Petera Lehkhathawn Pakhatna

4 Krista khân tisaah hrehawm a tuar avângin, nangni pawh Krista rilru put hmang ang neiin inbuatsaih rawh u, tisaa hrehawm tuartu chuan thil sual tih a bânsan tawh si a; 2 he leia a dam chhûng zawng* mihring châk zâwng ang ni tawh lo va, Pathian duh zâwng anga a hman theihna tûrin. 3 Khawvêl mite duh zâwng tih nân tûn hmaa hun in lo hman ṭhin kha a tâwk tawh e; tîmna nei lova thil sual tihna te,* châkna thunun lohna te, nasa taka zu inna te, hlimhlawp bâwlna te, zu ina intihhlimna te leh, dânin a khap milem biaknatea in inhman ṭhin kha. 4 Anni chuan an nawmsipbâwl anga in bâwl ve tawh loh avângin mak an ti a, an sawichhia che u a ni. 5 Chûng mite chuan mi nung leh mitthite rorêlsak tûra inpeiha hnênah chuan an chanchin an la sawi ang. 6 A nihna takah chuan, mihringte thlîrna aṭanga tisaa rorêlsak ni mah sela, Pathian thlîrna aṭanga thlarauva kaihhruaia an awm theihna tûrin mitthite hnênah pawh chanchin ṭha puan chhuah a ni.

7 Nimahsela, thil zawng zawng tâwpna chu a hnai ta. Chuvângin, rilru fîm tak pu ula, ṭawngṭai tûrin inpeih* reng rawh u. 8 Eng dang zawng aiin, nasa takin inhmangaih tawn rawh u, hmangaihnain sual tam tak a khuh ṭhîn si a. 9 Phunnawi lovin thinlung takin inlâwm tawn rawh u.* 10 Kawng chi hrang hranga lantîr Pathian khawngaihna nasa tak enkawltu ṭhate in nih angin, mi tinin thilthlâwnpêk in dawn apiang chu rawng inbâwlsak tawn nân hmang rawh u. 11 Tu pawhin thu a sawi chuan, Pathian hnên aṭanga thu puan chhuah thianghlimte sawi rawh se; tu pawhin rawng a bâwl chuan, Pathian pêk chakna rinchhanin bâwl rawh se; chutichuan, engkimah Isua Krista avângin Pathian chu chawimawiin a awm thei ang. Ropuina leh chakna chu chatuanin a ta a ni si a. Amen.

12 Duh takte u, mei ang fiahna nasa tak in hmachhawnte hi in chunga thil mak thleng anga ngaiin mak ti suh u. 13 Chu aiin, Krista hrehawm tawrh ṭâwmpuitute in nih avângin hlim rawh u; tichuan, a ropuina tih lan a nih hunah pawh hlimin nasa takin in lâwm thei ang. 14 Krista hming avânga sawichhiata* in awm chuan in hlim e; ropuina thlarau, Pathian thlarau chu in chungah a awm si a.

15 Nimahsela, in zînga tu mahin tualthattu a nih vâng emaw, rûkru a nih vâng emaw, thil sual titu a nih vâng emaw, mi dangte nuna a inrawlh vâng emawin tuar suh se. 16 Amaherawhchu, tu pawhin Kristian a nih avânga a tuar a nih chuan, zak lo sela, Kristian hming pu chungin Pathian chawimawi zêl zâwk rawh se. 17 Tûn hi Pathian chhûngte chunga ṭan tûr rorêlna atâna hun ruat chu a ni. Keimahniah ṭan hmasak a nih si chuan, Pathian chanchin ṭha âwih lotute chungah chuan eng tak thleng ang maw? 18 “Mi fel mahin Pathian chhandam a nih theih nâna theih tâwp a chhuah a ngaih chuan, Pathian ngaihsak lo leh mi sual chungah chuan eng tak thleng ang maw?” 19 Chuvângin, Pathian duh zâwng an tih avânga hrehawm tuartute chuan, thil ṭha an tih rualin Siamtu rinawm kutah inkawltîr reng rawh se.