Chakuloñesha Chiwahi Chawija chaWulu Chikumulemesha Yehova

1-2. Yehova nakukeña nindi chawija chenu chawulu chakekali ñahi?

KOMANA mwadota dehi kulonda mwakadisumbuli? Neyi mwadota dehi, mwafwaku mwani! Chakadi nikujina, munatachiki dehi kuloñesha yuma yakaletesha chawija chenu chakendi chachiwahi. Yehova nakukeña nindi mwakadiluñishi hefuku dachawija chenu chawulua nawa mwakekaleña namuzañalu muwulu wenu.—Yish. 5:18; Kami. 3:11.

² Chalema nankashi hachawija chenu kwila yuma yikumulemesha Yehova. Muloñadi chitunahosheli muniyi njila? Nawa munateli kwila ñahi mwenimu? Hela chakwila achinu chibaaba chinakuhosha nankashi hadi antu anakukeña kudisumbula anakuloñesha chawija chawu, yishina yinashimuniwu yinateli kukwasha wejima wetu kumulemesha Yehova neyi anatutambiki kuchawija hela neyi anakudisumbula anatulombi nawu tuyikwashiku hanakukeñeka kuyikwasha.

MULOÑADI CHIMWATELA KUMULEMESHELA YEHOVA?

3. Hampinji yinakuloñeshawu chakekala chawija chawu, yumanyi yatela kutoñojokahu akaKristu anakudisumbula, nawa muloñadi?

³ Eyala namumbanda akaKristu anakuloñesha chawija chawu, atela kufuukulaña yuma kwesekeja nayishina yashimunayi Yehova Mwizu dindi. Muloñadi? Muloña Yehova diyi watachikishili wulu. Waloñesheli chawija chawulu chatachi, hasumbwishiliyi aAdama naEva. (Kutach. 1:28; 2:24) Chineli Nzambi diyi watachikishili wulu, anakudisumbula atela kufuukulaña chiwahi yuma kutalisha hachawija chawu kulonda chakaleti kalemesha hadi yena.

4. Chumanyi chikuletesha eyala namumbanda anakudisumbula kumulemesha Yehova hefuku dachawija chawu?

⁴ Kudi chuma chalema chikuyiletesha mutoñojokeña hakumulemesha Yehova hampinji yimunakufuukula yuma yimwakela hefuku dachawija chenu: Diyi Tata yenu wamwiwulu nawa Ibwambu denu wabadika. (Heb. 12:9) Chakadi nikujina, munakukeña wubwambu wenu nayena wakatwalekihu kwikala wakola. Munakukeña wanyi chuma chidi chejima chinateli kumuneñesha Ibwambu denu kumwekana hadina ifuku hela hefuku dacheñi. (Mas. 25:14) Neyi mutoñojoka hayuma yejima yinayililiyi Yehova niyuma yakayililayi kumbidi, komana mukwiteja wanyi nenu nateleli kumulemesha hefuku dachawija chenu?—Mas. 116:12.

MUNATELI KUMULEMESHA ÑAHI YEHOVA?

5. Bayibolu yinateli kukwasha ñahi anakudisumbula kuloñesha chiwahi chawija chawu?

⁵ Bayibolu hiyashimunahu nshimbi jahosha hachatela kwikala yawija yawulu yawakaKristu hela yuma yatela kwilawu kumarisepishoniku. Dichi anakudisumbula atela kuloñesha chawija chawu kwesekeja nachidi yuma muchihandilu chawu, yisemwa yawu niyuma yakeñawu. Akakudifukula alala atela kulemesha cheñi nshimbi jashaku Kesari. (Mat. 22:21) Hela chochu, chawija chinaloñeshiwu kwesekeja nayishina yamuBayibolu, chikumulemesha Yehova nikumuzañalesha. Hanu dinu, yishinanyi yimwatela kwanukaña?

6. Muloñadi chichalemena eyala namumbanda anakudisumbula kwovwahila nshimbi janfulumendi jahosha hawulu?

⁶ Ovwahilenu nshimbi janfulumendi. (Rom. 13:​1, 2) Mumatuña amavulu, nfulumendi jashaku nshimbi jatela kwovwahila eyala namumbanda anakudisumbula henohu kanda adisumbuli. Anakudisumbula anateli kwihula kulonda eluki chahosha iji nshimbi kumaluña kwashakamañawu. Neyi mukweti malwihu kutalisha hachimunateli kwiluka iji nshimbi, mwakasunuka kwihula akulumpi muchipompelu kulonda ayikwashi.b

7. Yumanyi yayiwahi yimwatela kwila hakwila chawija chenu chakekali chachiwahi?

⁷ Ilenu yuma yakaletesha chawija chenu chakekali chachiwahi. (1 Kor. 10:​31, 32) Zatenu nañovu kwila yuma yamwekeshaña nyikaabu yaspiritu yaNzambi bayi spiritu yamukaayiku. (Ñal. 5:​19-26) Kwesekeja nachishina chamuNsona chahosha hawumutu, kalemba diyi wukweti mudimu wakumona kwila nawu chawija chawu anachiloñeshi munjila yakwila chakekala chamuzañalu nawa chakalemesha. Chumanyi chinateli kuyikwasha? Mpanji yawulu yashindamena haBayibolu ayihanaña munjila yakukeña, neyena ninakalemesha, yaleteshaña antu kusakilila chikupu hantanjikilu yawulu yashaku Nzambi. Yinateli kukwasha ejima anapompi, muloña yikuyikwasha kwiluka kulema kwanichi chidika. Kafwampi, akaKristu amavulu anakudisumbula atondañahu kwikala nanichi chidika Hetala daWanta, neyi chinatwesheki. Neyi munakukeña kuzatisha Itala daWanta, mwatela kusonekela izanvu dawakulumpi henohu kuchidi mpinji kulonda akayinki lusesa lwakudizatisha.

8. Neyi munafuukulihu kwikala narisepishoni hachawija chenu, yumanyi yimwatela kwila hakwila chumichi chakaleti kalemesha hadi Yehova? (ARoma 13:13)

⁸ Tañenu ARoma 13:13. Neyi mufuukulahu kwikala narisepishoni hachawija chenu, yumanyi yimwatela kutondolwela yamwekeshaña spiritu yakaayi? Izu dachiGiriki kwabalumunawu mazu akwila nawu “[yidika] yatama,” datalisha kuyidika mwabombela kusweja kunwa walwa nikuvumisha tumina kushika nimukachi kawufuku. Neyi mufuukulahu nenu hachawija chenu hakekali walwa, toñojokelenu chadimu yuma yimwatela kwila kulonda kwakabuli kwikala muntu hela wumu wakanwa nakubadikishahu.c Neyi kwakekala kuvumisha tumina, volyumu kuchisanji yatela kwikala yashikila kulonda antu imunatambiki akekaleña nampinji yakuhanjeka chachiwahi. Tondenu chiwahi tumina tumwakazatisha nawa tiyililenu kumazu adi munotu tumina kulonda twakabuli kuhukesha muntu hela wumu.

9. Yumanyi yatela kwanukañawu eyala namumbanda anakudisumbula kutalisha hadi akahoshahu hela hayisela yikwawu yakekala kurisepishoni yawu?

⁹ Komana munaloñeshi nenu kurisepishoni kwakekala antu akahoshahu mazu antesha, kutalisha nyevulu hasikilini, mavidiyo indi kwiji kwakekala yisela yikwawu? Yumiyi kakavulu yaleteshaña idi ifuku kwikala dadimena. Hela chochu, mwatela kuloñesha chiwahi kulonda yumiyi yakekali yakukolesha antu. (Fwili. 4:8) Dihulenu nenu: ‘Komana yakamwekesha nawu nalemesha akwetu antu? Yakamwekesha nawu ntanjikilu yawulu yalema?’ Nawa chasweja kulema, dihulenu nenu: ‘Komana yumiyi yakaleta kalemesha hadi Yehova?’ Hela chakwila chidi hohu chiwahi kwila yuma yikwawu yakusehesha, ilaña mwatela kutondolwela kwila chuma chidi chejima chabula kutelela, chidi neyi chuma chikuletesha antu atachiki kutoñojoka hansañu yawuvumbi. (Efwe. 5:3) Neyi kudi antaña niamabwambu jenu akahoshahu mazu antesha, yilejelenu chadimu eluki yuma yatela kuhoshawu niyatela kubula kuhoshawu.

10. Muloñadi eyala namumbanda anakudisumbula chatela kwikalilawu adikehesha hanakuloñeshawu chawija chawu? (1 Yowanu 2:​15-17)

¹⁰ Ikalenu adikehesha. (Tañenu 1 Yowanu 2:​15-17.) Yehova watiyaña kuwaha neyi akakudifukula indi azataña nañovu kumulemesha chatela eleña yuma yikuletesha wena asweji kuyilemesha kudi antu. Dichi akaKristu adikehesha atondolwelaña kuzatisha mali amavulu nankashi “nikudisamba nayuma [yikwetiwu].” Yumanyi yayiwahi yinateli kufumamu neyi mwikala nachawija chanyanya? Hadaha chinateli kuyimwekena neyi chamumwekeneni Mike, manakwetu wakuNorway. Wahosheli nindi: “Twadiñijili munyikudi wanyi nawa twatwalekelihu kuzata wupayiniya. Chawija chetu chadiña chanyanya ilaña chawahili nankashi nawa himpinji yayiwahi yitwanukaña.” Tabitha, muhela wakuIndia, wahosheli nindi: “Hitwakameneneña nankashiku. Chineli twafuukwilihu kwikala nachawija chanyanya, kwadiña hohu yuma yantesha yitwafuukwileña kwila niyuma yantesha yitwabulileña kuditeja.”

11. Akankaña nakalemba anateli kumwekesha ñahi nawu adikehesha kutalisha hanvwalilu nimmwekenu yawu? (Talenu cheñi nyevulu.)

¹¹ Komana mwatonda dehi yakuvwala? Chakadi nikujina, munakukeña mwakamwekani chiwahi hama. Nikunyima, akankaña nakalemba ashileñaku chikupu muchima kummwekenu yawu. (Isa. 61:10) Yuma yimukuvwala kuchawija chawulu yinateli kwikala yaambukaku nayuma yimunateli kuvwala hampinji yimunakwila yuma yikwawu, hela chochu yatela kwikala yakalemesha. (1 Tim. 2:9) Bayi muletesha antu kusha hohu maana kumutapu wayakuvwala yimunavwali hela kummwekenu yenu hachawija chenuku.—1 Pet. 3:​3, 4.

12. Muloñadi anakudisumbula chatela kutondolwelawu tushidikilu twahachawija chawulu twabula kwikala twamuNsona twelañawu antu kwiluña kwashakamañawu?

¹² Tondolwelenu tushidikilu twabula kwikala twamuNsona. (Chim. 18:4) Muyawija yayivulu yawulu mukaayi makonu mwenzala tushidikilu twashindamena hakudifukula kwakutwamba, kupesha niyilwilu yakupanda. Yehova watusoñamishaña chakadi kuhita mumbadi nindi twatela kutondolwela iyi yuma yamajilu. (2 Kor. 6:​14-17) Neyi kwiluña kumwashakamaña kwekala yisemwa hela tushidikilu tumunakujinoka neyi chakwila tudi chiwahi hela nehi, sandujolenuhu kulonda mwiluki ntachikilu yatu nawa neyi kudi yishina yamuBayibolu yahosha hanotu tushidikilu henohu kanda mufuukulihu kutuzatisha hachawija chenu.

13. Eyala namumbanda anakudisumbula anateli kumwimbujola ñahi Yehova kutalisha hayawaana yinakutambwilawu?

¹³ Komana hikashidikilu kwiluña kumwashakamaña antu anatambikiwu kuchawija kuyinka chawaana eyala namumbanda anakudisumbula? Yawaana yinateli kuleta antu amakwawu imunatambiki yikushindamena hamali akwetiwu. Kafwampi, akaKristu ayikoleshaña nawu ahaneña nawa kwila mwenimu kwayiletelaña muzañalu. (Yish. 11:25; Yilw. 20:35) Hela chochu, twatela wanyi kukuhwelela netu antu itunatambiki kuchawija chetu chiña hohu enzi nayawaana; hela kuyikojeja atoñojoki nawu tukutiya kuwaha wanyi neyi atuletela chawaana chabula kulema wuseya. Twamwimbujolaña Yehova kuhitila mukumona yawaana neyi chayimonañayi, dichi twalekaña antu kuhana kwesekeja nayuma yikwetiwu nawa chakufuma hamuchima.—2 Kor. 9:7.

YUMA YIKUYIKWASHA KUTONDOLWELA KUKALA NIKUKUSHINDA

14. Kukalanyi kwamonañawu antu amakwawu anakudisumbula?

¹⁴ Hadaha hampinji yimunakuloñesha chawija chawulu chinateli kuleta kalemesha hadi Yehova, munateli kumona kukala. Chakutalilahu, chinateli kuyikalila kufuukulahu kwikala nachawija chanyanya. Charlie, wakuSolomon Islands, wahosheli nindi: “Chatukalilili nankashi kwiluka antu itwatela kutambika kurisepishoni. Tukweti amabwambu amavulu, nawa muchisemwa chetu, ejima akuhwelelaña nawu mukuyitambika!” Tabitha, ashimunawu hakusambila, wahosheli nindi: “Kunashakamaña, kakavulu atambikaña antu amavulu kurisepishoni. Hahitili mpinji hakwila anvwali jetu eteji mutwafuukwili netu tunakutambika hohu antu 100.” Sarah, wakuIndia, wahosheli nindi: “Antu amakwawu atoñojokaña hohu hamali akwetiwu nichayimonañawu kudi akwawu. Asonyi jami adiña nayawija yamaneni, dichi muloña wachumichi nakeñeleña nami chawija chami chikawahi nankashi kubadika yawu.” Yumanyi yinateli kuyikwasha kushinda kukala kwamuchidiwu nikukala kukwawu?

15. Chalemenadi kulomba hampinji yimunakufuukula yuma yinakundami kuchawija chenu?

¹⁵ Lombenuña himunakufuukula yuma yinakundami kuchawija chenu. Mulejenuña Yehova mukulomba kukala kwejima kumunakumona hela chimunakutiya. (Fwili. 4:​6, 7) Mulombenu kulonda yayikwashi kufuukula chachiwahi, kuwundisha muchima neyi munakwakama nikwikala ahamuka hanakukeñeka kuhamuka. (1 Pet. 5:7) Mukuswejelañaku kumukuhwelela Yehova hampinji yimunakumona chinakuyikwashayi. Tabitha, itunahanjekihu dehi, wahosheli nindi: “Twatachikili kwakama netu hadaha tukwaambokelañamu etu ayedi ninawantu amuyisaka yetu. Dichi mpinji yejima neyi tunakuhanjeka hayuma yitunakukeña kufuukula kutalisha hachawija chetu, twatachikileña nakulomba. Twamweni chikupu netu Yehova watukwashileña nawa twahanjekeleña munjila yayiwahi.”

16-17. Kuhanjeka munjila yayiwahi kunateli kuyikwasha ñahi hampinji yimunakufuukula yuma yinakundami kuchawija chenu?

¹⁶ Hanjekenuña chakadi kuhita mumbadi nawa mukubabala. (Yish. 15:22) Enu munakudisumbula mwatela kwiluka nenu kudi yuma yayivulu yimwatela kufuukwila hamu kutalisha hachawija chenu. Yumiyi munabombeli ifuku dimwakadisumbula, mali imwakazatisha, antu imwakatambika niyuma yikwawu yinashali. Henohu kanda mufuukuli, hitulukenu hamu muyuma yimunashimuni nawa hanjekenu hayishina yamuBayibolu yinateli kuyikwasha, kushilahu niwukwashu wumunatambwili kudi amanakwetu niahela apama nawa anashimbuli muwulu. Neyi munakuleta yitoñojoka yenu, hoshenu munjila yayiwahi, yakutoñojokelaku nawa nyakalenu kutiyilila munakuhosha akwenu. Neyi antaña jenu imwadikunda nawu nankashi, chidi neyi anvwali jenu, analombi nawu mwiliku yuma yimu nawa yinakumwekana neyi yidi chiwahi, munateli kwila kwesekeja nachinalombiwu. Ichi chidika chalema chikupu nikudi wena. Neyi himukutwesha kwila yuma yinakukeñawuku, lumbululenu mukubabala yuma yinaleteshi mubuli kwila munakukeñawu. (Kol. 4:6) Yilumbulwilenu antaña jenu chakadi kuhita mumbadi nenu chuma chacheni chimunakufwila hikwikala nachidika chamuzañalu nawa chikumulemesha Yehova.

¹⁷ Kulumbulwila anvwali jenu yuma yimunakukeña chinateli kukala sweje-e neyi hiyadi muchalalaku, ilaña mukutwesha kuyilumbulwila. Santhosh, manakwetu wakuIndia, wahosheli nindi: “Yisaka yetu yakeñeleña nawu tuzatishi tushidikilu twashiyashana twawaHindu. Chatusendeleli mpinji yeneni nankashi hakuyilumbulwila yuma yitwafuukwili. Twafuukwilihu kwila yuma yimu yakeñeleñawu chitwamweni netu yikumuneñesha Yehova wanyi. Chakutalilahu, handandanda yayakuda yakurisepishoni twashilihu hohu yakuda yayitiyishileña kuwaha nawa hikwadiña tumina hela kuhañanaku, muloña yumiyi adiña ayinjilila wanyi.”

18. Chumanyi chinateli kuyikwasha hakwila ifuku denu dachawija dakendi chiwahi? (1 AKorinda 14:40) (Talenu cheñi mwevulu.)

¹⁸ Loñeshelenu chadimu chachiwahi. Neyi mudiloñeshela chadimu chachiwahi, himwakakamaña nankashi hefuku dachawija chenuku. (Tañenu 1 AKorinda 14:40.) Wayne, wakuTaiwan, wahosheli nindi: “Chikwashalili mafuku antesha nachawija chetu, twabulakeni nawantu antesha adihanini kutukwashaku kuloñesha chidika. Twahanjekeli hayuma yitwakela hadina ifuku nawa twahitulukili muyuma yimu yakundamini kuchawija kulonda progilamu yakendi chachiwahi.” Hakwila mumwekeshi nenu munalemeshi antu imunatambiki kuchawija, zatenu nañovu kwila yuma mumpinji.

19. Yumanyi yimwatela kwila hakwila chawija chenu chakendi chiwahi kurisepishoni?

¹⁹ Kukala kwakuvulu munateli kukukañesha neyi mutoñojokelahu chadimu. (Yish. 22:3) Chakutalilahu, neyi mwashakamaña mwiluña mwekala antu enzaña kurisepishoni chakadi kuyitambika, hanjekenu hayuma yimwatela kwila kulonda mwakakañeshi chumichi kumwekana. Yilejenu antaña jenu abula kwikala muchalala yuma yinateli kukuhwelelawu kumwekana, nawa yilumbulwilenu yitoñojoka yenu kutalisha hatushidikilu tukwawu twakundama kunsañu yachawija chawulu. Hakwila yuma yakendi chiwahi kurisepishoni, tondenu manakwetu wapama kwikala “mukulumpi wachawija.” (Yow. 2:8) Neyi mumulumbulwila chiwahi chimunaloñeshi nenu chawija chenu chakekali, nateli kuyikwasha kulonda chawija chenu chakekali chakalemesha nawa yuma yakendi kwesekeja nachimunafuukuli.

20. Yumanyi yatela kwanukañawu anakudisumbula kutalisha hachawija chawu?

²⁰ Hadaha munateli kutachika kwakama nankashi neyi mutoñojoka hayuma yinakukeñeka hakwila muloñeshi chiwahi chawija chenu. Hela chochu, anukenuña nenu chawija chenu chakekalaku hohu ifuku dimu. Hintachikilu hohu yachihandilu chachiwahi chakumukalakela Yehova hamu. Zatenu hakumina ñovu jenu kulonda chawiji chenu chakekala chanyanya nawa chakalemesha. Mukuhwelelenu Yehova. Nawukwashu windi, mwakatwesha kuloñesha chawija chenu chachiwahi nawa mwakanukaña namuzañalu yuma yayiwahi yamwekeni chakadi kuditoñesha.—Mas. 37:​3, 4.