Matthaia Ziak

20 “Vân Ram chu huan neitupa, a grêp huana hnathawk tûrte zawnga zîng taka kal chhuak ang chu a ni a. 2 Hnathawktu tûrte nên ni khata denarii* khat hlawh tûra an inrem hnu chuan, anni chu a grêp huanah a tîr ta a. 3 Zîng dâr kua* vêla a va chhuah chuan, bazâra hnathawh tûr nei lova dingte chu a va hmu a. 4 Chûng mite hnênah chuan, ‘Nangni pawh ka grêp huanah hna va thawk ula, in hlawh zât tûr dik tak ka pe ang che u,’ a ti a. 5 Tichuan, an kal ta a. Tin, chhûn dâr sâwm pahnih* leh tlai lam dâr thum* vêlah kal chhuak lehin, hnathawktu dang a va ruai leh a. 6 A tâwp nân, tlai lam dâr nga* vêlah a kal chhuak leh a, mi ṭhenkhat ding mai maite chu a va hmu a, an hnênah, ‘Engvângin nge nilênga hnathawk lova in awm?’ tiin a zâwt a. 7 Anni chuan, ‘Tu man min rawih loh vâng a ni,’ tiin an chhâng a. Tin, an hnênah, ‘Nangni pawh ka grêp huanah va thawk ve rawh u,’ a ti a.

8 “Tlaiah chuan, huan neitupa chuan a grêp huan enkawltu hnênah, ‘Hnathawktute ko khâwm la, a thawk hnuhnûng ber aṭanga ṭanin a thawk hmasa ber thlengin an hlawh pe rawh,’ a ti a. 9 Tlai lam dâr nga* vêla thawk ṭante an lo kal chuan, an vaiin denarii* khat an dawng ṭheuh va. 10 Tin, nilênga thawkte an lo kal chuan an dawn tam deuh an inring a; nimahsela, anni pawh denarii* khat tho pêk an ni a. 11 Tichuan, grêp huan neitupa chungah an phunnawi ta a. 12 ‘Hêng a hnuhnûng berte hian dârkâr khat chauh an thawk si a; chuti chung pawhin, keini ni sa hnuaia nilênga rim taka thawkte i pêk zât tho i pe dâwn a maw?’ an ti a. 13 Nimahsela, ani chuan an zînga pakhat hnênah chuan, ‘Ṭhianpa, i chungah thil tih dik loh ka nei lo ve. Denarii* khat hlawh tûrin kan inrem a ni lâwm ni? 14 I hlawh hi la la, kal mai rawh. Hêng a hnuhnûng bera thawkte hi i hlawh ang zât bawk ka pe duh a ni. 15 Ka sum leh pai hi ka duh dân dâna ka hman a thiang lo vem ni? Nge ni a, an chunga ka ṭhat* avângin anni chu i îtsîk* zâwk?’ tiin a chhâng a. 16 Chutiang kawng chuan, a hnuhnûng berte chu a hmasa ber an la ni ang a, a hmasa berte pawh a hnuhnûng ber an la ni ang,” a ti a.

17 Tin, Jerusalem pana an chhoh laiin, Isua’n zirtîr 12-te chu a hruai hrang a, an hnênah: 18 “Ngai teh u! Jerusalem khuaah kan chhoh dâwn hi, mihring Fapa hi puithiam lalte leh dân hre mite hnênah pêk a ni ang a. Anni chuan thi tûrin ro an rêlsak ang. 19 Nuihza siam nâna hman a nih theih nân te, savun hruihruala vuak a nih theih nân te leh, bana tih hlum a nih theih nânte hnam dangte hnênah an pe ang a; nimahsela, ni thum nîah a tho leh ang,” a ti a.

20 Tin, Zebedaia nupui chu a fapa pahnihte hruaiin Isua hnênah a lo kal a, bawkkhupa chibai bûkin thil eng emaw a dîl a. 21 Isua’n a hnênah: “Eng nge i duh?” a ti a. Ani chuan: “I Lalramah hêng ka fapa pahnihte hi pakhat i ding lamah, pakhat i vei lamah ṭhu tûrin thu pe ang che,” tiin a chhâng a. 22 Isua erawh chuan: “In thil dîl hi in hre lo a ni. Ka no hi min ṭâwmpui* thei em ni?” a ti a. Anni chuan: “Thei e,” an ti a. 23 Tichuan, an hnênah: “Ka no chu in in ngei ang; nimahsela, ka ding lam leh vei lama ṭhu tûra thupêk chu ka tih theih a ni lo, ka Pain a buatsaihsakate tân zâwk a ni,” a ti a.

24 Mi dang sâwmte’n chu chu an hriat chuan, unau pahnihte chungah chuan an lâwm lo hle a. 25 Mahse, Isua’n anniho chu kovin an hnênah: “Hnam dangte chu an rorêltute an chungah an inti lal hle a, an mi ropuite pawhin an chungah thu an nei hle bawk tih in hria. 26 Chutiang chu in zîngah erawh chuan a ni tûr a ni lo; tu pawh in zînga ropui duh chuan in rawng a bâwl zâwk tûr a ni a, 27 tu pawh in zînga hmasa ber nih duh chu in chhiahhlawhah a awm tûr a ni. 28 Mihring Fapa hi rawngbâwlsaka awm tûr ni lovin, rawngbâwl tûr leh mi tam tak tlan nâna a nun pe tûr zâwka a lo kal ang hian,” a ti a.

29 Tin, Jeriko khua aṭanga an kal chhuah chuan, mipui tam takin amah chu an zui a. 30 Ngai teh u! Kawng sîra ṭhu mitdel pahnihin Isua a lo kal tih an hriat chuan: “Lalpa, Davida Fapa, min khawngaih* rawh!” tiin an au va. 31 Nimahsela, mipuite chuan ngawi tûra hrilhin anni chu an hau va; anni erawh chu ring lehzualin: “Lalpa, Davida Fapa, min khawngaih* rawh!” tiin an au va. 32 Tichuan, Isua chu a ding a, anni chu kovin an hnênah: “Eng nge tihsak che u ila in duh?” tiin a zâwt a. 33 Anni chuan a hnênah: “Lalpa, kan mit min tih vârsak rawh,” tiin an chhâng a. 34 Isua chuan a khawngaih êm avângin an mit a khawihsak a, khua an lo hmu thei ta nghâl a; tichuan, amah chu an zui ta a.