Timothea Hnêna Lehkhathawn Pahnihna
2 Chuvângin, nang ka fa, Krista Isuaa awm khawngaihna nasa tak chuan inti chak reng ang che. 2 Tin, ka hnên aṭanga i thu hriat, mi tam takin an hriat ve bawk kha mipa rinawmte hnênah kawltîr rawh; tichuan, anni chu mi dangte zirtîr tûra tling tak an lo ni thei ang. 3 Krista Isua sipai ṭha angin, hrehawm tuar tûrin inpeih rawh. 4 Sipai tu mah sipai atâna amah latu a tih lâwm theihna tûrin, sumdâwnnaahte* a inrawlh* ngai lo. 5 Intihsiaknaah pawh miin dân ang taka a beih loh chuan lâwmman* a dawng ngai lo. 6 Lo neitu thawkrim tak chu a rahte ei hmasa bertu a ni tûr a ni. 7 Ka thusawite hi ngaihtuah reng ṭhîn rawh; Lalpa chuan engkimah hriatthiamna a pe ang che.
8 Isua Krista kha thihna ata a tho leh tih leh, ani chu Davida thlah* a ni tih hre reng rawh, chu chanchin ṭha chu ka hril a ni, 9 chumi avânga hrehawm tuar leh dân bawhchhetu anga tân ina khung ka ni si a. Nimahsela, Pathian thu chu phuarin a awm lo ve. 10 Chuvâng chuan, thlante avângin engkim ka tuar hrâm hrâm ṭhîn, Krista Isua zâra chhandamna chu chatuana ropuina nên an dawn ve theihna tûrin. 11 He thu hi a rin tlâk a ni: Ama ruala kan thih chuan, ama rualin kan nung ngei bawk ang; 12 chhel taka kan tawrh hrâm hrâm chuan, ama rualin lal angin ro kan rêl ve ang; kan phat chuan, ani pawhin min phat ve ang; 13 kan rinawm lo a nih pawhin, ani chu a rinawm reng a ni, amah a inphat thei si lo va, tih hi.
14 Chûng thilte chu hriat nawntîr ṭhîn la, ṭawngkam chungchânga inbei lo tûrin Pathian hmaah thu pe rawh,* chu chuan a ngaithlatute chungah chhiatna a thlen* avângin ṭangkaina eng mah a nei si lo. 15 Pathian pawm hlawh hnathawktu, a hnathawha sawisêl tûr awm lo, thutak thu dik taka hmangtu i nihzia lantîr tûrin theih tâwp chhuah rawh. 16 Nimahsela, thil thianghlim sawichhiatna thusawi awmze nei lo sawitute chu hawisan rawh. Anni chuan mite chu Pathian ngaihsak loh lehzualna lamah an hruai ang a, 17 an thu chu pân chhia angin a darh dâwn si a. An zîngah chuan Humenaia leh Phileta te an tel a ni. 18 Chûng mite chuan, thawhlehna chu a thleng reng tawh anga sawiin thutak chu an pênsan a, mi ṭhenkhat rinna an tih chhiatsak ṭhîn. 19 Chuti chung pawhin, Pathian lungphûm nghet tak chu a la ding reng a, he chhinchhiahna hi a nei a ni: “Jehova’n* a tate chu a hria,” tih leh, “Jehova* hming lamtu apiangte chuan fel lohna hnâwl rawh se,” tih hi.
20 Tin, in lian takah hian rangkachak leh tangkaruaa siam bungbêl chauh a awm lo va, thing leh hluma siamte pawh a awm bawk; ṭhenkhat thil pawimawha* hman tûr a awm a, thil pângngaia* hman tûrte pawh a awm a ni. 21 Chuvângin, tu pawh thil pângngaia* hman tûrte lak aṭanga a inthiar fihlîm chuan, ani chu thil pawimawha* hman tûr, tih thianghlim tawh, a neitu tâna ṭangkai tak, hna ṭha tinrêng thawk tûra buatsaih tawh bungbêl a lo ni ang. 22 Chuvângin, tleirâwl châknate chu tlânsan la, thinlung thianghlima Lalpa autute rualin felna te, rinna te, hmangaihna te, remnate* ûm rawh.
23 Chu bâkah, inhnialna âtthlâk leh awmze nei lote chuan intihbuaina a chawk chhuak ṭhîn tih hriain hnâwl ang che. 24 Lalpa bâwih chuan mite a hnial buai tûr a ni si lo, mi zawng zawng chungah a zaidam* tûr a ni a, zirtîr tûra tling, miin a chunga thil ṭha lo an tih pawha thungrûl lo, 25 dodâltute nunnêm* taka zirtîrtu a ni tûr a ni. Tichuan, thutak hriatna dik an neih theihna tûrin Pathianin a simtîr thei mahna. 26 Chutiang chuan, Diabola’n a duh zâwng ti tûrin a nung chungin a man tih inhriaa lo harh chhuak lehin, a thang aṭangin an tlân chhuak thei ang.