Thessalonika Khuaa Mite Hnêna Lehkhathawn Pahnihna

2 Nimahsela, unaute u, kan Lalpa Isua Krista lo awm lehna leh, a hnêna hruai khâwm kan nih hun tûr chungchânga kan ngen duh che u chu, 2 “Jehova* nî a thleng reng tawh,” tia mite’n an sawi avângin buai lo ula, chu thu chu Pathian hnên aṭanga an dawn emaw, mi dang hnên aṭanga an hriat anga an sawi emaw, kan lehkhathawn an chhiarna aṭanga an hriat anga an sawi emaw a nih pawhin buai hek suh u.

3 Tu man eng kawng mahin hruai bo* che u suh se, kalpênna a lo thlen hmasak phawt a, dân bawhchhepa, boralna fapa a lo lan hma loh chuan, chu nî chu a lo thleng dâwn si lo. 4 Ani chu dodâltu a ni a, Pathian biak inah ṭhu a, vântlâng hmaa pathian anga a inlantîr theihna tûrin, mite’n pathiana an vuah emaw, chibai an bûk zawng zawng emaw chungah a inchawisâng ang. 5 In hnêna ka awm lai khân, chûng thilte chu ka hrilh ṭhîn che u tih in hre reng lo vem ni?

6 Ama hun taka tih lana a awm theihna tûrin, tûnah engin nge khuahkhirh rih in hria e. 7 Chu dân bawhchhiatna thurûk chuan tûnah pawh a thawk mêk a ni; nimahsela, a khuahkhirhtu chu lâk bova a awm hma loh chuan hetiang hian a la awm rih ang. 8 Tichuan, dân bawhchhepa chu tih lan a ni tawh ang a, ani chu Lalpa Isua’n a kâa thawin* a ti boral ang a, a lo awm lehna inlârnain eng mah lovah a chantîr ang. 9 Nimahsela, dân bawhchhepa chu Setana thununna hnuaiah a lo lang ang a, thiltihtheihna tinrêngte leh dâwt chhinchhiahnate leh thil makte a ti ang a, 10 boral mêkte chu fel lohna tinrêng hmangin a bum ang, chhandam an nih theihna tûr thutak hmangaihna an nei si lo va, chu chu an tân hremna ang a ni. 11 Chuvâng chuan, dâwt thute an rin theihna tûrin, Pathianin zirtîrna dik lo buma an awm a phal a ni. 12 Tichuan, thutak ring lo va, fel lohna an lawm zâwk avângin, an vaiin thiam loh chantîr an ni thei ang.

13 Nimahsela, Jehova’n* a hmangaih unau duh takte u, nangmahni avânga Pathian hnêna lâwmthu sawi fo tûr rêng kan ni, a thlarauva a tih thianghlim che u avâng leh thutak in rinna avângin Pathianin chhandam ni tûrin a tîr aṭangin a thlang tawh si che u a. 14 Kan Lalpa Isua Krista ropuina in chan theihna tûrin, kan chanchin ṭha puan chhuah hmang hian chumi atân chuan a ko che u a ni. 15 Chutichuan, unaute u, ding nghet ula, ṭawngkam emaw, kan lehkhathawn emaw hmanga zirtîrna in dawn thurochhiahte kha vawng tlat rawh u. 16 Chu bâkah, kan Lalpa Isua Krista ngei leh Pathian kan Pa, min hmangaihtu leh khawngaihna nasa tak avânga chatuan daih thlamuanna leh beiseina ṭha min petu chuan, 17 in thinlungte thlamuanin, thil tih ṭha leh thu ṭha tinrêngin ti nghet* che u rawh se.