikala “nkaka,” yawu wakatonda antu akatwalekahu kuloñeshela atumbanji twindi yakudya yakuspiritu mumafuku akukuminina. Indi iwu nduñu hinyi?

Hiizanvu danyanya dawatumbanji twaYesu awayishewa. “Nduñu” amwiluka nawu Hiizanvu Dalombolaña dawaYinsahu jaYehova. Nduñu wayinkaña akwawu akwakudifukula aYehova yakudya yakuspiritu hampinji yatelela. Twashindamena haniwu nduñu washinshika kulonda yatwinkeña ‘yakudya hampinji yatelela.’—Luka 12:42.

Wahembaña amwitala daNzambi. (1 Timotewu 3:15) Yesu wenkeli nduñu mudimu walema wakuhemba kuloñesha kwaYehova kwahanu hamaseki, kuhemba maheta akuloñesha kweniku, kulombola mudimu wakushimwina nikututañisha muyipompelu yetu. Hakwila nawu yatuloñesheli yuma yitwakeñaña nawa hampinji yitwayikeñaña, ‘nduñu wamaana nikashinshi’ wahanaña yakudya yakuspiritu kuhitila munyikanda yitwazatishaña mumudimu wetu wakushimwina, nimujimpanji jahanañawu hakupompa kwachipompelu nikwamaneni.

Nduñu washinshika muloña walondelaña nsañu yalala yamuBayibolu nawa washa muchima kumudimu wamwinkawu wakushimwina nsañu yayiwahi, nawa wukweti maana hakwakamena chiwahi yuma yaKristu yahamaseki. (Yililu 10:42) Yehova nakukokola antu amavulu kwikala aYinsahu jindi nawa nakukwasha nduñu wamaana nikashinshi kuloñesha yakudya yakuspiritu yayivulu.—Isaya 60:22; 65:13.

• Hinyi atondeluwu kudi Yesu kulonda adyisheña atumbanji twindi kuspiritu?

• Indi nduñu wukweti maana nikashinshi munjilanyi?

Kushankulu, izanvu danyanya, ‘dawaapostolu nawakulumpi amuYerusalema,’ dakalakeleña neyi izanvu dalombolaña nakufuukulahu yuma yalema muchipompelu chejima chawakwaKristu awayishewa. (Yililu 15:⁠2) Chuma chaleñeleli wonsu wawu kuditeja namuchima wumu, chafumini hakuhanjeka hayuma yamuNsona nikwovwahila wulomboli waspiritu yaNzambi. (Yililu 15:25) Nimakonu Izanvu Dalombolaña dalondelaña iyi njila.

Adizatishaña kudi Nzambi hakwila mwaya muchima windi. Amana kwetu awayishewa akalakalaña Mwizanvu Dalombolaña, asha muchima chikupu Hezu daNzambi nawa akuluka yitembi hama hakuzatisha yuma yakuspiritu. Ahumañanaña mulungu nimulungu nakuhanjeka yuma yinakaankiluwu amana kwetu mukaayi kejima. Neyi chochichadiña kushankulu, kufumba kwamuBayibolu akuloñeshaña kudi Izanvu Dalombolaña kuhitila munyikanda hela mudi ankoñi endaña niamakwawu. Chumichi chaleñela antu jaNzambi kunuñañana nikuzatila hamu. (Yililu 16:4, 5) Izanvu Dalombolaña datalaña mudimu wakuloñesha yakudya yakuspiritu, dakoleshaña ejima kulemesha mudimu wakushimwina Wanta nawa datalaña mudimu wakutonda amana kwetu akukalakala nyidimu.

Dalondelaña wunlomboli waspiritu yaNzambi. Izanvu Dalombolaña dakinka manuñu mudi Mwanta Wakuleña Kwejima, Yehova niMutu wachipompelu, Yesu kulonda ayilomboleña. (1 Akorinda 11:3; Aefwesesa 5:​23) Antu ekala munidi izanvu hiyadimonaña nawu hiyanyanta hadi antu jaNzambuku. Wena hamu nawakwaKristu awayishewa ‘amulondaña Mwana Kamukoku [Yesu] kwayañayi kwejima.’ (Chimwekeshu 14:⁠4) Izanvu Dalombolaña dasakililaña neyi tuyilombelelañaku hanyidimu yinakuzatawu.

• Anyi adiña mwizanvu dalombweleña kushankulu?

• Indi Izanvu Dalombolaña makonu dalondelaña ñahi wunlomboli waNzambi?

Beteli, izu dachiHeberu dalumbuluka nawu ‘Itala daNzambi.’ (Kutachika 28:17, 19) Idi hiijina datelela datenañawu matala azatishañawu aYinsahu jaYehova mukaayi kejima hakulombola mudimu wakushimwina. Izanvu Dalombolaña dakalakelaña hakasanji keneni kamukaayi muNew York State, United State of America, nawa datalaña mudimu wahatusanji twanyitayi mumatuña amavulu. Antu ejima akalakelaña hanawa matala ayitenaña nawu chisaka chaBeteli. Neyi chochekala muchisaka, ashakamaña nikuzatila hamu, kudiila hamu nikudizila Bayibolu hamu mukunuñañana.—Masamu 133:1.

Hiiluña dadimena nawa azatilañahu ekala neyi chisaka chadihana. Hamatala ejima ahaBeteli, hekala amayala niambanda akwaKristu adihana kwila mwaya muchima waNzambi nawa atwamijañaku yuma yaWanta mpinji yejima. (Matewu 6:33) Kwosi muntu watambulaña nfwetu, ilaña ejima ayinkaña yakudya nitupeka twakukamamu nawa ayinkaña kadali kakudikwasha nachu muyuma yakeñañawu. Muntu wejima haBeteli wukweti mudimu, chili wamukasanji, muchisambu hela mwitala dakudyila. Amakwawu azataña mudimu wakupulinta hela kukasa nyikanda, kukomba mutupeka twakukamamu, kukosa yakuvwala nikuwahisha yuma yikwawu.

Hiiluña hekala nyidimu yayivulu yakukwasha mudimu wakushimwina Wanta. Mudimu waweni wazatañawu haBeteli wakuloñeshela antu amavulu nsañu yalala yamuBayibolu. Ayinu buloshuwa hichakutalilahu chimu. Izanvu Dalombolaña dalombweli mudimu wakusoneka iyi buloshuwa, ayitemesheli kumazanvu awakwakubalumuna mukaayi kejima kuzatisha Intaneti, ayipulintili kuzatisha makina apulintaña nyikanda yayivulu nankashi hampinji yantesha hajiBeteli jajivulu, nawa ayitemesheli muyipompelu yakubadika 110,000. Muyuma yejimiyi, yisaka yaBeteli yakwashanaña nankashi munyidimu yejima yakushimwina nsañu yayiwahi.—Maku 13:10.

• Anyi akalakelaña haBeteli nawa ayakamenaña ñahi?

• Mudimwinyi wakeñekaña kuwuzata swayi wakalakalañawu hajiBeteli jejima?

Chisaka chaBeteli chazataña mumadipatimenti ambokamboka hakukwasha mudimu wakushimwina mwituña dimu hela mumatuña amavulu. Amakwawu azataña mudimu wakubalumuna, kupulinta magazini, kukasa nyikanda nimutupeka twakuhembela nyikanda, kukwata mazu hela kukopa mavidiyo nikwakamena yuma yikwawu yamwituña.

Komiti yaMutayi yatalaña nyidimu. Izanvu Dalombolaña dakujika nyidimu yazatañawu hatusanji twanyitayi kudi amamembala amuKomiti yaMutayi mwekala aeluda asatu hela kubadikahu ashikahu chikupu. Komiti yaMutayi yalejaña Izanvu Dalombolaña nyidimu chiyinakuyilaku hambidi mumaluña ejima ekala mumakasawu nikuyileja kukala kudi kwejima kunateli kumwekana. Iyi yileji yakwashaña Izanvu Dalombolaña kufuukulahu nsañu yatela kusonekawu munyikanda kumafuku akumbidi, nsañu yakupompa kwahachipompelu nihakupompa kwamaneni. Añimenu Ezanvu Dalombolaña ayitemeshaña hachaaka hachaaka hanyitayi nikuleja amembala aKomiti yaMutayi chakuzata nyidimu yawu. (Yishimu 11:14) Aloñeshaña progiramu yadimena nimpanji yahanañayi ñimenu wakasanji keneni yakukolesha antu ashakamaña mwiluña damutayi.

Akwashaña yipompelu mwituña dawu. Amana kwetu ashikahu azatilaña hakasanji kamutayi ekala cheñi namudimu wakuhana lusesa kulonda atuñi yipompelu yayiha. Amana kwetu cheñi atalaña nyidimu yazatañawu apayiniya, amishonali niankoñi añinza akalakelaña mwiluña damutayi wawu. Aloñeshaña cheñi kupompa kwañinza nikwankambi, kulombola mudimu wakutuña Matala aWanta amaha nawa atemeshaña nyikanda yinakukeñeka kuyipompelu. Nyidimu yejima yazatañawu hakasanji kamutayi yekala yakutwala mudimu wakushimwina hambidi.​—1 Akorinda 14:33, 40.

• Indi jikomiti jaMutayi jakwashaña ñahi Izanvu Dalombolaña?

• Nyidimwinyi yazatañawu hakasanji kamutayi?

Hakwila nawu tuzati nañovu hakushimwina ‘nsañu yayiwahi kunyuza yejima, kunyichidi yejima, nikumadimi ejima, nikumatuña ejima,’ twasonekaña nyikanda mumadimi akushika ku 750. (Chimwekeshu 14:6) Twazataña ñahi iwu mudimu wakala? Twawuzataña kuhitila muwukwashu wawansoneki akumatuña ejima nizanvu dawakwakubalumuna adihana, wejima wawu hiyaYinsahu jaYehova.

Nsañu asambilaña kuyisoneka muWundeli. Izanvu Dalombolaña datalaña mudimu waDipatimenti Yasonekaña hakasanji ketu keneni kamukaayi kejima. Iyi dipatimenti yalombolaña nyidimu yawansoneki akalakelaña hakasanji keneni nihatusanji twanyitayi yikwawu. Kwikala nawansoneki ambokamboka kwatukwashaña kusoneka nsañu yahoshaña hayisemwa yawantu ashiyashana yaleñelaña nyikanda yetu kukokola antu akumatuña ejima.

Akwakubalumuna ayitemeshelaña nsañu. Neyi anahituluki dehi munsañu yasonekawu nikuhimpa hanakukeñeka nakuyiteja, ayitemeshaña kumazanvu awakwakubalumuna amukaayi kejima kuzatisha Intaneti, abalumunaña nakuhituluka munsañu nikuyitaña cheñi. Afwilaña kutonda ‘mazu alala oloka’ anatweshi kulumbulula munatalishi nsañu yinasonekuwu muWundeli nakuyibalumuna mwidimi dawu.​—Mukwakutaŋisha 12:10.

Makompyuta aleñelaña mudimu kuzatika swayi. Kompyuta hiyinateli kusinsa hadi ansoneki hela akwakubalumunaku. Hela chochu, nyidimu yazatañawu yendaña swayi muloña wakuzatisha makompyuta. A Yinsahu jaYehova atuña progiramu yawu yatenañawu nawu Multilanguage Electronic Publishing System (MEPS) yazatishañawu hakwiñija nsañu yamumadimi amavulu nankashi, yikweti nyevulu kulonda ayipulinti.

Muloñadi wutwazatilaña nañovu hakubalumuna nsañu nimumadimi ahoshañawu antu antesha hohu? Muloña Yehova wakeñaña “antu ejima nindi ahandi, eluki nsañu yalala chikupu.”—1 Timotewu 2:3, 4.

• Indi nyikanda yetu ayisonekaña ñahi?

• Muloñadi wutwabalumwinaña nyikanda yetu mumadimi amavulu?

Kuloñesha kwetu kwasonekaña nikuhana maBayibolu ninyikanda yayivulu nankashi chaaka nichaaka chakubula kufwetesha. Twatuñaña nikuwahisha Matala aWanta nitusanji twanyitayi. Twakwashaña akaBeteli niamishonali amavulu nawa twakwashaña antu anakabakani nawubanji wadimwekenaña. Dichi munateli kwihula nenu ‘Indi awa mali afumaña kudihi?’

Hitwafweteshaña mali kulonda muntu yekali membala, kuhana yamwikumi hela kulombalomba maluku. Hela chakwila, mali akeñekaña hakukwasha mudimu wakushimwina ekala amavulu, hitwalombalombaña maluku. Hayaaka yayivulu yinahituhu magazini yamuchiyedi yaKaposhi Kakutalila kawundeli yahosheli nawu, twakuhwelela Yehova netu diyi watukwashaña, nawa “hitwakalomba hela kulembelela antu netu atukwashuku” nawa kanda tulombeñahu dehi!—Matewu 10:8.

Nyidimu yetu yakwashewaña nayawana yakudikeñela yitwahanaña. Antu amavulu alemesha chikupu mudimu wetu wakudizisha Bayibolu nawa ahanaña yawana. A Yinsahu aweni azañalalaña hakuzatisha mpinji yawu, ñovu, mali niyuma yikwawu hakwila mwaya muchima waNzambi hamaseki. (1 Kushindulula 29:9) Hamatala aWanta, hakupompa kwetu kwamanini nikwankambi hekalaña yikasha yawana nawa antu anakukeña kuhana yawana anateli kuhana. Hela anateli kuhana yawana kuzatisha webusayiti yetu, ya jw.org/lun. Antu avula kuhana mali hiyahetaku, adi neyi mumbanda wanfwila kazweñi wahamekeliyi Yesu wahanini tumali twanyanya tuyedi muchikasha chakuswekela mali hatembeli. (Luka 21:1-4) Dichi muntu wudi wejima nateli ‘kutenteka hambadi mali’ akuhana ‘kwesekeja nachinatoñojokiyi mumuchima windi.’—1 Akorinda 16:2; 2 Akorinda 9:7.

Tunakuhweleli netu Yehova wukutwalekahu kusañumuna nyichima yawantu anakukeña ‘kulemesha Yehova nayuma yawu’ hakukwasha mudimu waWanta kulonda yashikiji mwafuukulayi.—Yishimu 3:9.

• Yumanyi yaleñelaña kuloñesha kwetu kwikali kwambukaku nakwitiya kukwawu?

• Indi yawana yahanañawu chakudikeñela ayizatishaña ñahi?

Neyi mwomwatalisha ijina dakwila nawu Itala daWanta, nsañu yamuBayibolu yitwahanjekaña hanidi iluña yashindamena haWanta waNzambi, mutu wansañu yashimwinineñayi Yesu.​—Luka 8:⁠1.

Ekala matala akudifukwilamu kudifukula kwalala muchituñilu. A Yinsahu jaYehova azatishaña Matala aWanta ekala mwiluña dawu hakuya mumudimu wakushimwina. (Matewu 24:14) Matala aWanta ayituñaña chashiyashana nawa ekala ambokamboka mukutoha, ilaña ayituñaña chiwahi, nawa Mwitala daWanta dimu mwapompelaña yipompelu yayivulu. Hayaaka yantesha yinahituhu, twatuña Matala aWanta amaha amavulu (haavareji Matala aWanta atanu atuñewaña hefuku) kulonda akwakushimwina anakuvulilaku muyipompelu apompeleñamu. Twayituñaña ñahi?​—Matewu 19:⁠26.

Ayituñaña kuzatisha yawana yahanañawu Hamatala aWanta. Yawana yeniyi ayitemeshaña kukasanji kamutayi kulonda mali akayihani kuchipompelu chinakukeña kutuña hela kuwahisha Itala daWanta.

Ayituñaña kudi akwakuzata mukudikeñela akuyitachi yashiyashana. Mumatuña amavulu, mwekala Mazanvu Awakwakutuña Matala aWanta. Mazanvu awakwakutuña niakwakuzata mukudikeñela afumaña hachipompelu chimu nakuya hachikwawu munodu ituña, ayaña nikumaluña akwakulehi kulonda akwashi yipompelu kutuña Matala awu aWanta. Mumatuña amakwawu aYinsahu ashikahu alombolaña mudimu wakutuña nikuwahisha Matala aWanta amwiluña dayinkawu. Hela chakwila antu akuluka yitembi akumaluña acheñi adihanaña kuzata mudimu hamaluña ejima hatuñañawu, amana kwetu niahela amavulu amuchipompelu chenochu adihanaña hakuzata iwu mudimu. Spiritu yaYehova nichadihanañawu antu jindi namuchima wumu dichuma chaleñelaña iwu mudimu kwenda chiwahi.—Masamu 127:1; Akolosi 3:23.

• Muloñadi chitwatenenaña maluña etu akudifukwilamu netu Matala aWanta?

• Twatweshaña ñahi kutuña Matala aWanta mukaayi kejima?

Matala aWanta ejima awaYinsahu jaYehova emenañaku ijina dajila daNzambi. Dichi twamonaña netu kuhemba itala nawunyonji hakwila dimwekaneña chiwahi hikukooleka nawa hichuma chalema mukudifukula kwetu kwajila. Ejima anateli kuzata iwu mudimu.

Dihanenu kulonda muwahishuku hanyima yakupompa. Hanyima yakupompa kudi kwejima, amana kwetu niahela atiyaña kuwaha kuwahisha Mwitala daWanta. Kwekalaña cheñi kuwahisha chikupu Hetala daWanta mumulungu. Eluda hela nkoñi wakuzatila walombolaña iwu mudimu nikulondela ndandanda yayuma yinakukeñeka kuzatilahu. Kwesekana namudimu wunakukeñeka, amakwawu akombaña, kukolopa, kutotomona yitwamu, kutanjika chiwahi yitwamu, kuwahisha munyisalanyi, kuwahisha makalashi ahanjanina, kumwaña nswadi hela kuwahisha hanji. Nawa atanjika ifuku dimu hachaaka dakuwahisha chikupu Hetala daWanta. Twadizishaña anyanetu chakulemesha maluña etu akudifukwilamu neyi tuyinka nyidimu yakuzata.​—Mukwakutaŋisha 5:1.

Dihanenu kulonda muzatuku mudimu wakuwahisha Itala daWanta. Chaaka nichaaka kwekala kutalatala chikupu chinakumwekana Itala daWanta mukachi nihanji. Kushindamena haniyi yuma yatalatalañawu, chipompelu chekalaña namudimu wakuwahisha Itala daWanta mpinji yejima kulonda dimwekaneña chiwahi, kuchina kukisañana mali. (2 Kushindulula 24:13; 34:10) Twatela kudifukula kudi Nzambi yetu Mwitala daWanta dadiwahi nawa dawunyonji. Neyi tuzatañaku iwu mudimu, tukumwekesha netu twamukeña Yehova nawa twalemesha iluña detu dakudifukwilamu. (Masamu 122:1) Chumichi chaleñelaña antu amuchituñilu kutuhameka.—2 Akorinda 6:3.

• Muloñadi wutwatelela kusha muchima kwitala detu dakudifukwilamu?

• Yumanyi yatanjikawu yatukwashaña kuhemba Itala daWanta nawunyonji?

Komana munakukeña kusandujola kulonda mwiluki chikupu nsañu yamuBayibolu? Komana munakukeña kwiluka chikupu nsona yimu, muntu, iluña hela chuma chatenawu muBayibolu? Tahindi mwadihulahu dehi neyi chakwila Izu daNzambi dinateli kuyikwasha muyuma yimwakamenaña? Dichi mwatela kuzatisha layibulali yaHetala daWanta.

Yikweti yozelu yinateli kutukwasha kusandujola. Hadaha himukweti nyikanda yejima yashindamena haBayibolu yawaYinsahu jaYehova yekala mwidimi denuku. Ilaña mulayibulali yaHetala daWanta mwekalaña nyikanda yayiha yayivulu. Mwekala cheñi maBayibolu ashiyashana, dikishonali yayiwahi ninyikanda yikwawu yayiwahi. Munateli kuzatisha iyi nyikanda yekala mulayibulali henohu kanda mutachiki kupompa hela hanyima yakupompa. Neyi mudi kompyuta hadaha hekala niWatchtower Library. Iyi hiprogiramu yahakompyuta yekala nanyikanda yetu yayivulu yinateli kuyikwasha kusandujola nsañu swayi, izu hela nsona.

Yakwashaña atudizi amuChihandilu niMudimu. Munateli kuzatisha nyikanda yekala mulayibulali yaHetala daWanta hakuloñesha mpanji jenu. Nkoñi waKupompa kwaChihandilu niMudimu diyi enkawu mudimu wakutala layibulali. munateli kuzatisha nyikanda yekala mulayibulali yaHetala daWanta hakuloñesha mpanji jenu. Nkoñi washikola diyi enkawu mudimu wakutala layibulali. Diyi watalaña mudimu wakushamu nyikanda yayiha nikwiluka chikupu nindi yakutenteka chiwahi. Nkoñi washikola hela muntu wayidizishaña Bayibolu nateli kuyileja chakuwana nsañu yimunakukeña. Hela chochu, himwatela kusenda nyikanda yamulayibulali yaHetala daWantaku. Cheñi nawa twatela kuhemba chiwahi nyikanda nawa hitwatela kusonekamuku.

Bayibolu yalumbululaña nawu hakwila ‘tumwiluki Nzambi’ twatela kusandujola “yuma yalema yaswekawu dehi.” (Yishimu 2:1-5) Layibulali yaHetala daWanta yatela kuyikwasha kusandujola.

• Yozelwinyi yakuzatisha hakusandujola yekala mulayibulali yaHetala daWanta?

• Hinyi watela kuyikwasha hakuzatisha layibulali?

Yesu Kristu wayilejeli atumbanji twindi nindi: “Chejeji chenu chitoñekaña kumesu awantu, kulonda amonaña nyidimu yenu yayiwahi, alemeshaña Tata yenu wudi mwiwulu.” (Matewu 5:​16) Dimuloña wutwazatishilaña chiwahi yozelu yinakutuñatuñawu makonu kushilahu niIntaneti. Nsañu yayivulu yahosha hayuma yitwakuhwelela ninyidimu yazatañawu aYinsahu jaYehova yekala hawebusayiti yetu, jw.org. Nsañwinyi yimunateli kuwanahu?

Ñakwilu yamuBayibolu katalisha hamalwihu avula kwihulawu. Munateli kuwana ñakwilu yamalwihu asweja kulema avula kwihulawu antu. Chakutalilaku, tilakiti yaMakabi Amba Kamana? niAfu Amba Kahanda? yidi haIntaneti mumadimi akubadika 600. Munateli cheñi kuwana Bayibolu yaNew World Translation mumadimi akubadika 130, ninyikanda yayivulu yatukwashaña kudiza Bayibolu, kushilahu nimukanda waChumanyi Chacheni Chatañishaña Bayibolu? nimagazini amaha aKaposhi Kakutalila niAwake! Nyikanda yayivulu yeniyi munateli kuyitañila haIntaneti hela kutiyilila hela kuloñolola muyitapu yidi neyi MP3, PDF, hela EPUB haIntaneti. Munateli kupulinta yipapilu yantesha yamwidimi datiyañayi muntu wukweti mpwila nakumwinka. Hadi cheñi nyikanda yidi mujividiyo mumadimi amavulu awatumama. Munateli kuloñolola haIntaneti yimwenu yakutaña Bayibolu, yimwenu yaBayibolu nitumina twatuwahi twakutiyililaku hampinji yakunooka.

Nsañu yalala yahosha hadi aYinsahu jaYehova. Ashañahu cheñi nsañu yayiha nitumavidiyo twatwihi tunakuhosha hamudimu wetu wamukaayi kejima, yuma yinakumwekana yakundama hadi aYinsahu jaYehova ninyidimu yitwazataña hakukwasha antu adi mulukadi. Munateli kuwana nsañu yinakuhosha hakupompa kwankambi ninsañu yinateli kuyikwasha kuhanjeka natusanji twetu twanyitayi.

Twatoñekaña chejeji chansañu yalala mumaluña akwakulehi ahamaseki kuhitila mukuzatisha yozelu yeniyi. Antu akumatuña ejima kushilahu nikwituña daAntarctica anakuhetelamu. Tunakulomba netu ‘izu daYehova dendi lufuchi,’ mukaayi kejima kulonda kumulemesha Nzambi.​—2 Atesalonika 3:⁠1.

• Indi jw.org yakwashaña ñahi antu amavulu kudiza nsañu yalala yamuBayibolu?

• Yumanyi yimukukeña kudiza hawebusayiti yetu?