Johana Hnêna Thu Puan Chhuah

3 “Sardis kohhran vântirhkoh hnênah chuan heti hian ziak rawh: Pathian thlarau pasarih leh arsi pasarih neitu khân hêng thute hi a sawi a ni: ‘I thil tihte kha ka hria, nung hming pu chung siin i thi a ni. 2 Invêng la, i thil la neih thi lek lek tawhte chu ti chak rawh, ka Pathianin ti tûra a duh che chu i thawk zo si lo va. 3 Chutichuan, i thil dawn leh hriatte kha hre rengin vawng reng la, sim rawh. I harh loh chuan rûkru angin ka lo kal ngei ngei ang a, eng hunah nge i hnênah ka lo kal dâwn i hre hauh lo vang.

4 “‘Nimahsela, Sardis khuaah khân an thawmhnaw ti bawlhhlawh lo mi tlêm tê* i nei a, anni chu thawmhnaw vâr hain ka rualin an kal ve ang, chutianga chawimawi chu an phû si a. 5 Khawvêl hnehtu chu thawmhnaw vâr hâktîr a ni ang a, nunna bu aṭangin a hming ka thai bo* tawp lo vang a, ka Pa hmaah leh a vântirhkohte hmaah a hming ka hriat thu ka sawi zâwk ang. 6 Thlarauvin kohhrante hnêna thu a sawi hi beng nei chuan hre rawh se,’ tiin.

7 “Philadelphia kohhran vântirhkoh hnênah chuan heti hian ziak rawh: Mi thianghlim, mi dik, Davida chabi neitu, tu man an khâr loh tûra hawng a, tu man an hawn loh tûra khârtu chuan hêng thute hi a sawi a ni: 8 ‘I thil tihte kha ka hria—ngai teh! Tu ma khâr theih loh kawngkhâr i hmaah ka hawng a ni. Thiltihtheihna tlêm tê chauh i nei chung pawhin, ka thu i vawng reng a, engti kawng mahin ka hming i phat lo tih ka hria. 9 Ngai teh! Setana pâwla* mi, Juda mi anga inchhâl ni si lote chu i ke hmaa kûn* tûr leh ka hmangaih che tih hriattîr tûrin ka rawn kaltîr ang. 10 Ka chhelna chungchâng thu i vawn reng avângin,* kei pawhin leia chêngte fiah tûrin lei pum puia thleng tûr fiahna hunah ka vênghim ang che. 11 Ka lo kal thuai dâwn e. Tu mahin i lallukhum an lâksak loh nân che, i thil neih kha vawng tlat rawh.

12 “‘Khawvêl hnehtu chu ka Pathian biak inah chuan banah ka siam ang a, chuta ṭang chuan a chhuak tawh tawp lo vang, a chalah chuan ka Pathian hming leh ka Pathian hnêna mi vân aṭanga lo chhuk ka Pathian khawpui Jerusalem thar hming leh ka hming thar ka ziak ang. 13 Thlarauvin kohhrante hnêna thu a sawi hi beng nei chuan hre rawh se,’ tiin.

14 “Laodikei kohhran vântirhkoh hnênah chuan heti hian ziak rawh: Amena, thuhretu rinawm leh dik taka, Pathian thil siam bul bera khân hêng thute hi a sawi a ni: 15 ‘I thil tihte ka hria, i vawt lo va, i lum hek lo. I vawh emaw, i lum emaw ka duh a ni. 16 Lum si lo, vawt si lo, lum chang changa i awm avângin, ka kâ aṭangin ka chhâk chhuak dâwn che a ni. 17 “Ka hausa a, thil tam tak ka nei a, eng mah ka mamawh lo,” i ti a; nimahsela, mi lungngai, khawngaihthlâk, mi rethei, mitdel leh, saruak i ni tih i inhre si lo. 18 I hausak theih nân meia tih thianghlim tawh rangkachak ka hnên aṭanga lei tûr te, thawmhnaw hâk tûr i neih theih nân leh i saruakna mi dangte’n an hmuha i zah loh nâna thawmhnaw vâr ka hnên aṭanga lei tûr te leh, khua i hmuh theihna tûra mit hnawih ka hnên aṭanga lei tûrtein thurâwn ka pe a che.

19 “‘Ka hmangaih apiangte chu zilhhauvin ka thunun ṭhîn. Chuvângin, ṭhahnemngai la, sim rawh. 20 Ngai teh! Kawngkhâr bulah dingin ka kik e. Tu pawhin ka aw a hriata kawngkhâr a hawn chuan, a inah ka lût ang a, zanriah kan ei dûn ang. 21 Khawvêl ka hneha ka Pa bula a lalṭhutthlênga ka ṭhu ang hian, tu pawh khawvêl hnehtu chu ka lalṭhutthlêngah ka bulah ka ṭhuttîr ang. 22 Thlarauvin kohhrante hnêna thu a sawi hi beng nei chuan hre rawh se,’ tiin,” a ti a.