Kaanenu Chilwilu Chidi Mukaayi Makonu Chakufwila Kudimona Kulema
MUKWITEJA wanyi nenu antu amavulu mukaayi atoñojokaña nawu atelela kutambwila kukooleka kwadimena, wuswa, hela kuyimona kulema kubadika amakwawu? Hela chakwila akutambwila yuma yayivulu ñahi, atoñojokaña nawu atela kuyilila yuma yikwawu yabadika. Yitoñojoka yamuchidiwu yakufwila hohu muntu kudimona yomweni kulema nikubula kusakilila, yinataandi munanu mafuku akukuminina.—2 Tim. 3:2.
Hela chochu, chilwilu chakufwila kudimona kulema chakuyamba wanyi. Adama naEva akeñeleña kwikala nawuswa wakudifuukwila chuma chachiwahi nichatama, nawa mukwila mwenimu mwafumini yuma yomisha mbaña. Chimwahitili yaaka yayivulu, Mwanta Uziya wakuYuda watoñojokeli nindi wateleleli kulambula insensi hatembeli, ilaña hadiñahu naniwu wuswa hela hantiku. (2 Kushi. 26:18, 19) Munjila yoyimu, aFwarisi nawaSadusi akuhweleleli nawu Nzambi wateleleli kuyitiya kuwaha munjila yadimena muloña afumini mumutaña waAbarahama.—Mat. 3:9.
Atunyeñumuka kudi antu adimonaña nawu alema kubadika akwawu, nawa yilwilu yawu yinateli kutusambukila. (Ñal. 5:26) Tunateli kutachika kutoñojoka netu tunateleli kutambwila kukooleka kumu, hela kutumona kulema kubadika amakwawu. Tunateli kutondolwela ñahi yitoñojoka yamuchidiwu? Chatachi, twatela kwiluka Yehova chatoñojokañayi haniyi nsañu. Yishina yiyedi yamuBayibolu yikutukwasha.
Yehova diyi wafuukulaña yuma yitwatela kutambwila. Talenu iyi yakutalilahu.
Muchisaka, iyala wakeñaña kumulemesha kudi ñodindi, mumbanda niyena wakeñaña kumukeña kudi nfumwindi. (Efwe. 5:33) Adi muwulu atela hohu kudimwekeshela kukeña kwamuwulu kudi wumu namukwawu. (1 Kor. 7:3) Anvwali akeñaña anyanawu ayovwahileña, anyana niwena akeñaña kuyikeña chikupu nikuyikwasha kudi anvwali jawu.—2 Kor. 12:14; Efwe. 6:2.
Muchipompelu, akulumpi adikitaña chikupu twatela kuyilemesha. (1 Tes. 5:12) Hela chochu, hiyakweti wuswa wakwikala anyanta hadi amanakwawu niahelaku.—1 Pet. 5:2, 3.
Nzambi wenka nfulumendi jawantu wuswa wakutambula nyisonku nikuyilemesha kudi antu ayuulañawu.—Rom. 13:1, 6, 7.
Yehova watwinkaña yuma yabadika yuma yatutelela. Muloña wanshidi yitwaswana, chuma chatutelela hohu hikufwa. (Rom. 6:23) Ilaña, Yehova watwinkaña nkisu yayivulu muloña wakukeña kwindi kwakashinshi kwatukeñayi. (Mas. 103:10, 11) Nkisu yidi yejima hela kukooleka kutwatambwilaña kudi yena twakutambwilaña muloña waluwi lwindi lwasweja.—Rom. 12:6-8; Efwe. 2:8.
CHAKUTONDOLWELA KWIKALA NACHILWILU CHAKUDIMONA KULEMA KUBADIKA AMAKWAWU
Tondolwelenu yitoñojoka yamukaayi. Neyi kubabala nehi, tunateli kutachika kutoñojoka netu twatelela kutambwila yuma yayivulu kubadika amakwawu. Yesu wamwekesheli chinateli kushikena kutaanda iyi yitoñojoka kuhitila mukuzatisha chakutalilahu chawakakukalakala afweteliwu denari yimu-yimu. Akakukalakala amakwawu atachikili kuzata nantetemena yayeni nawa azatili ifuku damukuma munkanza; ilaña amakwawu azatili hohu ora yimu. Akakukalakala amwizanvu dasambililihu atoñojokeli nawu akuyinka wufwetu weneni muloña wamudimu wazatiliwu. (Mat. 20:1-16) Hakuzatisha ichi chakutalilahu, Yesu wamwekesheli nindi akakumulondela atela kuzañalala nayuma yidi yejima yinayinkiyi Nzambi.
Amayala azatili ifuku damukuma atoñojokeleña nawu akuyinka wufwetu weneni
Ikalenu namuchima wakusakilila, bayi kukanjikija nenu ayinkeña yumaku. (1 Tes. 5:18) Imbujolenu kapostolu Pawulu, wabulileña kulomba yuma yakumujimba kudi amanakwindi muKorinda hela chakwila wadiña nawuswa wakwila mwenimu. (1 Kor. 9:11-14) Twatela kusakilila hachuma chejima chinatwinkiwu nikutondolwela kukanjikija antu kutwinka yuma.
Kapostolu Pawulu hadiña nakukanjikija nindi amwinkeña mali akudikwashamuku
Ikalenu adizoza. Neyi muntu atachika kudimona kulema, kakavulu watachikaña kutoñojoka nindi nateleli kwikala nayuma yinabadiki hayikwetiyi. Kudizoza dichuma chinateli kutukwasha kutondolwela iyi yitoñojoka yaheña.
Kudizoza kwaDanyeli kwamuletesheli ekali wasweja kulema kudi Yehova
Kaprofwetu Danyeli welili chuma chachiwahi chitunateli kwimbujola hakwikala adizoza. Muloña wakufuma kuchisaka chalema, kumwekana chachiwahi, maana adiñayi nawu niwuswa wakwila yuma chiwahi jadi kumuletesha kutoñojoka nindi washikililimu kumulemesha nankashi nikutambwila kukooleka kwekaliliyi naku. (Dan. 1:3, 4, 19, 20) Ilaña, Danyeli watwalekelihu kwikala wadizoza, nawa ichi chilwilu chamukwashili kwikala wasweja kulema kudi Yehova.—Dan. 2:30; 10:11, 12.
Dichi tukaanenu chilwilu chakudimona kulema kubadika amakwawu chinataandi mukaayi makonu. Ilaña tutwalekenuhu kuzañalala nachuma chidi chejima chinatwinkiyi Yehova kuhitila muluwi lwindi lwasweja.