Johana Hnêna Thu Puan Chhuah
9 Vântirhkoh panganain a tawtawrâwt a han ham chuan, arsi vân aṭanga leia tla ka hmu a; tichuan, a hnênah leilâwt luhna kawngkâ chabi pêk a ni a. 2 Leilâwt kawngkâ chu a hawng a, kawngkâ aṭang chuan rawhtuina meipui khû ang hi a khu chho va, kawngkâ aṭanga lo chhuak meikhû avâng chuan nî leh boruak chu a lo thim ta a. 3 Meikhu zîng aṭang chuan leiah hian khaukhuapte an lo chhuak a, anni chu leia khawmualkaikuangte’n an neih ang chiah thiltihtheihna pêk an ni a. 4 Anni chu leia thlai te, hnim hring rêng rêng te leh, thing rêng rêngte ti chhe lo va, an chala Pathian chhinchhiahna nei lote chauh ti chhe tûra hrilh an ni.
5 Tin, khaukhuapte hnênah chuan chhinchhiahna nei lote chu ti hlum lo va, thla nga chhûng ti hrehawm zâwk tûrin thuneihna pêk an ni a, hrehawm an thlentîr chu khawmualkaikuangin mi a seha a ti hrehawm ang hi a ni. 6 Chûng nîahte chuan mite’n thihna an zawng ang a; nimahsela, an hmu hauh lo vang. Thih an châk ang a; nimahsela, thihna chuan a tlânchhiatsan ang.
7 Khaukhuapte lan dân chu sakawr indo tûra buatsaih sa ang an ni a, rangkachak lallukhum ni âwm tak an khum a, an hmêl chu mihring hmêl ang a ni a, 8 hmeichhe sam ang hi sam an nei bawk. Tin, an hâte chu sakeibaknei hâ ang a ni a, 9 thîr âwmphaw ang âwmphaw an nei bawk. An thla zâp ri chu indo tûra sakawrtawlailîr chak taka tlân ri ang a ni. 10 Khawmualkaikuang mei ang tûr pai mei an nei a, chutah chuan thla nga chhûng mite tih nat theihna thiltihtheihna a awm a ni. 11 Leilâwt vântirhkoh chu an lal a ni a. Hebrai ṭawngin a hming chu Abaddona* a ni a, Grik ṭawng erawh chuan Apolluona* a ni.
12 Thil râpthlâk tak pakhat chu a liam ta a. Ngai teh! Chûng hnuah chuan thil râpthlâk tak dang pahnih a lo thleng leh ang.
13 Vântirhkoh paruknain a tawtawrâwt a han ham chuan, Pathian hmaa rangkachak maichâm kîte aṭanga aw lo chhuak ka hria a, 14 aw chuan tawtawrâwt keng vântirhkoh parukna hnênah chuan: “Euphrates luipuia phuar vântirhkoh palite kha phelh rawh,” a ti a. 15 Mihring hmun thuma ṭhena hmun khat ti hlum tûra, hun leh nî leh thla leh kum atâna lo buatsaih lâwk tawh vântirhkoh palite chu phelh an ni ta a.
16 Sipai sakawr chung chuang zât chu maktaduai zahnih an nih thu ka hria a. 17 Tin, inlârnaa sakawrte leh an chunga chuangte ka hmuh dân chu hetiang hi a ni: An âwmphawte chu mei anga sen, hyacinth lung anga dum pâwl leh, kât anga eng a ni a, sakawr lûte chu sakeibaknei lû ang a ni a, an kâ aṭangte chuan mei leh meikhû leh kâtte a chhuak a. 18 An kâ aṭanga chhuak hri pathum, mei leh meikhû leh kâtte chuan mihring hmun thuma ṭhena hmun khat chu a ti hlum ta a. 19 Sakawrte thiltihtheihna chu an kâah leh an meiah a awm a, an mei chu rûl ang a ni a, lû a nei a, chu chuan mite an ti na ṭhîn.
20 Tin, chûng hripuia tih hlum bângte chuan an kuta an thil tihte chu an sim lo va; anni chuan ramhuaite leh rangkachak te, tangkarua te, dâr te, lung te leh, thingtea siam milem, hmuh pawh hmu thei lo, hriat pawh hre thei lo leh, kal pawh kal thei lote biak chu an bânsan hek lo. 21 Tin, an tualthah te, an ramhuai zâwlna thil tih te, an nungchang bawlhhlawh* te leh, an rûkrûkte an sim chuang hek lo.