Lwihu Lwapela Lunateli Kwihula Muntu Wejima

Mary nanfumwindi, John,a ashakamaña mwituña mwenzaña nakushakama nikuzatila antu amavulu afumaña kuPhilippines, nawa ayishimwinaña nsañu yayiwahi. Mumpinji yachipupu chaCOVID-19, Mary watachikili kulombola atudizi aBayibolu mwituña mwashakamañayi nimumatuña amakwawu mukaayi. Welileña ñahi mwenimu?

Mary wayihwileña atudizi indi aBayibolu nindi, “Munelukihu muntu mukwawu wukukeña kudiza Bayibolu?” Neyi ahosha nawu adi kwoku, wayihwileña neyi chakwila akumukwashaku kulonda ahanjeki nawu. Kwihula lwihu lwapela muniyi njila kakavulu mwafumaña yuma yayiwahi. Muloñadi? Muloña antu etejaña Izu daNzambi ekalaña namuchima wakufwila kulejaku antaña jawu niamabwambu akamenañawu yuma yinadiziwu. Yumanyi yayiwahi yafumaña mukwihula ilu lwihu?

Kadizi waBayibolu waMary wejina daJasmin wamulejeli nindi kudi antu awana anakukeña kudiza Bayibolu. Kristine, wumu hakachi kanawa atudizi, wadiluñishileña nankashi kudiza chakwila wamulejeli Mary nindi adizeña nindi kayedi mumulungu. Mary chamwihwiliyi neyi chakwila welukilihu muntu mukwawu wakeñeleña kudiza Bayibolu, Kristine wahosheli nindi, “Eña, nukuyileja amabwambu jami muyiluki.” Munyilungu yantesha hohu, Kristine wamulejeli Mary amabwambu jindi awana akeñeleña kudiza. Mukuhita kwampinji, Kristine wamulejeli cheñi amabwambu jindi amakwawu, nawa awa amabwambu jindi niwena atachikili kulejaku akwawu.

Kristine wakeñeleña nichisaka chindi muPhilippines nindi chidizi Bayibolu. Dichi wahanjekeli namwanindi wamumbanda, Andrea. Hakusambila, Andrea watoñojokeli nindi, ‘AYinsahu akweti kwitiya kwadimena, akuhwelela mudi Yesu wanyi, nawa azatishaña hohu Bayibolu yaChitiyañenu Chachikulu.’ Ilaña chadiziliwu hohu kamu, iyi yitoñojoka yaheña yejima yajimañeni. Hampinji yakudiza kwejima, wadiña nakuhosha nindi, “Chakala hohu dichinahoshi Bayibolu, dikwila nawu ichi chuma chalala!”

Mukuhita kwampinji, Andrea wamulejeli Mary amabwambu jindi ayedi nimukwawu mwazatilileñawu, niwena atachikili kudiza. Nawa iku Mary neluki wanyi, atata yaAndrea awambanda amputamesu, aAngela, adiña nakutiyilila hampinji yadizileñawu. Dichi ifuku dimu, aAngela amulejeli Andrea nawu aleji Mary nindi niwena anakukeña kuyidizisha Bayibolu nkawawu. AAngela akeñeli yuma yadizileñawu. Mukakweji kamu hohu, elukili nsona jajivulu kumutu nawa akeñeleña kudiza kawana mumulungu! Nawukwashu waAndrea, Angela watachikili kupompa mpinji yejima kuhitila mukusokankesha kuzatisha vidiyo konfalensi.

Mary chelukiliyi nindi nfumwa Kristine, Joshua, mpinji yejima waswinineña kwakwihi hampinji yinakumudizishawu Kristine, Mary wamwihwili Joshua neyi chakwila wukukeña kudizilaña hamu nawu. Joshua wahosheli nindi, “Nukutiyililañaku hohu, ilaña bayi muñihula lwihu ludi lwejimaku; chimwañihula, nukudifuminahu.” Mumaminetisi atanu hohu akutachikilahu kudiza, wehwili malwihu amavulu nankashi kubadika Kristine nawa wakeñeleña nindi atwalekihu kuhanjeka nsañu yamuBayibolu.

Lwihu lwapela lwehwiliyi Mary lwaletesheli antu amavulu atachiki kudiza Bayibolu. Chineli aswejeli kuvula, wahanjekeli nawaYinsahu amakwawu kulonda adizisheñaku amakwawu. Mary watachikili kudizisha Bayibolu antu akushika ku 28 mumatuña ashiyashana.

Jasmin, kadizi watachi ashimunawu muniyi nsañu yamwekeni, wapapatisheweli muApril 2021. Kristine wapapatisheweli muMay 2022 nawa wafunta kuPhilippines kudi chisaka chindi. Atudizi amakwawu ayedi amulejeliwu Mary kudi Kristine niwena apapatisheweli. Angela wapapatisheweli chimwahitili tukweji twantesha nawa ichi hipayiniya wampinji yejima. Nfumwa Kristine, Joshua, nimwanawu wamumbanda, Andrea, kushilahu niatudizi amakwawu amavulu anakupaminaku chikupu.

Mumafuku awakaKristu akusambila, nsañu yayiwahi yataandileña mukunyakashana hakachi kayisaka niamabwambu. (Yow. 1:​41, 42a; Yilw. 10:​24, 27, 48; 16:​25-33) Munateli kwihula atudizi enu aBayibolu niantu amakwawu adi nampwila yakudiza nenu, “Munelukihu muntu mukwawu wukukeña kudiza Bayibolu?” Neyi mwihula ilu lwihu lwapela, hadaha ninenu mukuwana antu amavulu anakukeña kudiza Bayibolu.