Johana Hnêna Thu Puan Chhuah
18 Chumi hnuah chuan, vântirhkoh dang thuneihna nasa tak nên vân aṭanga lo chhuk ka hmu a, a ropuina chuan lei chu a ên a. 2 Vântirhkoh chuan aw ring takin: “Ani chu a tlu chhe ta! Babulon Khaw Ropui chu a tlu chhe ta! Ramhuaite awmna hmun, thlarau* bawlhhlawh tinrêng awmna hmun leh, sava thianghlim lo leh ngeiawm tinrêngte awm khâwmna hmun a lo ni ta! 3 Nungchang bawlhhlawhnaa* inhman châkna nasa tak thlentu a uain chuan hnam zawng zawng tih ruih an ni tawh si a; leia lalte nên nungchang bawlhhlawh takin an khawsa ṭhîn a, leia sumdâwngte* chuan a nawmsipbâwlna thiltihtheihna chu an hausakpui ṭhîn,” a ti a.
4 Tin, vân aṭangin aw dangin: “Ka mite u, a sualnate ṭâwmpui in duh loh va, a hremna tawrhte tawrh ve in duh loh chuan ani chu chhuahsan rawh u. 5 A sualnate chu chhiar sên rual a ni lo, a thil sual tihte avângin Pathianin ro a rêlsak ang. 6 Mi dangte chunga a tih ang chiahin thungrulh ni sela, a thil tih tâkte chu a lêt hniha thungrulh ni rawh se; mi dangte hnêna a pêk nova a uain chawhpawlh chu a in tûrin a lêt hniha chawhpawlhsak ni rawh se. 7 A intih ropui leh a nawmsipbâwl ang zêlin nghaisak leh tih lungngaih ni rawh se. A thinlungin: ‘Lalṭhutthlênga ṭhu lalnu ka ni a, hmeithai ka ni lo va, lungngaiin ka awm ngai hek lo vang,’ a ti fo si a. 8 Chuvângin, a hremna thihna te, lungngaihna te leh, ṭâmte chu ni khat chhûng lekin a lo thleng vek ang a, meia hâl ral a ni ang, a chunga rorêltu Pathian Jehova* chu a chak si a.
9 “Tin, nungchang bawlhhlawh* taka a khawsakpui ṭhin leh a nawmsipbâwlpui ṭhin leia lalte chuan a kâng khû an hmuh hunah an ṭap ang a, lungngaih avângin an âwm an chûm ang. 10 Anni chuan a nghaisakna tawrh ang tawrh ve an hlauh avânga hla taka dingin: ‘A va pawi êm! A va pawi êm! Nang khaw ropui, Babulon khaw nghet tak, dârkâr khat chhûng lekin i chungah rorêlna a lo thleng ta si a!’ an ti ang.
11 “Tin, leia sumdâwngte pawhin an bungruate leisaktu tûr tu mah an awm tâk loh avângin ani chu ṭahin an sûn ang. 12 An bungruate chu rangkachak te, tangkarua te, lung man tam te, tuikeplung te, puan zai sîn te, puan sen duk te, maimaw puan te leh, puan sen lârte a ni a; thing rimtui aṭanga siam chi tinrêng te, saingho te, thing man tam te, dâr te, thîr te leh, sailungvârte aṭanga siam thil chi tinrêngte a ni. 13 Chu bâkah, thakthîng te, India masala te, rimtui hâl chî te, hriak rimtui te, beraw te,* uain te, oliv hriak te, chhangphut ṭha chî te, buh te, bâwng te, berâm te, sakawr te, tawlailîr te, bâwih te leh, mihringte an tel bawk. 14 Theirah hmin i ei châkte chu i ei thei tawh lo va, thil tuihnai zawng zawngte leh thil mawi zawng zawngte chu i hnên aṭangin a bo ta a, hmuh a ni leh tawh ngai lo vang.
15 “Chûng thilte zuara amah avânga hausa sumdâwngte chu a nghaisakna tawrh ang tawrh ve an hlauh avângin hla takah an ding ang a, ṭap leh sûn chungin: 16 ‘Puan zai sîn te, puan sen duk te leh, puan sen lârtea inthuam a, rangkachak tlereuh te, lung man tam te leh, tuikeplungtea nasa taka inchei khaw ropui chunga thil thleng hi a va pawi êm! A va pawi êm! 17 Dârkâr khat chhûng lekin chutiang khawpa hausakna chu a ral ta mai si a!’ an ti ang.
“Lawngpu zawng zawng te, tuifinriata zin mi zawng zawng te, lawng khalhtu zawng zawng te leh, tuifinriata hnathawk ṭhîn zawng zawngte chuan hla taka ding a, 18 a kâng khû chu thlîr chungin: ‘He khaw ropui ang hi eng khua nge awm?’ an ti ang. 19 An lûah vaivut an phul a, ṭap chung leh lungngai chungin: ‘Tuifinriata lawng neitu zawng zawngte’n a hausakna an hausakpui khaw ropui chunga thil thleng hi a va pawi êm! A va pawi êm! Dârkâr khat chhûng lekin tih boral a ni ta mai si a!’ tiin an au va.
20 “Aw vân leh nangni mi thianghlim te, tirhkoh te leh, zâwlneite u, a chunga thil thleng avâng hian lâwm rawh u, Pathianin ani chu a hremsak ta si che u a!” a tih ka hria a.
21 Tin, vântirhkoh chak takin buh râwt sawmna lung lian tak ang hi lung a chawi kâng a, tuifinriatah paih lûtin: “Babulon khaw ropui chu hetianga rang hian paih thlâk a ni ang a, hmuh a ni leh tawh ngai lo vang. 22 Ṭingṭang perhtu te, rimawi tumtu te, phênglâwng tumtu te leh, tawtawrâwt hâmtute nêna hla satute zai thâwm pawh i chhûngah hriat a ni leh tawh ngai lo vang. Kut themthiamna hmanga ei zawngte chu i chhûngah hmuh an ni leh tawh ngai lo vang a, buh her thâwm pawh i chhûngah hriat a ni leh tawh ngai lo vang. 23 I chhûngah khâwnvâr a êng leh tawh ngai lo vang a, mopa* leh monu aw pawh hriat a ni leh tawh ngai lo vang; i hnêna sumdâwngte chu leia mi pawimawhte an ni a, i ramhuai zâwlna thil tihte avângin hnam zawng zawng chu bumin an awm ta. 24 Ani chu zâwlnei te, mi thianghlim te leh, leia an tih hlum zawng zawngte thisen chhuahnaa mawhphurtu a ni,” tiin a sawi a.