Luka Ziak

23 Tin, mipuite chu an vaiin an tho va, Isua chu Pilata hnênah an hruai ta a. 2 Anni chuan: “He pa hian kan hnam a ti khawlo va, Kaisara hnêna chhiah chawi a khap a, Krista, lal a nih thu a sawi kan hria,” tiin an hêk a. 3 Pilata’n a hnênah: “Judate Lal i ni em?” tiin a zâwt a. Ani chuan a hnênah: “I sawi ang ngei chu a ni e,” tiin a chhâng a. 4 Tin, Pilata’n puithiam lalte leh mipuite hnênah chuan: “He paah hian sualna eng mah ka hmu lo,” a ti a. 5 Nimahsela, anni chu: “Galili aṭanga he lai hmun thleng hian, Judai ram pumah mite zirtîrin a fuihpawrh a ni,” tiin an ṭang tlat a. 6 Chu chu a hriatin, Pilata chuan ani chu Galili mi a nih leh nih loh a zâwt a. 7 Heroda rorêlna huam chhûnga awm a ni tih a hriat hnu chuan, chutih laia Jerusalema awm Heroda hnênah a tîr ta a.

8 Heroda’n Isua a hmuh chuan a lâwm hle a. A chungchâng tam tak a lo hriat tawh avângin, hun rei tak chhûng Isua chu hmuh a lo duh tawh a, a thil mak tih ṭhenkhat hmuh a inbeisei bawk a ni. 9 Tichuan, zawhna tam tak a zâwt a; nimahsela, pakhat mah a chhâng lo. 10 Puithiam lalte leh dân hre mite chu an ding reng a, nasa takin ani chu an hêk a. 11 Tin, Heroda leh a sipaite chuan hmusit takin an cheibâwl a, Heroda chuan puan ropui tak sintîrin nuihza siam nân a hmang a; tichuan, Pilata hnênah a tîr lêt leh a. 12 Chumi nî ngei chuan Heroda leh Pilata chu ṭhian an lo ni ta a, a hma zawng chuan an inngeih lo ṭhîn hle.

13 Pilata chuan puithiam lal te, rorêltu te leh, mipuite chu a ko khâwm a. 14 An hnênah: “He mi hi mite hel tûra fuihtu angin ka hnênah in rawn hruai a. Ngai teh u! In hmaah ka zâwt chiang a; nimahsela, in puhnaah hian a sualna eng mah ka hmu lo. 15 Heroda pawhin a hmuh loh avângin, kan hnênah a rawn tîr lêt leh a nih hi. En teh u, thihna khawp thil eng mah a ti lo. 16 Chuvângin, ka hrem ang a, ka chhuah mai ang,” a ti a. 17* —— 18 Nimahsela, mipuite chu: “He pa hi ti hlum la,* Barabba kha min chhuahsak rawh!” tiin an au va. 19 (Barabba chu khawpuia helna chhuak avâng leh tual thah avânga tân ina tâng a ni.) 20 Pilata chuan Isua chu chhuah a duh avângin anniho chu a be leh a. 21 Anni chu: “Banah khêngbet rawh! Banah khêngbet rawh!”* tiin an au va. 22 A vawi thumna atân: “Engvângin maw? He mi hian eng thil ṭha lo nge a tih? Amahah thihna khawp sual eng mah ka hmu lo; chuvângin, ka hrem ang a, ka chhuah mai ang,” a ti a. 23 Chu veleh nasa lehzuala nawrin, bana ti hlum tûrin ring takin an au va, an aw chuan a hneh ta a. 24 Tin, Pilata chuan an ngenna ang chuan thu a ti tlu ta a. 25 Helna avâng leh tual thah avânga tâng, chhuahsak tûra an ngen chu a chhuahsak a, Isua erawh chu an duh duha an tih atân a pe ta a.

26 Tin, an hruai laiin khawpui pâwn aṭanga lo kal Kurini khuaa mi Simona chu an lo ti ding a, nghaisakna ban* pu-a Isua zui tûrin thu an pe a. 27 Mipui tam takin Isua chu an zui a, chûng zîngah chuan hmeichhia lungngai taka an âwm inchûm inchûmte leh amah ṭahtute pawh an tel ve a. 28 Isua’n hmeichhiate lam chu hawiin an hnênah: “Jerusalem fanute u, min ṭah tawh suh u, nangmahni leh in fate tân ṭap zâwk rawh u. 29 Ngai teh u! Mite’n, ‘Hmeichhe ching te, naupai ngai lo pum te leh, nau hnêk ngai loh hnutê chu a nihlawh e!’ an tih nîte a lo la thleng ang. 30 Tichuan, tlâng hnênahte, ‘Min delh rawh!’ an la ti ang a, mual hnênahte, ‘Min khuh rawh!’ an la ti ang. 31 Thing a hrin lai maha chutianga an tih chuan, a ro hunah phei chuan engtin tak ti ang maw?” a ti a.

32 Tichuan, Isua ruala tih hlum tûrin dân bawhchhetu mi pahnih an hruai ve a. 33 Tin, Luruh an tih hmun an thlen chuan Isua chu banah an khêngbet a, dân bawhchhetute chu pakhat a ding lamah, pakhat a vei lamah an khêngbet tel ve a. 34 Isua erawh chuan: “Ka Pa, anni hi ngaidam rawh, an thil tih hi an hre lo a ni,” a ti a. Tin, a silhfênte insem tûrin ṭhum an vâwr a. 35 Mite chuan dingin an thlîr a. Nimahsela, rorêltute chuan nuihzatin: “Mi dang mah a chhandam alâwm; Pathian thlan Krista a nih chuan inchhandam ang hmiang,” an ti a. 36 Sipaite pawhin nuihza siam nân an hmang a, a hnênah lo kalin uain thûr an pe a: 37 “Judate Lal i nih chuan inchhandam ta che,” an ti a. 38 A chungah chuan: “Hei hi Judate Lal a ni,” tih inziak a awm bawk a.

39 Tin, dân bawhchhia an khai kân pakhat chuan Isua chu ânkhumin: “Krista i ni lo vem ni? Inchhandam la, keini pawh min chhandam ta che!” a ti a. 40 Pakhat zâwk chuan chhâng lêtin heti hian a hau va: “Pathian i hlau miah na nge? Thuhmun renga rorêlsak i nih hi. 41 Keini zawng hrem phû rêng kan ni, kan thil tih man kan hmu a ni si a; ani erawh hi chuan eng mah a ti sual lo,” a ti a. 42 Tin, ani chuan: “Isu, i Lalram i thlen hunah min hre reng ang che,” a ti a. 43 Isua’n a hnênah: “Vawiinah hian tih tak meuhvin ka hrilh a che, ka hnênah Paradis-ah i la awm ve ang,” a ti a.

44 Tichuan, chhûn dâr sâwm pahnih vêl* a ni a, chumi hun aṭang chuan tlai lam dâr thum vêl* thlengin lei pum pui chu a lo thim ta vek a. 45 Ni a êng ta lo va; tichuan, biak ina puanzâr chu a lai takah a thlêr ta a. 46 Tin, Isua chu: “Ka Pa, i kutah ka thlarau ka kawltîr e,” tiin ring takin a au va. Chu thu a sawi zawh chuan a thi ta a. 47 Thil thleng chu a hmuhin sipai za hotu chuan: “He mi hi mi fel tak a nih ngei hi,” tiin Pathian a chawimawi a. 48 Isua an tih hlum lai en tûra lo kal khâwm zawng zawngte’n thil thleng chu an hmuhin an âwmte chûm chungin an haw a. 49 A hmêlhriat zawng zawng leh Galili aṭanga amah rawn zuitu hmeichhiate chu hla takah an ding a, chûng thilte chu an thlîr a.

50 Tin, ngai teh! Judate Rorêlna Sâng Bera tel, mi ṭha leh fel tak Josefa a awm a. 51 (Ani chuan an ruahmanna leh an thil tih chu a thlâwp lo.) Ani chu Judai rama Arimathai khuaa mi a ni a, Pathian Ram nghâktu a ni. 52 Pilata hnênah kalin Isua ruang chu a dîl a. 53 Tichuan, a la thla a, puan zai sînin a tuam a, thlân,* lung ker kuak, tu mah an la zalh ngai lohnaah chuan a zalh ta a. 54 Chu chu Inbuatsaihna nî a ni a, Sabbath Nî a inṭan dâwn tawh a. 55 Tichuan, Galili aṭanga lo kal hmeichhiate chuan an zui zêl a, thlân* chu enin a ruang zalh a nih dân chu an hmu a. 56 Thil rimtuite leh hriak rimtuite buatsaih tûrin an kîr leh a; nimahsela, Sabbath Nîah chuan thupêk angin an châwl a.