Matthaia Ziak

14 Chutih lai chuan, Lal Heroda’n* Isua chanchin an sawi chu a lo hria a. 2 A chhiahhlawhte hnênah: “Ani chu Baptistu Johana kha a ni. Thihna ata a lo tho leh a; chuvângin, chûng thil mak tih theihna chu a nei a ni,” a ti a. 3 Heroda chuan a unaupa Philipa nupui Herodi avângin Johana chu mantîrin, phuar chungin tân inah a lo khung tawh si a. 4 Johana’n a hnênah: “Herodi nupuia i neih hi a thiang lo ve!” tia a lo hrilh avângin. 5 Johana chu tih hlum duh viau mah se, mipuite’n zâwlneia an ngaih avângin mipuite chu a hlau a ni. 6 Mahse, Heroda piancham an lawmnaah Herodi fanu a lâm a, chu chuan Heroda a ti lâwm hle a. 7 Chuvângin, a dîl apiang pe tûrin chhechhamin a tiam a. 8 Tichuan, a nuin a hrilh angin: “Thlêngin Baptistu Johana lû min pe rawh,” tiin a dîl a. 9 Lal chu a lungngai ta hle a; nimahsela, a chaw kîlpuite hmaa chhia a lo chham tawh avângin pe tûrin thu a pe a. 10 Tichuan, tân ina awm Johana lû tan tûrin mi a tîr a. 11 A lû chu thlênga rawn lain hmeichhe naupang chu an pe a, ani chuan a nu hnênah a kalpui ta a ni. 12 A hnuah a zirtîrte chuan a ruang va lain an phûm a; tichuan, Isua hnênah lo kalin, thil thleng chanchin chu an hrilh a. 13 Isua’n chu thu chu a hriatin, amah chauhva awm tûrin lawngin hmun fianrial lam a pan ta a; nimahsela, mipuite’n chu chu an hriatin, khaw hrang hrang aṭangin kein an zui a.

14 Vaukam a thlen chuan mipui tam tak chu a hmu a, a khawngaih ta êm êm a, an zînga dam lote chu a ti dam a. 15 Tin, tlai lam a lo nih chuan a zirtîrte chu a hnênah an lo kal a: “Kan awmna hi a fianrial si a, khua a tlai tawh bawk nên, mipuite hi khuaahte va kala an ei tûrte an lei theih nân kaltîr rawh,” an ti a. 16 Mahse, Isua erawh chuan an hnênah: “An kal a ngai lo ve, nangmahni’n ei tûr pe rawh u,” a ti a. 17 Anni chuan a hnênah: “Chhangpêr panga leh sangha pahnih chauh lo chu eng mah kan nei lo,” an ti a. 18 Ani chuan: “Ka hnênah rawn la rawh u,” a ti a. 19 Tichuan, mipuite chu phûla ṭhu tûrin a hrilh a. Chhangpêr panga leh sangha pahnih chu lain, vân lam hawiin a ṭawngṭai a,* chhangpêrte a phel zawh chuan zirtîrte hnênah a pe a, anni chuan mipuite chu an sem a. 20 Tin, an vaiin an ei a, an puar ta hlawm a, an ei bâng nawi chu an la khâwm a, bâwmrâng 12 khat lai a ni. 21 A eitute chu hmeichhia leh naupang tiam lovin, patling ringawt pawh 5,000 vêl an ni. 22 Tichuan, mipuite a hawtîr vêl chhûngin, a zirtîrte chu lawnga chuantîrin, dîl râl lehlama lo va kal hmasa tûrin a hrilh a.

23 Mipuite a hawtîr hnu chuan, ṭawngṭai tûrin tlângah amah chauhvin a chho va. Zân thlengin chutah chuan a awm a. 24 Chutih lai chuan, lawng chu vaukam aṭanga hla takah a awm a, thlîin an kal tum lohna lama a beng avângin tuifâwnin a vawrh a vawrh a. 25 Tin, zîng hma takah* tui chunga kalin anni chu a va pan a. 26 Zirtîrte’n tui chunga an lam pana a lo kal an hmuh chuan: “Saw saw eng thil nge ni ngai!” tiin an thlaphâng hle a, hlauvin ring takin an au ta chiam a. 27 Chu veleh Isua’n anni chu biain: “Hlau suh u! Keimah ka ni e,” a ti a. 28 Petera’n: “Lalpa, nangmah i nih chuan tui chunga i hnêna lo kal tûrin thu min pe rawh,” a ti a. 29 Isua’n: “Lo kal ta che!” a ti a. Petera chu lawng aṭangin a chhuk a, Isua lam panin tui chungah chuan a kal ta a. 30 Nimahsela, thlî na takin a tleh tih a hmuh chuan a hlau va, a pil ṭan ta mai a: “Lalpa min chhan rawh!” tiin a au va. 31 Isua chuan rang taka banin a chelh a, a hnênah: “Nang, rinna nei tlêm pa, engvângin nge i rinhlelh?” a ti a. 32 Lawnga an chuan hnu chuan thlipui tleh chu a bâng ta a. 33 Tin, lawnga chuangte chuan bawkkhupa chibai bûkin: “Pathian Fapa i lo nih ngei hi,” an ti a. 34 Tichuan, râl lehlam chu kaiin, Gennesaret ram chu an thleng ta a.

35 Chu rama mite chuan Isua a lo kal tih an hriat veleh, an chhehvêl ram zawng zawngah an hrilh darh a; tichuan, a hnênah dam lo zawng zawngte chu an rawn hruai hlawm a. 36 Tin, anni chuan a kawr hmâwr tal deh phalsak tûrin an dîl chiam a, a dek apiangte chu an dam ta zêl a.