Kolossa Khuaa Mite Hnêna Lehkhathawn
4 Nangni pute u, nangmahni ngei pawhin vânah Pu in nei tih hriain, in bâwihte chu fel tak leh dik takin cheibâwl rawh u.
2 Ṭawngṭai fan fan ula, lâwmthu sawi chungin harhvâng takin ṭawngṭai reng rawh u. 3 Chutih rualin, Pathianin thu puan chhuah theihna hun remchâng min pêk theihna tûr leh khaidiat ka bun nachhan, Krista chungchâng thurûk thianghlim kan puan chhuah theihna tûrin keini pawh min ṭawngṭaisak rawh u. 4 A nih dân tûr ang taka fiah taka ka puan chhuah theihna tûrin min ṭawngṭaisak bawk ang che u.
5 Kohhran pâwn lama mite zîngah chuan fing takin awm zêl ula, in hunte a ṭha thei ang berin hmang ang che u.* 6 Mi tin engtia chhân tûr nge tih in hriat theih nân, in thusawite chu chîa al, khawngaihna tel ni reng rawh se.
7 Ka unaupa duh tak, rawngbâwltu rinawm leh Lalpaa ka bâwihpui Tukika hian ka chanchin zawng zawng a hrilh ang che u. 8 Kan chanchin in hriat theihna tûr leh in thinlung a tih thlamuan theihna tûrin, ani hi in hnênah ka rawn tîr a ni. 9 In zînga mi ka unaupa rinawm leh duh tak Onesima rualin a lo kal ang a, anni chuan heta thil thleng zawng zawng hi an hrilh ang che u.
10 Ka tânpui Aristarka hian chibai a bûk a che u. Chutiang bawkin, Barnaba unaupa Marka (a lo kal chuan lo lâwm tûra a chungchânga kaihhruainate in dawn) leh, 11 serhtante zînga mi Justa tia koh, Isua te hian chibai an bûk a che u. Anni hi Pathian Ram tâna ka thawhpui awm chhun an ni a, nasa taka min thlamuantute an ni. 12 In zînga mi Krista Isua bâwih Epaphra hian chibai a bûk a che u. Pathian duh zâwng tinrênga puitling taka in awm reng theihna tûr leh nghet taka in awm theihna tûrin, in tân nasa takin a ṭawngṭai reng ṭhîn. 13 Ani hian in tân leh Laodikei leh Hierapoli khuaa mite tân theih tâwp a chhuah tih ka hriatpui si a.
14 Doctor duh tak Luka’n chibai a bûk che u a, Dema pawhin chibai a bûk bawk a che u. 15 Laodikei khuaa unaute leh Numphii leh a ina inkhâwm ṭhîn kohhran kha chibai min bûksak ang che u. 16 He lehkhathawn hi in chhiar zawhah Laodikei khuaa kohhranah pawh chhiar a nih theih nân thawn ula; tin, an hnêna ka lehkhathawn pawh in zînga chhiar a nih theih nân dîl ang che u. 17 Chu bâkah, Arkippa hnênah khân: “Lalpa hnên aṭanga i dawn rawngbâwlna kha hlen chhuak tûrin theih tâwp chhuah zêl rawh,” tiin hrilh ang che u.
18 Hei hi kei Paula’n ka kut ngeia ka ziah, chibai ka bûkna che u a ni. Ka khaidiat bunte hi hre reng ang che u. Pathian khawngaihna nasa tak in hnênah awm rawh se.