Johana Hnêna Thu Puan Chhuah
13 Tin, tuifinriat kama ṭiauphovah chuan dragon chu a ding reng a.
Tuifinriat aṭang chuan sakawlh lu sarih leh ki sâwm nei lo chhuak ka hmu a, a kîahte chuan lallukhum sâwm a awm a, a lûahte chuan Pathian sawichhiatna hming a chuang ṭheuh va. 2 Sakawlh ka hmuh chu keitê ang a ni a; nimahsela, a kête chu savawm kê ang a ni a, a kâ chu sakeibaknei kâ ang a ni. Tin, dragon chuan sakawlh hnênah chuan a thiltihtheihna te, a lalṭhutthlêng te leh, thuneihna nasa takte a pe a.
3 Sakawlh lu pakhat chu thihpui khawp hial hliam tuarin ka hmu a; nimahsela, chu thihpui khawp hial hliam chu a lo dam ta a. Tichuan, leia mi zawng zawngin sakawlh chu ngaisâng tak chungin an zui a. 4 Sakawlh hnêna thuneihna a pêk avângin dragon chu chibai an bûk a. “Sakawlh ang hi tu nge awm? Tuin nge do thei ang?” tiin sakawlh pawh chu chibai an bûk a. 5 Thil ropui tak takte leh Pathian sawichhiatna thu sawina kâ a hnênah pêk a ni a, thla 42 chhûng a duh zâwng ti tûra thiltihtheihna a dawng bawk a. 6 Pathian hming leh a awmna leh vâna awmte hial sawichhe tûrin, Pathian sawichhe zâwngin a kâ a âng a. 7 Sakawlh chu mi thianghlimte a do leh a hneh phalsak a ni a; chi tinrêng te, mi tinrêng te, ṭawng tinrêng te leh, hnam tinrêngte chunga thuneihna pêk a ni bawk. 8 Khawvêl awm ṭan tirh ata Berâm No talh tawh nunna bu-a hming chuang lo, leia awm zawng zawngte chuan ani chu chibai an bûk ang.
9 Tu pawh beng nei chuan hre rawh se. 10 Tu pawh sala tâng tûr chu salah a tâng ang a. Tu pawh ngûnhnâma tu emaw ti hlumtu chu* ngûnhnâma tih hlum ngei tûr a ni. Chuvângin, mi thianghlimte tân chuan chhelna leh rinna neih a ngai a ni.
11 Tin, sakawlh dang lei aṭanga lo chhuak ka hmu a, berâm no kî ang ki pahnih a nei a, dragon angin a ṭawng ta a. 12 Chu sakawlh chuan sakawlh hmasa zâwk thuneihna neih ang zawng zawng kha sakawlh hmasa zâwk mit hmuhah chuan a hmang a. Tichuan, lei leh a chhûnga chêngte chu thihpui khawp hial hliam nei dam leh ta sakawlh hmasa zâwk kha chibai a bûktîr a. 13 Thil mak* ropui tak takte a ti a, mihringte mit hmuhah vân aṭangin leiah mei a tlâktîr hial a.
14 Sakawlh hmasa zâwk mit hmuha thil makte tih phalsak a nih avângin leia awmte chu a bum a; chutih rualin, ngûnhnâma hliam tuar la nung reng sakawlh hmasa zâwk lim siam tûrin leia awmte chu a hrilh bawk a. 15 Sakawlh hmasa zâwk chu a ṭawng theihna tûr leh amah chibai bûk duh lotu zawng zawng tih hlum an nih theihna tûrin, chu sakawlh chu sakawlh hmasa zâwk hnêna thaw* a pêk phalsak a ni a.
16 Chu sakawlh chuan mi zawng zawng—mi lian leh mi tê, mi hausa leh mi rethei, mi zalên leh bâwihte—chu an kut ding lamah emaw, an chalah emaw chhinchhiahna nei vek tûrin a nawr lui a ni; 17 sakawlh hming emaw, a hming number emaw chhinchhiahna neite chauh lo chuan tu mahin an lei emaw, an hralh emaw theih lohna tûrin. 18 Hemi chungchângah hian finna neih a ngai a ni: Tu pawh finna nei chuan sakawlh number chu chhût rawh se, mihring number a ni si a, a number chu 666 a ni.