Nsañu Yikukwasha Ambanda Anakukabishawu
“ ABANAKASHI abengi nga nshi mwi sonde lyonse balabacusha sana. Bushe na imwe balamucusha? Moneni ifyo Lesa amona ukucusha abanakashi e lyo ne fyo akacitapo pa fyo abantu bacusha abanakashi.”
Awa diwu mazu akutachikilahu ekala ha jw.org muchibaaba chikweti mutu waCibemba wunakuhosha nawu “Ukucingilila Abanakashi—Ifyo Baibo Yalandapo (Chahosha Bayibolu—Hakukiña Ambanda).” Kukumana kwanichi chibaaba anayileji nawu munateli kuloñolola PDF yinakuhosha haniyi nsañu, kuhiñahu munateli kuyipulinta nawa muyivuña kulonda yiikali tilakiti yikweti mafu awana. Muhela wakuUnited States wejina daStacy, wahosheli nindi: “Napulintili matilakiti amavulu aniyi tilakiti, dichi ami nimuhela mukwawu twasendeli awa matilakiti nakuyitwala kuchilombu chawambanda chadiña mwiluña dachipompelu chetu.”
Mukamudimu wumu wazatilileña kunichi chilombu wehwili neyi kunashalihu matilakiti amakwawu kulonda yenki antu ashakamineña muchilombu. Chafuminimu, amutwalilili matilakiti 40 ahosheleña haniyi nsañu nimakaadi 30 akulombola antu ha jw.org. Hawenyi wukwawu, mukulumpi watalileña ichi chilombu wamwekesheli mpwila kuhitila mukuyileja aYinsahu nindi ayileji awa antu adiña muchilombu chitwadizishaña Bayibolu.
Dichamumwekeneni cheñi muhela Stacy hadiñayi nawahela amakwawu ayedi hampinji yayiliwu kuchilombu chikwawu kwatambwiliwu antu matilakiti atanu nawa kwayilejeliwu nawu akayileteli amakwawu. Mukamudimu wumu wahosheli nindi: “Iwu mukanda wukukwasha antu awambanda akunu.” Wabombelelihu nindi, “Dichuma chitunakukeña.” Hawenyi wawu wamuchiyedi, antu amavulu ashakamineña munichi chilombu apompeli hamu kulonda amoni chitwadizishaña Bayibolu, nawa ayedi hakachi kawu afuukwilihu kuya nakupompa Kwitala daWanta kunsa yamulungu mumulungu walondelelihu.
Stacy wahosheli nindi: “Tunakuzañalala nankashi chitunakumona antu chinakutambwilawu ichi chibaaba chikweti nsañu yalema. Chimwachipulinta nawa muchivuña, chikuyikwasha kushimwina chiwahi nsañu yayiwahi kudi awa antu alema anakukabishawu. Twatiyili kuwaha chikupu antu chazañaleliwu hakutambwila nsañu yekala muniyi tilakiti, nawa tunakuzañalala hakumona Yehova chinakutukiswilayi hampinji yitunakuzata nañovu kuyishimwina nsañu yayiwahi ambanda anakumona kukala kwamuchidiwu.”