Matthaia Ziak
2 Heroda* lal laia Judai rama Bethlehem khuaa Isua a pian hnuin, khawchhak lam aṭangin Jerusalemah arsi hmanga aienthiamte an lo kal a. 2 Anni chuan: “Judate lal lo piang chu khawiah nge a awm? Khawchhak lama kan awm laiin a arsi kan hmu a, amah chibai bûk tûrin kan lo kal a ni,” an ti a. 3 Chu thil a han hriat chuan, Lal Heroda chu a mangang ta a, Jerusalema mi zawng zawngte pawh an mangang ve a. 4 Tichuan, puithiam lalte leh dân hre mi* zawng zawngte chu ko khâwmin, Krista* pianna hmun tûr chu a zâwt a. 5 Anni chuan: “Judai rama Bethlehem khuaah a piang ang, zâwlneiin a ziah dân chu hetiang hi a ni: 6 ‘Nang, Bethlehem, Judai rama mi, Judai rama khawpuite zîngah hian i tê ber lo ve, i chhûng aṭangin rorêltu a lo chhuak ang a, ani chuan ka mi Israelte a vêng ang,’” tiin an chhâng a.
7 Tichuan, Heroda’n arsi hmanga aienthiamte chu a rûk têa kovin, arsi lo lan hun chu ngun takin a zâwt fiah a. 8 Anni chu Bethlehem khuaah a tîr a, an hnênah: “Kal ula, naupang chu ngun takin va zawng ula, in hmuh hunah amah chibai ka bûk ve theih nân min rawn hrilh leh ang che u,” tiin a hrilh a. 9 Lal thu an hriat hnu chuan an kal ta a; ngai teh, khawchhak lama an awm laia arsi an hmuh khân naupang awmna chung zâwn a thlen a, a din hma loh chu an hma a hruai zêl a. 10 Arsi chu a ding tih an hmuhin an lâwm hle a. 11 Tin, inah chuan an va lût a, a nu Mari bulah naupang chu an va hmu a, bawkkhupin chibai an bûk a, an ro bâwmte hawngin a hnênah thilpêk—rangkachak te, beraw te leh, murra-te* an pe a. 12 Amaherawhchu, Pathianin an mumangah Heroda hnêna kîr tawh lo tûra thu a pêk avângin, kawng dang zawhin an ramah an haw ta a ni.
13 An haw hnuin, Josefa mumangah Jehova* vântirhkoh a rawn inlâr a. A hnênah: “Tho la, Aigupta ramah naupang leh a nu hruaiin tlânchhia la, chutah chuan ka hrilh leh hma loh che chu awm rawh, Heroda’n naupang kha thah tumin a zawng dâwn a ni,” tiin a hrilh a. 14 Tichuan, Josefa chu a tho va, naupang leh a nu chu a zân a zânin Aigupta ramah a hruai ta a. 15 Heroda thih hma loh zawng chutah chuan an awm reng a ni. Jehova’n* a zâwlnei hmanga: “Aigupta ram aṭangin ka fapa ka ko chhuak a,” tia a lo sawi tawh kha a thlen famkim theih nân.
16 Heroda chu arsi hmanga aienthiamte’n an bum nia a inngaih avângin a thinrim hle a. Arsi hmanga aienthiamte hnêna arsi an hmuh hun a lo zawh chhuah tawh nêna inmilin, Bethlehem leh a chhehvêl zawng zawnga mipa naupang kum hnih achin hnuai lam that vek tûrin mite a tîr a. 17 Tichuan, Pathianin zâwlnei Jeremia hmanga a lo sawi tawh kha a thleng famkim a ni. 18 “Rama khuaah ṭap leh mitthi ngaia chiau vawng vawng thâwm an hria. A fate’n an thihsan avângin Rakili chu a ṭap a. Ani chu thlamuan theih a ni lo,” tih hi.
19 Heroda a thih hnu chuan, Jehova* vântirhkoh chu Aigupta rama awm Josefa mumangah a inlâr a. 20 A hnênah: “Tho la, naupang leh a nu hruaiin Israel ramah kal rawh, naupang tih hlum tumtute kha an thi tawh e,” tiin a hrilh a. 21 Tichuan, a tho va, naupang leh a nu hruaiin Israel ramah a lêt leh ta a. 22 Mahse, Judai ramah Heroda aiawhin a fapa Arkelausa’n ro a rêl tih a hriat chuan, chuta kal chu a hlau va. Chu bâkah, a mumanga Pathianin a hrilh angin Galili ramah a hruai ta zâwk a. 23 Tichuan, Nazaret khuaah a awmpui ta a ni. “Ani chu Nazaret* mi an ti ang,” tia zâwlneite’n an lo sawi lâwk tawh kha a thlen famkim theih nân.