Kolossa Khuaa Mite Hnêna Lehkhathawn
3 Nimahsela, Krista ruala kaihthawha in awm tawh chuan, Pathian ding lama Krista ṭhutna, chung lama thil awmte chu zawng zêl rawh u. 2 Lei lama thil awmahte ni lovin, chung lama thil awmahte chuan in rilru nghat tlat rawh u. 3 In thi tawh a, in nunna chu Pathian nêna inpumkhat Krista hnênah thuhrûkin a awm si a. 4 Kan nunna Krista chu tih lana a awm hunah chuan, nangni pawh ama ruala ropui taka tih lanin in awm ve ang.
5 Chuvângin, in taksa pêng leia awm nungchang bawlhhlawhna te,* thianghlim lohna te, tisa châkna thunun lohna te, châkna ṭha lo te leh, duhâmnate chu (chu chu milem biakna a ni) ti hlum rawh u. 6 Chûng thil titute chungah chuan Pathian thinurna a lo thleng ang. 7 Tûn hmain nangni pawh chutiang chuan in nun ṭhin kha. 8 Nimahsela, tûnah chuan hêng thil zawng zawng: thinurna te, thinrimna te, sualna te leh, sawichhiatnate hi in bânsan tûr a ni a, in kâ aṭangin ṭawngkam zahmawh a chhuak tûr a ni lo. 9 Dâwt inhrilh tawn suh u. In mize hlui* chu a thil tihte chawpin hlîp thla ula, 10 hriatna dik avânga lo awm mize thar, a Siamtu anpuia siam thara awm mêk chuan inthuam rawh u. 11 Chutah chuan Grik mi emaw, Juda mi emaw, serhtan emaw, serhtan loh emaw, ram dang mi emaw, Skuthia* mi emaw, bâwih emaw, mi zalên emaw a awm theih loh; nimahsela, Krista chu engkim a ni a, engkimah a awm bawk a ni.
12 Pathian mi thlan, a mi thianghlimte leh a fa duh takte in nih angin khawngaihna leh hmangaihna te, ngilneihna te, inngaihtlâwmna te, nunnêmna* te leh, dawhtheihnate chuan inthuam rawh u. 13 Tu pawhin mi dang chungah lungnih lohna a nei a nih pawhin, indawh tawnin inngaidam tawn zêl rawh u. Jehova’n* a ngaidam che u ang bawk khân, in ngaidam ve tûr a ni. 14 Chûng zawng zawng bâkah chuan hmangaihnain inthuam rawh u, chu chu mite inpumkhattîrtu phuar famkimna a ni si a.
15 Tin, Krista thlamuanna chuan in thinlungah rorêl* rawh se, chu thlamuanna chuan taksa pakhata koh in ni si a. Lâwmthu sawi fo ṭhîn ang che u. 16 Krista thu chu nangmahniah awm sela, finna zawng zawngin ti hausa che u rawh se. Fakna hla te, Pathian fakna te leh, lâwm taka thlarau lam hlate sain inzirtîrin infuih* tawn reng ula, thinlung takin* Jehova* tân hla sa rawh u. 17 Thu emaw, thil tih emawa in tih apiang chu Lalpa Isua hmingin ti vek ula, amah kal tlangin Pa Pathian hnênah lâwmthu sawi ang che u.
18 Nangni nupuite u, Lalpa zuitute tih tûr a nih angin, in pasalte lakah intulût rawh u. 19 Nangni pasalte u, in nupuite hmangaih zawm zêl ula, an lakah a lutukin thinrim* suh u. 20 Nangni fate u, engkimah in nu leh pate thu zâwm rawh u, chu chuan Lalpa a ti lâwm si a. 21 Nangni pate u, in fate ti thinur* suh u; chuti lo chuan, an lunghnual palh ang e. 22 Nangni bâwihte u, engkimah leia in pute thu zâwm rawh u; mihring tih lâwm tumtute ang leka an hmuh lai chauhva zâwm lovin, thinlung dik tak pu-a Jehova* ṭih chungin zâwm zâwk rawh u. 23 In tih apiang, mihring tân anga ti lovin, Jehova* tân anga ti zâwkin, in thinlung zawng zawngin ti rawh u. 24 Lâwmman atân Jehova* hnên aṭangin ro luah tûr in dawng dâwn tih in hre si a. In Pu, Krista tân rim takin thawk rawh u. 25 Tu pawh thil dik lo titu chuan a thil dik lo tih man chu a hmu ngei ang, Pathian chuan duhsak bîk nei lovin mite chungah ro a rêl dâwn si a.