Tita Hnêna Lehkhathawn
3 Unaute chu sawrkârte leh thuneitute thu awiha zâwm tûr te, hna ṭha tinrêng thawk tûra inpeih tûrtein hriat nawntîr ṭhîn la, 2 tu pawi mah sawi lo tûr te, inhnial buai lo tûr te, a âwm tâwk hre tûr te, mi zawng zawng laka nunnêm* taka awm reng tûrtein hriat nawntîr ṭhîn bawk ang che. 3 Keini pawh hmânah khân mi â, thuâwih lo, hruai bova awm, châkna leh nawmchenna hrang hrang bâwiha awm, mi sual leh îtsîk hmang, mi tenawm, inhaw tawn kan nih ṭhin kha.
4 Nimahsela, min Chhandamtu Pathian ngilneihna leh mihringte a hmangaihzia a lo lan khân, 5 nung tûrin min sil fai a, thlarau thianghlim hmanga min siam tharin min chhandam a ni (chu chu thil fel kan tihte vâng ni lovin, a zahngaihna vâng zâwkin a ni). 6 Ani chuan min Chhandamtu Isua Krista hmangin chu thlarau thianghlim chu kan chungah nasa takin* a leih a; 7 a khawngaihna nasa tak avânga mi fela puan kan nih hnuah, chatuana nun beiseina ang zêla roluahtute kan nih theihna tûrin.
8 Hêng thute hi a rin tlâk a, uar taka sawi zêl tûrin ka duh che a ni; tichuan, Pathian ringtute chuan hna ṭhate chu eng lai pawhin an ngaihven tlat thei ang. Chûngte chu a ṭhain mihringte hlâwkna thlentu a ni.
9 Nimahsela, inhnialna âtthlâkah te, thlahtute chanchin chhuinaah te, inhnialnaah te leh, Dân chungchânga intihbuainaahte chuan tel hauh suh; chûngte chu hlâwkna awm lo leh thil sâwt lo mai a ni si a. 10 Zirtîrna dik lo theh darhtu chu vawi hnih i zilh* hnu pawha a ngaihthlâk loh che chuan kâwm tawh suh. 11 Chutiang mi chuan kawng dik a pênsan tih leh thil sual tiin mahni thiam loh a inchantîr tih hria ang che.
12 Artema emaw, Tukika emaw i hnêna ka rawn tirh hunah, Nikopoli khuaah ka hnêna lo kal tum hrâm ang che, chutah chuan thlasik hman ka tum si a. 13 Dân lam hre tak Zena leh Apollova te kha an zin kawnga eng mah an tlâkchham loh nân, anmahni ṭanpui tûrin i tih theih apiang ti ang che. 14 Tin, kan unaute pawhin rah chhuah lova an awm lohna tûrin, mamawh thut a awm huna ṭanpuina an pêk theih nân thil ṭha tih reng zir rawh se.
15 Ka hnêna awm zawng zawngte hian chibai an bûk a che. Rinnaa min hmangaihtute kha chibai min bûksak ang che.
In vaia hnênah khawngaihna nasa tak awm rawh se.