Johana Hnêna Thu Puan Chhuah

19 Chumi hnuah chuan, vânah mipui tam tak aw ri ni âwm tak, ring tak hi ka hria a. Anni chuan: “Jaa* chu fak rawh u! Chhandamna leh ropuina leh thiltihtheihnate chu kan Pathian ta a ni, 2 a rorêlnate chu a dikin, a fel si a. Nawhchizuar ropui tak, a nungchang bawlhhlawhnaa* lei ti chhetu chu a hrem tâk avâng leh, chu nawhchizuar kuta thi ta a bâwihte thisen phuba chu a lâk tâk avângin,” an ti a. 3 Chu veleh, a vawi hnih nân: “Jaa* chu fak rawh u! Babulon kâng khû chu chatuanin a chho vang,” an ti a.

4 Upa 24-te leh thil nung palite chuan lalṭhutthlênga ṭhu Pathian chu bawkkhupa chibai bûkin: “Amen! Jaa* chu fak rawh u!” an ti a.

5 Tin, lalṭhutthlêng aṭanga aw lo chhuak chuan: “Nangni, amah ṭihtu leh mi lian leh mi tê, a bâwih zawng zawngte u, kan Pathian chu fak rawh u,” a ti a.

6 Mipui tam tak aw ang leh tui luang ri hum hum ri ang leh khawpui nasa tak ri ang hi ka hria a. Anni chuan: “Jaa* chu fak rawh u, Engkimtithei kan Pathian Jehova* chuan Lal niin ro a rêl ṭan ta si a. 7 Lâwm a, nasa taka hlimin amah i chawimawi ang u, Berâm No nupui neih hun chu a thlen tâk avâng leh a nupui tûr pawh a inpeih tawh avângin. 8 A nupui tûr chu puan zai sîn vâr leh fai taka inthuam phalsak a ni a, puan zai sîn chuan mi thianghlimte thil tih felte a entîr a ni,” an ti a.

9 Tin, vântirhkoh* chuan ka hnênah, “Heti hian ziak rawh: Berâm No nupui neihnaa ruai ṭheh tûra sâwmte chu an hlim e,” tiin min hrilh a. Ani chuan: “Hêng thute hi Pathian thu dik a ni,” tiin min hrilh bawk a. 10 Chu veleh, amah chibai bûk tûrin a ke bulah ka bawkkhup a. Ani erawh chuan ka hnênah: “Eng thil nge i tih tâk? Hetiang chuan ti suh! Kei chu Isua Krista chungchâng hriattîrtu nangmah leh i unaute bâwihpui mai ka ni. Pathian chauh chibai i bûk tûr a ni! Hrilh lâwknate’n a tum chu Isua chungchâng thu dik sawi a ni si a,” a ti a.

11 Tin, vân a lo inhawng a, ngai teh! Sakawr vâr ka hmu a. A chunga chuang hming chu Rinawm leh Dik Taka a ni a, ani chuan fel taka rorêlin râl a do ṭhîn. 12 A mitte chu mei alh ang a ni a, lallukhum tam tak a khum a, a chungah chuan tu ma hriat loh, amah chauhvin a hriat hming a inziak a, 13 kawrfual thisen kai* a ha a, Pathian Thua tia koh a ni. 14 Tin, puan zai sîn vâr leh fai taka inthuam vân sipaite chuan, sakawr vâr chunga chuangin ani chu an zui bawk a. 15 A kâ aṭang chuan hnamte a tih boral theihna tûrin ngûnhnâm hriam leh sei tak a chhuak a, anni chu thîrtiangin ro a rêlsak ang. Chu bâkah, Pathian Engkimtitheia thinurna nasa tak uain sâwrna khurah chuan a rap sâwr bawk ang. 16 A kawrfuala a malpui zâwnah chuan, lalte Lal leh lalpate Lalpa, tih a inziak a.

17 Tin, nîa ding vântirhkoh ka hmu bawk a, ani chuan vânlaizâwla thlâwk sava zawng zawngte hnênah chuan aw ring takin: “Pathian ruai ropui tak ṭheh tûrin lo kal khâwm rawh u, 18 lal sa te, sipai hotu sa te, mi chak sa te, sakawr sa te, an chunga chuang sa te leh, mi zalên leh bâwihte aṭanga mi lian leh mi tête thlenga mi zawng zawng sa in ei theihna tûrin,” a ti a.

19 Sakawlh leh leia lalte leh an sipaite chu sakawr chunga chuang leh a sipaite do tûra an kal khâwm ka hmu a. 20 Tin, sakawlh chu an man a, a rualin zâwlnei der, sakawlh hmaa a thil mak tihte hmanga sakawlh chhinchhiahna neitute leh a lim chibai bûktute bumtu pawh an man tel ve a. Sakawlh leh zâwlnei der chu kâta kâng meidîlah a nung chungin an paih lût a. 21 Mi dang zawngte erawh chu sakawr chunga chuanga kâ aṭanga lo chhuak ngûnhnâm khân tih hlum an ni a. Sava zawng zawngte chuan chûng mite sa chu puar takin an ei ta a.