1-3. Malwihwinyi ehulañawu antu hansañu yakufwa nawa nsakililu yikwawu yakulaña ñahi awa malwihu?

BAYIBOLU yatushiika nawu ifuku dimu “kufwa hikwakekalaku cheñiku.” (Chimwekeshu 21:4) MuKapetulu 5, twadizili nawu ifutu danyiloña datukwashaña kwikala nawumi wahaya nyaaka. Ilaña antu achidi kufwa. (Mukwakutañisha 9:5) Dichi, twehulaña netu, Twayaña kudihi neyi tunafwi?

² Ñakwilu yanilu lwihu yalema sweje-e neyi muntu itwakeña nafwi. Tunateli kwihula netu: ‘Nayi kudihi? Nakutumona? Nateli kutukwasha? Twakamumona cheñi?’

³ Nsakililu yayivulu yakulaña awa malwihu munjila yashiyashana. Antu amakwawu atañishaña nawu neyi welaña yuma yayiwahi, wukuya mwiwulu nawa neyi welaña yuma yatama wukuya muhelu. Amakwawu ahoshaña nawu neyi wufwa wukwikala spiritu nawa wukushakamaña nawantaña jeyi afwa dehi. Amakwawu niwena ahoshaña nawu neyi wunafwi nawa anakusompeshi dehi, wukuvwalika cheñi hela kusañuka namujimba wacheñi, hadaha wukwikala muntu wacheñi hela kanyama.

4. Yumanyi yatañishaña nsakililu hansañu yakufwa?

⁴ Nsakililu yatañishaña yuma yambukaku chikupu. Ilaña ejima wawu atañishaña yuma yoyimu. Atañishaña nawu neyi muntu nafwi, chuma chimu chatwalekañahu kuhanda. Komana atañishaña mwalala?

TWAYAÑA KUDIHI NEYI TUNAFWI?

5, 6. Chumanyi chatumwekenaña neyi tunafwi?

⁵ Yehova weluka chuma chatumwekenaña neyi tunafwi nawa watulejaña nindi neyi muntu nafwi, hekalaña nawumiku. Kufwa hikubula wumi. Dichi neyi muntu nafwi, chatiyañayi niyitoñojoka yindi hiyatwalekañahu nakushakama kudi kwejimaku.a Neyi tunafwi hitwamonaña, kutiya hela kutoñojokaku.

⁶ Mwanta Solomoni wasonekeli nindi, “afu hiyeluka chumaku.” Muntu neyi nafwi hanateli kukeña hela kuhela muntuku nawa “Mwijamu mukuyayi mwosi mudimu, mwosi kufuukula, mwosi kwiluka, mwosi maana.” (Tañenu Mukwakutañisha 9:5, 6, 10.) Nawa haMasamu 146:4, Bayibolu yatulejaña nawu neyi muntu nafwi, “mwafuukulayi” mwakisikaña.

CHAHOSHELIYI YESU HANSAÑU YAKUFWA

7. Yumanyi yahosheliyi Yesu hansañu yakufwa?

⁷ Chafwiliyi ibwambu dindi Lazaru wakeñeliyi, Yesu walejeli atumbanji twindi nindi: “Ibwambu detu Lazaru nakaami mutulu.” Ilaña Yesu hatalishili mukwila nindi Lazaru nakunookaku. Yesu wahosheli nindi: “Lazaru nafwi.” (Yowanu 11:11-14) Dichi Yesu wesekejeli kufwa natulu. Hahosheli nindi Lazaru wudi mwiwulu hela nindi wudi nawantaña jindi afwa dehiku. Nawa hahosheli nindi Lazaru nakukabakana muhelu hela nindi navwalikili cheñi mumuntu wacheñi hela kanyamaku. Chadiña neyi Lazaru wakaamini mutulu twatweni. Nsona yikwawu yesekeja kufwa nakukaama mutulu twatweni. Bayibolu yahosha nawu chamujahiliwu Stefwanu “wakaamini tulu twakufwa.” (Yilwilu 7:60) Kapostolu Pawulu niyena wasonekeli nindi akwaKristu amakwawu “anakaami dehi mutulu twakufwa.”—1 Akorinda 15:6.

8. Tuneluki ñahi netu Nzambi haleñeli antu nindi afweñaku?

⁸ Komana Nzambi wayileñeli Adama naEva nindi mukuhita kwampinji akafwi? Inehi. Yehova wayileñeli nindi akashakameña haya nyaaka chadi kukata. Yehova chaleñeliyi antu, wayileñeli nampwila yakushakama haya nyaaka. (Mukwakutañisha 3:11) Anvwali akeñaña wanyi anyanawu nawu akashinakaji nakufwa nawa Yehova dichatiyañayi hadetu. Hanu dinu neyi Nzambi watuleñeli nindi tushakameña haya nyaaka, muloñadi chitwafwilaña?

MULOÑADI CHITWAFWILAÑA?

9. Muloñadi lushimbi lwayinkeliyi Yehova Adama naEva chilwapeleleli?

⁹ Mwitempa daEdeni, Yehova wamulejeli Adama nindi: ‘Nyitondu yamwitempa yejima wukuda tuhu; ilaña mutondu wakwiluka nachu niyayiwahi niyatama eyi bayi wakawidaku; muloña ifuku diwakada chalala wakafwa.’ (Kutachika 2:9, 16, 17) Ilu lushimbi hilwadiña lwakala kwovwahilaku,Yehova wadiña nawuswa wakuyileja Adama naEva yuma yayiwahi niyatama. Neyi amwovwahilili Yehova, adi kumwekesha nawa alemesha chiyuulu chindi. Adi kumwekesha cheñi nawu ahamekaña hayuma yejima yayinkeliyi

10, 11. (a) Satana wayidimbili ñahi Adama naEva? (b) Muloñadi Adama naEva chiyatela kubula kuleyela hachuma cheliliwu?

¹⁰ Chawushona, Adama naEva atondelihu kudikaña naYehova. Satana wamwihwili Eva nindi: ‘Chalala Nzambi nahoshi nindi, nyitondu yejima yamwitempa bayi mwakayidaku?’ Eva wakwili nindi: ‘Nyikabu yanyitondu yamwitempa tukutwesha kuda tuhu, hakwinza nyikabu yamutondu wekala mukachi ketempa, Nzambi nahoshi nindi, Bayi mwakayidaku, hela kukwataku nehi, mwakenda kafwa.’—Kutachika 3:1-3.

¹¹ Kuhiñahu Satana wahosheli nindi: ‘Chalala, himwakafwaku; muloña Nzambi neluki nindi ifuku dimwakada, mesu enu akatona, mwakekala neyi chadiyi Nzambi, mwakeluka yayiwahi niyatama.’ (Kutachika 3:4-6) Satana wakeñeleña Eva yatoñojoki nindi watela kudifuukwila yuma yayiwahi niyatama. Hampinji yoyimu, watwambili hachuma chadi kumwekana neyi Eva yadikaña. Satana wahosheli nindi Eva wukufwa wanyi, dichi Eva wadiili nyikabu kuhiñahu wamwinkelihu nfumwindi. Adama naEva elukili nawu Yehova wayilejeli nindi bayi ada kumukabuku. Chadiiliwu, adikañili nalushimbi lwapela nawa lwaluwahi. Chadiiliwu, amwekesheli nawu alemesheli wanyi kukeña kwaTata yawu wamwiwulu. Kwosi mwakuleyela nachuma cheliliwu.

12. Tukuhosheladi netu kudikaña kwaAdama naEva kwamuneñesheli Yehova?

¹² Anvwali jetu atachi amuneñesheli Nleñi yawu chabuliliwu kumulemesha. Mukutiya ñahi neyi mwazatili nañovu kukulishi mwanenu weyala niwamumbanda ilaña adikaña nawa hiyakwila yuma yimunabuli kuyileja? Komana chikuyikata wanyi kumuchima?

13. Yehova watwalili mudihi chahosheliyi nindi “wakafunta cheñi mwomulunkuñu”?

¹³ Chadikañiliwu, Adama naEva hiyadiña nakukooleka cheñi kwakushakama haya nyaakaku. Yehova wamulejeli Adama nindi: “Muloña eyi wulunkuñu, nochu wakafunta cheñi mwomulunkuñu.” (Tañenu Kutachika 3:19.) Dikwila nawu Adama wadi kwikala lunkuñu cheñi, neyi kwiji hiyamuleñeliku. (Kutachika 2:7) Chelili Adama navulumuni dehi, wafwili hekaliliku nawa cheñiku.

14. Muloñadi chitwafwilaña?

¹⁴ Neyi Adama naEva amwovwahilili Nzambi, adi kwikala amomi niyinu mpinji. Ilaña chadikañiliwu nindi, avulumwini, nkumininaku afwili. Nshidi yidi neyi musoñu watama wutwaswana kudi anvwali jetu atachi. Ejima wetu twavwalikaña nanshidi, dichitwafwilaña. (Aroma 5:12) Ilaña Nzambi hakeñeleña nindi antu afweñaku. Nzambi haleñeli antu nindi afweñaku nawa Bayibolu yatenaña kufwa nawu “chilumbu.”—1 Akorinda 15:26.

CHALALA CHATUFUMISHAÑA MUWUDUÑU

15. Kwiluka chalala kutalisha hansañu yakufwa kwatufumishaña ñahi muwuduñu?

¹⁵ Neyi twiluka chalala kutalisha hansañu yakufwa, tukufuma muwuduñu wansañu yayivulu yakutwamba. Bayibolu yatulejaña nawu afu hiyatiyaña kukata hela chineñiku. Kwila tuhosha nawu nehi nawa kwila ahosha nanetu nehi. Kwila tuyikwasha afu nehi nawa afu kwila atukwasha nehi. Kwila atukatisha nehi, dichi hitwatela kuyichinaku. Hela chochu, nsakililu yayivulu yahoshaña nawu afu ashakamaña kwacheñi nawa ahoshaña nawu tunateli kuyikwasha neyi tuhana mali kudi atupristu hela antu amonañawu nawu ajila. Ilaña neyi twiluka chalala kutalisha hansañu yakufwa, kwila atudimba nehi.

16. Nsañwinyi yakutwamba yahoshaña nsakililu yayivulu kutalisha hadi afu?

¹⁶ Satana wazatishaña nsakililu yakutwamba kulonda yatudimbi nawa tutoñojokeña netu afu achidi amomi. Chakutalilahu, nsakililu yikwawu yalejaña antu nawu neyi tunafwi, kudi chuma chafumaña mudetu chatwalekañahu kuhanda kwacheñi. Komana nsakililu yenu yalejaña antu nsañu yamuchidiwu tahindi yashimunaña yuma yahosha Bayibolu hadi afu? Satana wadimbaña antu kulonda abuli kumwiluka Yehova.

17. Muloñadi nsañu yakwocha antu muhelu chiyekalila yakumusupisha Yehova?

¹⁷ Yuma yatañishaña nsakililu yayivulu yakuhayamisha. Chakutalilahu, amakwawu atañishaña nawu antu atama akayocha muhelu haya nyaaka. Kutwamba kwamuchidiwu hikumusupisha Yehova. Nzambi kwila yakabisha antu nehi. (Tañenu 1 Yowanu 4:8) Mukutiya ñahi neyi mumona muntu nakubabesha mwanindi kuhitila mukwocha chikasa chamwanindi mukesi? Mukuhosha nenu muntu wamuchidiwu himbanji. Mukukeña nikumwiluka wanyi. Satana niyena wakeñaña nindi tumumoneña Yehova netu watama.

18. Muloñadi chitukubulila kuchina afu?

¹⁸ Nsakililu yikwawu yahoshaña nawu neyi antu anafwi, abalumukaña nakwikala aspiritu. Nsakililu yamuchidiwu yalejaña antu nawu twatela kulemesha nikuchina awa aspiritu muloña anateli kwikala amabwambu jetu añovu hela ayilumbu jetu atama chikupu. Antu amavulu etejaña iyi nsañu yakutwamba. Achinaña afu, dichi adifukulaña kudi afu chatela adifukuleña kudi Yehova. Anukenu nenu afu hiyatiyaña hela kumona chuma chidi chejimaku, dichi hitwatela kuyichinaku. Yehova diyi Nleñi yetu. HiNzambi walala nawa twatela kudifukula hohu kudi yena.—Chimwekeshu 4:11.

19. Kwiluka chalala kutalisha hansañu yakufwa kwatukwashaña ñahi?

¹⁹ Neyi twiluka chalala kutalisha hansañu yakufwa, akwansakililu akutudimbaña wanyi. Ichi chalala chatukwashaña kwiluka yuma yashiikayi Yehova kutalisha hachihandilu chetu niyuma yakumbidi.

20. Yumanyi yitwakadiza mukapetulu kanalondelihu?

²⁰ Kunyima, kambuña Nzambi Yoba wehwili nindi: ‘Neyi muntu nafwi, wakahanda cheñi?’ (Yoba 14:14) Komana muntu wunafwi nateli kuhanda cheñi? Ñakwilu yatulejañayi Nzambi yekala muBayibolu yayiwahi chikupu. Tukahanjeka haniyi ñakwilu mukapetulu kanalondelihu.

1-3. Kaleyanyi kitwekalamu wejima wetu, nawa Yehova wakatufumishamu ñahi?

FWIKIJENU anayikasi mukaleya yaaka yayivulu hamuloña wumwabulili kwila. Himunakutoñojokahu nenu akayifumishamuku. Ñovu yinayimani nawa kwosi chuma chimukwila. Ilaña kukashimuka, kwinza nimuntu wudi nañovu yakuyifumisha mukaleya nawa yayishiika nikuyishiika nindi wukuyifumisha. Mukutiya ñahi?

² Wejima wetu twekala mukaleya kakufwa. Kwakutemukila kwosi hela tukulwisha chamuchidinyi. Ilaña Yehova wukweti ñovu yakutupulwisha kukufwa. Nawa washiika nindi “chilumbu wakukumishaku, dikwila nawu kufwa, akamujilumuna.”—1 Akorinda 15:26.

³ Toñojokenu hamuzañalu wumwakatiya hampinji yimwakabulaña kudakamena nenu mwakafwa. Yehova hakafumishahu hohu kufwaku. Wakasañula cheñi niantu afwa dehi. Toñojokenu chakekala chihandilu. Washiika nindi “afu” akekala nawumi cheñi. (Isaya 26:19) Chumichi dichatenawu muBayibolu nawu kusañuka.

NEYI MUNTU ITWAKEÑA NAFWI

4. (a) Chumanyi chinateli kutukundeja neyi ntaña yetu hela ibwambu detu nafwi? (b) Anyi adiña amabwambu jaYesu chikupu?

⁴ Neyi ntaña yetu hela ibwambu detu nafwi, chineñi chitwatiyaña chakalaña kuumika. Ñovu yamanaña. Kwosi chuma chitunateli kwila kulonda tumusañuli. Ilaña Bayibolu yatukundejaña. (Tañenu 2 Akorinda 1:3, 4.) Tushinshikenu hadi muntu wumu wasañwiliwu kulonda twiluki Yehova niYesu chinakukeñawu chikupu kusañula antu itwakeña. Hampinji yadiñayi Yesu hamaseki, wayileña nakumuhempula Lazaru niahelindi, aMata naMariya. Wejima wawu asatu adiña amabwambu jaYesu chikupu. Bayibolu yahoshaña nawu: “Yesu wayikeñeli nankashi aMata, Mariya niLazaru.” Ilaña ifuku dimu, Lazaru wafwili.—Yowanu 11:3-5.

5, 6. (a) Chumanyi cheliliyi Yesu chamweniyi ataña jaLazaru niamabwambu jindi ananeñi? (b) Chatiyiliyi Yesu hansañu yakufwa chatukundejaña ñahi?

⁵ Yesu wayili nakuyikundeja aMata naMariya. Mata chelukiliyi nindi Yesu nakwinza, wayili hanji yamusumba nakumukinkilila. Watiyili kuwaha chamumweniyi Yesu, ilaña wamulejeli nindi: “Neyi wadiña kunu, mutenowu manakwami hadi kufwaku.” Mata watoñojokeli nindi Yesu wenjili mukulaba. Kuhiñahu, Yesu wamweni muhelindi, Mariya, nakudila. Chayimweniyi anakudila, waneñeli nawa wadilili. (Yowanu 11:21, 33, 35) Watiyili wushona waweni wutwatiyaña neyi muntu itwakeña nafwi.

⁶ Chatukundejaña hakwiluka netu Yesu watiyaña wushona wutwatiyaña neyi muntu itwakeña nafwi. Yesu wekala tuhu neyi Tata yindi. (Yowanu 14:9) Yehova wukweti ñovu yakufumishahu kufwa haya nyaaka nawa katataka tuhu yakwifumishihu.

“LAZARU, IDIKAKUMU!”

7, 8. Muloñadi Mata chakaaniniyi kufumisha ilola kwiijamu daLazaru, Yesu welili ñahi?

⁷ Yesu chashikiliyi kwijamu kwakamikiliwu mujimba waLazaru, wawanini kuchisu anashiku ilola deneni. Yesu wahosheli nindi: “Dilañumunenuku ilola.” Ilaña Mata hakeñeleña nindi adifumishikuku. Mujimba waLazaru washakamini mafuku awana mwiijamu. (Yowanu 11:39) Welukili wanyi chuma chakeñeleña kwilayi Yesu kulonda yamukwashi manakwindi.

⁸ Yesu wamwilili Lazaru nindi: “Idikakumu!” Chuma chamweniwu aMata naMariya chayihayamishili chikupu. “Muntu wafwili wedikilimu iku nyendu yindi nimakasa indi anayijiñili mumahina.” (Yowanu 11:43, 44) Lazaru amusañwili! Wafuntili cheñi kudi antaña niamabwambu jindi. Amukumbatili, kumukwata nikuhosha nindi. Ichi chadiña chihayamisha. Yesu wamusañwili Lazaru.

“EYI KANSI WAMUMBANDA, NAKULEJI NAMI, HINDUKAKU!”

9, 10. (a) Hinyi wamwinkeli Yesu ñovu yakusañula antu? (b) Muloñadi nsañu yakusañuka chiyalemena kudi etu?

⁹ Komana Yesu wasañwileña antu nañovu jindi? Inehi. Henohu kanda yamusañuli Lazaru, Yesu walombeli kudi Yehova nawa wamwinkeli ñovu yakumusañula Lazaru. (Tañenu Yowanu 11:41, 42.) Lazaru hidiyi hohu asañwiliwuku. Bayibolu yahoshaña hadi kansi wamumbanda wayaaka 12 wakatili nankashi. Tata yindi Jayirusa waneñeli nawa wamulembeleleli Yesu nindi yamuukili mwanindi. Diyi mwana wadiñayi nindi hohu. Chahosheleñayi naYesu, kwenjili amayala nakumuleja nawu: “Mwaneyi wamumbanda nafwi dehi! Muloñadi chiwunakumukabishila Ntañishi?” Yesu wamulejeli Jayirusa nindi: “Bayi wutiya womaku, ikalaku hohu nachikuhwelelu.” Kuhiñahu wayili naJayirusa kwitala dindi. Chashikiliwu kwakwihi netala, Yesu wamweni nikutiya antu anakudila. Yesu wayilejeli nindi: “Lekenu kudila, muloña nafwi wanyi, wudi mutulu.” Atata yindi niamama yindi atela elukili wanyi mwatalishiliyi Yesu. Yesu walejeli antu ejima kufuma mwitala nawa walejeli atata yindi niamama yindi kwiñila mukapeka mwakamini kansi wamumbanda. Yesu wamukwatili kuchikasa nakuhosha nindi: “Eyi kansi wamumbanda, nakuleji nami, hindukaku!” Anvwali jindi atiyili muzañalu chelili yahinduki nakutachika kwenda. Yesu wamusañwili mwanawu. (Maku 5:22-24, 35-42; Luka 8:49-56) Kufuma dina ifuku, neyi amona mwanawu anukileña yuma yayikoñeleleliyi Yehova kuhitila mudi Yesu.a

¹⁰ Antu asañwiliyi Yesu afwili cheñi. Ilaña iyi nsañu yalema muloña yatukwashaña kutalila yuma yakumbidi. Yehova wakeñaña kusañula antu nawa wakayisañula.

YUMA YITWADIZILAÑA KUNSAÑU YAKUSAÑUKA

11. Mukwakutañisha 9:5 yatudizishañadi hadi Lazaru?

¹¹ Bayibolu yalumbulula nawu “afu hiyeluka chumaku.” Dichadiñayi niLazaru. (Mukwakutañisha 9:5) Neyi chochahosheliyi Yesu, chadiña tuhu neyi Lazaru wadiña mutulu. (Yowanu 11:11) Hampinji yadiñayi mwijamu, Lazaru helukilihu “chumaku.”

12. Tuneluki ñahi netu Lazaru mwalala amusañwili?

¹² Antu amavulu amumweni Yesu chamusañwiliyi Lazaru. Niayilumbu jaYesu elukili nawu diyi wakoñeli ichi chihayamisha. Lazaru wekalili wamumi nawa chumichi chamwekesheli nawu mwalala amusañwili. (Yowanu 11:47) Cheñi, antu amavulu ayili nakumuhempula Lazaru, nawa atachikili kwiteja nawu Yesu amutemesheli kudi Nzambi. Ayilumbu jaYesu atiyili kutama, dichi akeñeleña kuyijaha aYesu naLazaru.—Yowanu 11:53; 12:9-11.

13. Muloñadi chitukukuhwelela netu mwalala Yehova wakasañula afu?

¹³ Yesu wahosheli nindi “antu ejima adi mumajamu achanukishu” akayisañula. (Yowanu 5:28) Chumichi chinakumwekesha nawu antu ejima anukañayi Yehova wakayisañula. Ilaña hakwila nawu muntu amusañuli, Yehova watela kwanuka yuma yejima yakoñeliyi owu muntu. Nateli kwanuka yuma yejima? Mwiwulu mwekala tutumbwa twatuvulu nankashi. Bayibolu yahoshaña nawu Yehova weluka majina atutumbwa twejima. (Tañenu Isaya 40:26.) Neyi wanukaña majina atutumbwa twejima dikwila nawu watela kwanuka yuma yejima yakoñeleña antu akasañulayi. Chineli Yehova diyi waleñeli yuma yejima, tuneluki netu wukweti ñovu yakusañula antu.

14, 15. Mazu aYoba atudizishañadi kutalisha hakusañuka?

¹⁴ Yoba iyala washinshika welukili nindi kwakekala kusañuka. Wehwili nindi: ‘Neyi muntu nafwi, wakahanda cheñi?’ Kuhiñahu wahosheli naYehova nindi: ‘Wakatambika, ami naketiya; wunafwili mudimu wakumakaseyi.’ Yoba welukili nindi Yehova nakuhembelela mpinji yakasañulayi afu.—Yoba 14:13-15.

¹⁵ Mwatiyaña ñahi nansañu yakusañuka? Munateli kudihula nenu, ‘Indi ataña jami niamabwambu jami afwa dehi niwena akayisañula?’ Twakolaña chikupu neyi twiluka netu Yehova nakukeña kusañula afu. Tutalenu chashimuna Bayibolu kwakashakamañawu niantu akasañulawu.

“AKATIYA IZU DINDI NAKUFUMAMU”

16. Antu akasañulawu nakushakama hamaseki akashakamaña ñahi?

¹⁶ Kunyima, antu asañwiliwu atachikili kushakama cheñi nawantaña niamabwambu jawu hamaseki. Chumichi chikamwekana cheñi kumbidi nawa chakawaha nankashi. Muloñadi? Muloña antu akasañulawu nakushakama hamaseki akashakama haya nyaaka nawa hiyakafwa cheñiku. Nawa akashakama mukaayi kambukaku chikupu nakaayi kitunakushakamamu makonu. Kwakekala kwosi njita, wubanji nikukata.

17. Anyi akasañulawu?

¹⁷ Anyi akasañulawu? Yesu wahosheli nindi “ejima adi mumajamu achanukishu akatiya izu dindi nakufumamu.” (Yowanu 5:28, 29) Chimwekeshu 20:13 yatulejaña nawu: “Kaluñalwiji kalubwili afu adiñamu, kufwa niIjamu nijena jalubwili afu adiñamu.” Mwamweni, antu amavulu akekala cheñi nawumi. Kapostolu Pawulu niyena wahosheli nindi ‘antu aloña niabula kuloña’ akayisañula (Tañenu Yilwilu 24:15.) Iyi nsañu yinatalishi mudihi?

18. Anyi “aloña” akasañulawu?

¹⁸ Hakachi ‘kawantu aloña’ hadi ambuña Yehova adiñaku henohu Yesu kanda yenzi hamaseki. Antu adi neyi Nowa, Abarahama, Sara, Mosi, Luti niEsita akayisañula nakushakama hamaseki. Munateli kutaña nsañu yanawa amayala nawambanda muAheberu kapetulu 11. Indi ambuña Yehova ashinshika anakufwa makonu? Niwena “aloña” dichi akayisañula.

19. Anyi ‘abula kuloña’? Yehova wakayinka kukoolekanyi?

¹⁹ Hakachi kawantu ‘abula kuloña’ hadi antu amavulu abulili kukooleka kwakudiza hadi Yehova. Hela chakwila afwa, Yehova wayanukaña. Wakayisañula nawa akekala nakukooleka kwakudiza hadi yena nikumukalakela.

20. Muloñadi antu amakwawu chiyakabula kuyisañwilawu?

²⁰ Komana chumichi chinayi mukwila nawu antu ejima afwa dehi akayisañula? Inehi. Yesu wahosheli nindi antu amakwawu akayisañula wanyi. (Luka 12:5) Hinyi wakatondaña antu akasañulawu niakabula kusañulawu? Yehova diyi Nsompeshi wakukumishaku, ilaña wamwinka Yesu wuswa ‘wakusompesha antu amomi niafu.’ (Yilwilu 10:42) Antu akawanawu nawu atama nawa abulaña kukeña kuhimpa akayisañula wanyi.—Talenu Mazu Adi Kunsa 19.

KUSAÑUKA KWAKUYA MWIWULU

21, 22. (a) Kusañuka kwakuya mwiwulu kwatalisha mudihi? (b) Hinyi wasambililiwu kusañula nawumi wamwiwulu?

²¹ Bayibolu yatulejaña cheñi nawu antu amakwawu akashakama mwiwulu. Neyi muntu anamusañuli kulonda yayi mwiwulu, hiyamusañulaña namujimba wawuntuku. Amusañulaña nawumi wamwiwulu neyi chileñaleña chakuspiritu.

²² Yesu diyi wadiña watachi kusañula munjila yamuchidiwu. (Yowanu 3:13) Chimwahitili mafuku asatu kufuma hamujahiliwu Yesu, Yehova wamusañwili. (Masamu 16:10; Yilwilu 13:34, 35) Yesu amusañwili wanyi namujimba wawuntu. Kapostolu Petulu walumbulwili nindi Yesu “amujahili mumujimba wawuntu, ilaña amuhandishili muspiritu.” (1 Petulu 3:18) Yesu amusañwili nakwikala muntu wañovu wakuspiritu. (1 Akorinda 15:3-6) Bayibolu yahoshaña nawu kudi cheñi antu amakwawu akasañulawu muniyi njila.

23, 24. Indi “mukanka wanyikoku wanyanya” wateneniyi Yesu hiyanyi nawa akekala añahi?

²³ Henohu kanda yafwi, Yesu walejeli atumbanji twindi ashinshika nindi: “Inakuya nakuyiloñeshela iluña denu.” (Yowanu 14:2) Dikwila nawu atumbanji twindi amakwawu akayisañula nakushakama nindi mwiwulu. Antu añahi akaya mwiwulu? Yesu wahosheli nindi akekala anti, “mukanka wanyikoku wanyanya.” (Luka 12:32) Kapostolu Yowanu washimwini kuvula kwawantu hamumweniyi Yesu “nemani haMpidi yaZiyona [yamwiwulu] hamu nawa 144,000.”—Chimwekeshu 14:1.

²⁴ Awa akwaKristu 144,000 akayisañula mpinjinyi? Bayibolu yatulejaña nawu akayisañula hampinji yakela Kristu natachiki dehi kuyuula mwiwulu. (1 Akorinda 15:23) Tunakushakama muniyi mpinji, nawa 144,000 amavulu ayisañula dehi nakuya mwiwulu. Ana achidi hamaseki nawa anakufwa makonu, ayisañulaña hohenohu nakuya mwiwulu. Hela chochu, antu amavulu akayisañula kumbidi nakushakama muParadisa hanu hamaseki.

25. Tukadizadi mukapetulu kanalondelihu?

²⁵ Katataka Yehova yafumishi antu ejima kukufwa nawa kufwa akakwifumishahu chikupu! (Tañenu Isaya 25:8.) Indi antu akaya mwiwulu akaya nakwiladi? Bayibolu yalumbulula nawu akayuulaña hamu naYesu munfulumendi yaWanta. Twakadiza nsañu yayivulu haniyi nfulumendi mukapetulu kanalondelihu.