Thessalonika Khuaa Mite Hnêna Lehkhathawn Pakhatna

3 Tichuan, in chanchin hriat kan châk tawh êm avângin, keimahni chauhva Atheni khuaa châm chhunzawm zêl a ṭhat ber kan ring a. 2 Kan unaupa Timothea, Krista chanchin puan chhuahnaa Pathian rawngbâwltu* hi in rinna kawnga ti nghet* tûr che u leh thlamuan tûr che uin kan rawn tîr a ni, 3 hêng hrehawmnate avânga tu mah tih nghîna* in awm lohna tûrin. Chutiang tawrhnate chu kan pumpelh thei lo* tih nangmahni ngeiin in hre si a. 4 In hnêna kan awm lai khân hrehawm kan tawrh tûr thu kan hrilh ṭhin che u kha, in hriat angin chutiang ngei chuan a thleng a ni. 5 Chuvângin, ka nghah theih tâk lovah chuan, eng emawti taka Thlêmtuin a thlêm che u a, kan thawhrimnate kha eng mah lova a chan lohna tûrin, in rinawmzia ka hriat theih nân Timothea hi ka rawn tîr ta a ni.

6 Nimahsela, Timothea chu in hnên aṭangin a lo thleng leh ta a, ani chuan in rinawmna leh hmangaihna te, a ṭha zâwnga min hriat reng ṭhin thu te leh, hmuh che u kan châk ang bawka nangni pawhin hmuh min châk thu chanchin lâwmawmte min rawn hrilh a. 7 Chuvângin, unaute u, kan manganna* leh hrehawmna zawng zawngah hian nangmahni avâng leh rinawmna in lantîr avângin thlamuang takin kan awm ta a ni. 8 Tûnah chuan Lalpaah in ding nghet tih kan hria a, kan lo chak thar leh* ta. 9 In zâra kan Pathian hmaa kan lâwmna nasa tak avâng hian, engtin nge Pathian hnênah kan lâwmzia kan lantîr lêt ve theih ang? 10 Kan hmuh theihna tûr che u leh in rinna ti chak tûra kan ṭanpui theihna tûr che uin, a chhûn a zânin ṭhahnemngai takin kan ṭawngṭai ṭhîn.

11 Kan Pathian, Pa ngei leh kan Lalpa Isua chuan in hnêna lo kal tûrin kawng min hawnsak rawh se. 12 Chu bâkah, kan hmangaih êm êm che u anga inhmangaih tawn a, mi dangte hmangaih lehzual tûrin Lalpa chuan chêttîr che u rawh se. 13 Tichuan, a mi thianghlim zawng zawngte nêna kan Lalpa Isua lo awm leh hunah, kan Pathian leh Pa hmaah thianghlimna kawnga sawisêlbovin in thinlung a ti nghet ang.