Jakoba Lehkhathawn
4 In zînga indonate leh inbeihnate hi khawi aṭanga lo chhuak nge? Nangmahni* thunun tuma beitu in tisa châknate aṭanga lo chhuak a ni lo vem ni? 2 Thil in châk a, in nei si lo va, huatna* leh îtsîkna in neih phah a; chuti chung pawhin, in thil châkte chu in nei thei chuang si lo. In inbeiin, in indo va. In dîl loh avângin in nei lo a ni. 3 In dîl pawhin, in dîl chhan a dik loh avângin in dawng lo, in tisa châkna tih puitlinna atân chauhva dîl in ni si a.
4 Uirenute u,* khawvêl ṭhian nih hi Pathian hmêlma nihna a ni tih in hre lo vem ni? Chuvângin, tu pawh khawvêl ṭhian nih duh chu Pathian hmêlmaah a insiam ṭhîn. 5 A nih leh, Pathian Lehkha Thuin: “Keimahnia awm îtsîkna avângin thil hrang hrang châkna kan nei reng a ni,” tia a sawi hian chhan awm lovin a sawi in ring em ni? 6 Nimahsela, îtsîkna aiin Pathian pêk khawngaihna nasa tak chu a ropui zâwk a ni. Chuvângin, Pathian Lehkha Thuin: “Pathianin mi chapote a dodâl a, mi inngaitlâwmte erawh chu khawngaihna nasa tak a pe ṭhîn,” tiin a sawi.
7 Chutichuan, Pathian hnênah intulût ula, Diabola erawh chu dodâl rawh u; tichuan, a tlânsan ang che u. 8 Pathian hnaih rawh u; tichuan, ani’n a hnaih ang che u. Nangni mi sualte u, in kutte sil fai ula; nangni rilru mumal nei lote u, in thinlung ti thianghlim rawh u. 9 Hrehawm ula, lungngai ula, ṭap rawh u. In nuihna chu lungngaihnaah chang sela, in lâwmna chu beidawnnaah chang rawh se. 10 Jehova* mit hmuhah inngaitlâwm ula; tichuan, a chawisâng ang che u.
11 Unaute u, in sawichhe tawn tawh suh u. Tu pawh a unau sawichhia emaw, sawisêl emaw chuan dân a sawichhiain, a sawisêl a ni. Tin, dân i sawisêl chuan dân zâwmtu ni lovin, rorêltu i ni zâwk e. 12 Dân Petu leh Rorêltu pakhat chauh a awm, chhandam theitu leh ti boral theitu chu. Nimahsela, i ṭhenawm sawisêl tûrin tu nge maw i nih le?
13 Tin, nangni: “Vawiinah emaw, naktûkah emaw chu khuaah chuan kan kal ang a, chutah chuan kum khat kan châm ang a, kan sumdâwng ang a, hlâwkna kan hmu ang,” titute u, 14 naktûkah in chungah eng nge thleng dâwn in hre si lo. Ṭiauchhûm rei lo tê lo lang a, ral leh mai ṭhîn ang hi in ni si a. 15 Chu aiin: “Jehova* duh zâwng a nih chuan kan dam ang a, chumi khami chu kan ti ang,” tiin in sawi zâwk tûr a ni. 16 Nimahsela, in lo chapovin, in inchhuang a. Chutianga inchhuan chu sual a ni. 17 Chuvângin, tuin emaw thil dik tih tûr hriaa a tih si loh chuan, chu chu a tân sual a ni.