Johana Hnêna Thu Puan Chhuah
5 Lalṭhutthlênga Ṭhua kut ding lamah chuan lehkha zial a lehlam lehlama* inziak, chârna pasariha nghet taka châr ka hmu a. 2 Tin: “Lehkha zial chârnate phelh a, hawng tlâk tu nge awm?” tia ring taka au vântirhkoh chak tak ka hmu bawk a. 3 Nimahsela, vânah emaw, leiah emaw, lei hnuaiah emaw chu lehkha zial chu hawnga chhiar thei tu mah an awm lo. 4 Lehkha zial chu hawnga chhiar tlâk tu mah an awm loh avângin ka ṭap ta zawih zawih a. 5 Mahse, upate zînga pakhat chuan ka hnênah: “Ṭap tawh suh. Ngai teh! Juda hnama mi Sakeibaknei, Davida zunga mi khân, lehkha zial chârna pasarihte chu phelh a, hawng tûrin a hmêlmate chu a hneh ta,” tiin min hrilh a.
6 Tin, berâm no talh tawh ni âwm tak ding hi ka hmu a; tin, lalṭhutthlêng bulah chuan thil nung palite kha an ding a, an hmaah chuan berâm no chu a awm a, anni chu upate khân an hual vêl a. Berâm no chuan kî pasarih leh mit pasarih a nei a, mitte chu lei pum puia tirh chhuah Pathian thlarau pasarihte an ni. 7 Berâm no chu hma lamah a lo kal a, lalṭhutthlênga Ṭhua kut ding lama lehkha zial chu a la ta nghâl a. 8 Lehkha zial a han lâk chuan thil nung palite leh upa 24-te chu Berâm No hmaah chuan an bawkkhup a, upate chuan ṭingṭang leh rimtuia khat rangkachak thlêng kum an nei ṭheuh va. (Chu rimtui chuan mi thianghlimte ṭawngṭaina a entîr a ni.) 9 Anni chuan hla thar an sa a: “Nang hi, lehkha zial chu laa a chârnate phelh tlâk i ni, talhin i awm tawh a, chi tinrênga mi te, ṭawng tinrênga mi te, mi tinrenga mi te, hnam tinrênga mite Pathian tân i thisenin i lei tawh si a, 10 anni chu kan Pathian tân lalah leh puithiamahte i siam a, lal niin lei chungah ro an rêl ang,” an ti a.
11 Chumi hnu chuan, ngai teh! Lalṭhutthlêng leh thil nungte leh upate chhehvêlah chuan vântirhkoh tam tak ka hmu a, an aw ka hre bawk a, an tam lam chu a sînga sîng hmun sîng* leh a sânga sâng hmun sâng an ni. 12 Anni chuan aw ring takin: “Berâm No talh tawh chu thiltihtheihna te, hausakna te, finna te, chakna te, chawimawina te, ropuina te leh, malsâwmnate dawng tlâk a ni,” an ti a.
13 Thil nung tinrêng vâna awm te, leia awm te, lei hnuaia awm te, tuifinriata awm te leh, an chhûnga awm zawng zawngte chuan: “Lalṭhutthlênga Ṭhua leh Berâm No hnênah chuan malsâwmna te, chawimawina te, ropuina te leh, chaknate chatuanin awm rawh se,” an tih ka hria a. 14 Thil nung palite chuan: “Amen!” an ti a, upate chuan bawkkhupin Pathian chibai an bûk a.