Johana Hnêna Thu Puan Chhuah
1 Hei hi Isua Krista thu puan chhuah, Pathianin thil lo thleng thuai tûr a bâwihte hriattîr tûra a hnêna a pêk a ni a. Isua chuan a vântirhkoh tîrin a bâwih Johana hnênah chhinchhiahnain chu chu a hrilh a ni. 2 Johana chuan Pathianin a hnêna a pêk thu leh Isua Krista thusawi zawng zawng,* a thil hmuh zawng zawngte chu a puang chhuak a. 3 He hrilh lâwkna thu mi dangte chhiarsaktu leh a chhûnga inziakte hriaa pawmtute chu an hlim e, hun ruat chu a hnai tawh si a.
4 Kei Johana hian Asia rama* kohhran pasarihte hnênah he thu hi ka ziak a ni:
“Pathian awm mêka leh awm tawha leh lo la awm tûra” leh, a lalṭhutthlêng hmaa thlarau pasarihte hnên aṭanga khawngaihna nasa tak leh thlamuanna* in hnênah awm sela, 5 “Thuhretu Rinawm” Isua Krista, “thihna ata piang hmasa ber” leh “leia lalte chunga Rorêltu” hnên aṭanga khawngaihna nasa tak leh thlamuanna* pawh in hnênah awm bawk rawh se.
Min hmangaiha ama thisen ngeia kan sualte lak aṭanga min chhuah zalêntu, 6 a Pathian leh Pa tâna lalte leh puithiamtea min siamtu hnênah chuan ropuina leh chakna chatuanin awm rawh se. Amen.
7 Ngai teh u! Ani chu chhûm zîngah a lo kal dâwn e, mit tinrêngin an hmu ang a, amah chhuntute ngei pawh khân an hmu ang; tin, leia hnam zawng zawngte chuan amah avângin lungngaiin an âwm an chûm ang. Ni e, chu chu a thleng ngei dâwn a ni. Amen.
8 Pathian Jehova* chuan, “Kei Alpha leh Omega,* awm mêka leh awm tawha leh lo la awm tûra, Engkimtitheia chu ka ni,” tiin a sawi a ni.
9 Kei Johana, in unaupa leh Isua hnungzuitu ka nih anga hrehawmna te, lalram te leh, chhelnate ṭâwmpuitu che u hi Pathian chungchâng sawi tûr leh Isua chungchâng hriattîr tûrin Patmos thliarkârah ka awm a. 10 Thlarauva thâwk khumin Lalpa nîah ka lo awm a, ka hnung lam aṭangin tawtawrâwt ri ang aw ring tak ka hria a. 11 Chu aw chuan: “I thil hmuh tûr chu lehkha zialah ziak la, kohhran pasarih Ephesi kohhranah te, Smurna kohhranah te, Pergamos kohhranah te, Thuatira kohhranah te, Sardis kohhranah te, Philadelphia kohhranah te leh, Laodikei kohhranahte thawn rawh,” tiin a sawi a ni.
12 Min betu chu hmuh tuma ka han lehhawi chuan rangkachak khâwnvâr dahna pasarih ka hmu a, 13 khâwnvâr dahna zîngah chuan tu emaw mihring fapa ang tak a kê thlenga sei kawrfual ha leh a âwma rangkachak puan hrêng ka hmu bawk a. 14 Chu bâkah, a sam chu sahmul vâr tak ang, vûr ang maia vâr a ni a, a mitte chu mei alh ang mai a ni, 15 a kête chu rawhtuina meia rawh tui, dâr ṭha chî angin a tlê a, a aw chu tui luang ri hum hum ri ang a ni. 16 A kut ding lamin arsi pasarih a keng a, a kâ aṭang chuan ngûnhnâm hriam tawn, hriam tak leh sei tak a chhuak a, a hmêl chu ni sat vânglai tak anga êng a ni. 17 Amah ka hmuh chuan a ke bulah mitthi ang maiin ka tlu a.
A kut ding lam chu ka chungah nghatin ka hnênah: “Hlau suh. Kei hi Hmasabera leh Hnuhnûngbera, 18 mi nunga chu ka ni a, ka lo thi a; nimahsela, ka lo nung leh ta a, chatuanin ka nung bawk ang, thihna leh Thlân* chabite chu ka nei a ni. 19 Chuvângin, i thil hmuh tawhte leh i hmuh mêkte leh i la hmuh tûrte chu ziak ang che. 20 Ka kut ding lama i hmuh arsi pasarih leh khâwnvâr dahna pasarihte thurûk thianghlim chu hei hi a ni: Arsi pasarihte chu kohhran pasarih vântirhkohte an ni a, khâwnvâr dahna pasarih chu kohhran pasarihte an ni.