Komana Wuzweñi Hichinjikijilu Chamwekeshaña Nawu Hitukweti Wuselewa waNzambuku?
NZAMBI walejeli aIsarela akushankulu nindi: “Kudeyi hikwakekala atuzweñuku.” Chumichi chadiña mwenimu muloña muNshimbi yayinkeluwu, asonekelumu nshimbi yahosheleña hakwakamena atuzweñi nikuleka yuma yasondamishiluwu. (Kuhituluka 15:1-4, 7-10) Dichi, hikwadiña atuzweñi hakachi kawaIsarelaku, muloña Yehova wayikanini kuyikiswila. Ilaña, hakutambwila nkisu yeniyi chashindameneni hakwovwahila Nshimbi, yakañenyuwu aIsarela kwovwahila.
Hela chochu, chumichi hichayili mukwila nawu antu adiña namaheta amavulu adiña nawuselewa waNzambi kubadika antu adiña namaheta anteshaku. Ambuña aNzambi amavulu ashinshika adiña atuzweñi. Kaprofwetu Amosa wadiña kazweñi mukwakuhemba anyikoku nawa mukwakuzata nañovu wahachilaaka. (Amosa 1:1; 7:14) Mumafuku akaprofwetu Elija, hampinji yadiñaku nzala muIsarela, Elija washindameneni hadi mumbanda wamfwila kazweñi, wadiña natuwuña nitumanji twantesha, ayidyishili muchihayamisha hampinji yanzala. Kwosi wadiña waheta hakachi kaElija nimumbanda wanfwila; Yehova wayinkeli hohu yuma yakeñeleñawu.—1 Anyanta 17:8-16.
Yilulakenu yinateli kuleñela antu kuhutwa neyi mukulabula kwadisu nawa chakadi kukuhwelela. Wubanji niyikatu yinateli kukañesha muntu kuzata nyidimu hakapinji kantesha hela haya nyaka. Kufwa kwaleñelaña kushiya anginga niambanda amfwila. Dichi kukala kwamuchidiwu hikwamwekeshaña nawu muntu hakweti wuselewa waNzambuku. Nsañu yaNyawomi niLuti hichakutalilahu chachiwahi ochu Yehova chakamenañayi atuzweñi chachiwahi. Hela chakwila kufwa kwawamfumu jawu kwashili Nyawomi niLuti muwuzweñi, Yehova wayikiswilili nawa wayakameneni kumujimba.—Luti 1:1-6; 2:2-12; 4:13-17.
Chakadi nikujina, wuzweñi hiwekala chinjikijilu chamwekeshaña nawu hitukweti wuselewa waNzambuku. Antu ashinshika kudi Yehova Nzambi anateli kukuhwelela mazu aMwanta Davidi akwila nawu: “Nadiñi kansi, hanu nakula dehi nankashi, kanda nimonañahu dehi hashiyilawu muntu waloña, hela anyanindi nakulomba yakudyaku.”—Masamu 37:25.
[Mwevulu wudi hefu 8]
Hela chakwila Nyawomi niLuti adiña atuzweñi, Nzambi wayikiswilili nawa wayakameneni chiwahi