Johana Hnêna Thu Puan Chhuah
20 Tin, leilâwt chabi leh khaidiat lian tak keng vântirhkoh pakhat vân aṭanga lo chhuk ka hmu a. 2 Ani chuan dragon, rûlpui tar, Diabol-Setana chu a man a, kum 1,000 chhûng atân a phuar a. 3 Kum 1,000 a tâwp hma loh chuan hnamte a bum leh tawh loh nân leilâwtah chuan paih lûtin a khâr khum a, a châr hnan ta a. Chumi hnuah chuan, rei lo te chhûng chhuah leh tûr a ni.
4 Tin, lalṭhutthlêngte ka hmu a, chuta ṭhute chu rorêl tûra thuneihna pêk an ni a. Tin, Isua chungchâng an hriattîr avâng leh Pathian chungchâng an sawi avânga an tih hlum tâkte* bâkah, sakawlh leh a lim chibai bûk duh lo va, an chalah leh an kuta sakawlh chhinchhiahna nei lo an tih hlum tâkte nunna* ka hmu bawk a. Anni chu an lo nung leh a, Krista nên kum 1,000 chhûng lal niin ro an rêl a. 5 Chu chu thawhlehna hmasa ber chu a ni. (Kum 1,000 a tâwp hma loh chuan, mitthi dangte erawh chu an la nung lo va.) 6 Tu pawh thawhlehna hmasa bera telte chu an hlimin, an thianghlim e, an chungah thih hnihnain thu a nei lo; Pathian leh Krista puithiamte an ni ang a, Krista nên kum 1,000 chhûng lal niin ro an rêl ang.
7 Tin, kum 1,000 chu a tâwp veleh Setana chu a tânna aṭangin chhuah a ni ang a, 8 Goga leh Magoga tia koh, lei kil lia hnamte bum a, indonaa hruai khâwm tûrin a kal chhuak ang. Chûng mite tam lam chu tuifinriata ṭiauvut ang mai an ni. 9 Anni chu lei pum puiah an inzâr pharh a, mi thianghlimte riah hmun leh Pathian ngainat tak khawpui chu an hual a. Nimahsela, vân aṭangin mei a lo tla a, anni chu a kâng ral ta a. 10 Tin, anmahni bumtu Diabola chu sakawlh leh zâwlnei der an paih luhna mei leh kât dîlah chuan an paih lût ve a. Anni chu a chhûn a zânin chatuana nghaisak* an ni ang.
11 Tin, lalṭhutthlêng vâr ropui tak leh a chunga ṭhu ka hmu a. A hma aṭang chuan lei leh vân an tlân bo va, an tân hmun rêng a awm tawh lo. 12 Tin, mitthite, mi lian leh mi tê, lalṭhutthlêng hmaa ding ka hmu a, lehkha zialte hawn a ni a; tin, lehkha zial dang nunna bu chu hawn a ni bawk a, mitthite chu lehkha zialtea inziak an thil tih ang zêla rorêlsak an ni ta a. 13 Tuifinriat chuan a chhûnga mitthi awmte a chhuahtîr a, thihna leh Thlân* pawhin an chhûnga mitthi awmte an chhuahtîr bawk a, mitthite chu an thil tih ang zêla rorêlsakin an awm ṭheuh va. 14 Tin, thihna leh Thlân* chu meidîlah an paih lût a, chu meidîl chuan thih hnihna a entîr a ni. 15 Chu bâkah, tu pawh nunna bu-a an hming chuang lo apiang chu meidîlah chuan an paih lût bawk a.