Petera Lehkhathawn Pakhatna
3 Chutiang bawkin, nangni nupuite u, in pasalte lakah intulût rawh u; chutiang chuan, Pathian thu âwih lo mah sela, in thusawi ni lovin in chêtziain rinnaah in hruai thei ang, 2 in chêtze mawi* leh anmahni zahna thûk tak in lantîr chu an hmu si a. 3 In incheina chu pâwn lam mawina—uchuak taka sam phiar te,* rangkachak tlereuh inbel te, thawmhnaw man to inbelte—ni suh se. 4 Chu aiin, thinlunga mihring thurûk, mawina chuai thei lo, zaidamna leh nunnêmna ni zâwk rawh se, chu chu Pathian mit hmuhah a hlu êm êm si a. 5 Chu chu hun kal tawha Pathiana beiseina neitu hmeichhe thianghlimte inchei dân a ni si a, anni chu an pasalte lakah an intulût a ni; 6 Sari’n Abrahama thu a âwih a, “Lalpa” tia a ko ang khân. Nangni pawh thil ṭha in tih zêl a, hlauhna in inhnehtîr loh chuan Sari fate in lo ni ang.
7 Chutiang bawkin, nangni pasalte u, in nupuite nên in chên dunnaah hriatthiamna nei* ula, hmeichhiate hi bêl keh awl zâwk leh nunna thilpêk hlu tak chanpuitu che u an nih avângin chawimawi rawh u; chuti lo chuan, Pathianin in ṭawngṭainate a ngaithla lo vang.
8 A tâwp berah chuan, in vaiin rilru hmun khat pu ula, inlainat tawn ula, unau inngainatna nei ula, inkhawngaih tawn ula, inngaitlâwm rawh u. 9 Mi dangin an tih natna che u chu thungrûl lo ula, hmuhsitna pawh hmuhsitnain thungrûl suh u. Chu aiin, malsâwm zâwk rawh u, chu chu koh in nih chhan a ni si a. Chutichuan, malsâwmna in dawng thei ang.
10 Pathian Lehkha Thu-ah, “Tu pawh nunna hmangaih leh ni ṭhate hmuh duh chuan thil ṭha lo lakah a lei a vêng ṭha tûr a ni a, a hmui pawh bumna thu sawi lo tûrin a vêng ṭha tûr a ni. 11 Ani chuan thil ṭha lo hawisanin thil ṭha ti sela, remna zawngin ûm zêl rawh se. 12 Jehova* mit chu mi felte chungah a fu a, a beng pawhin an ngennate a ngaithla ṭhîn, thil ṭha lo titute erawh chu Jehova’n* a hawisan ṭhîn,” tih ziak a ni si a.
13 Thil ṭha tih kawnga ṭhahnem in ngaih chuan tuin nge ti nâ ang che u? 14 Nimahsela, felna avânga hrehawm in tawrh a ngai a nih pawhin in hlim ang. Mite’n an hlauh chu hlau lo ula,* mangang hek suh u. 15 In thinlungah Krista chu Lalpa a ni tih leh ani chu a thianghlim a ni tih pawm ula, beiseina in neih chhan zâwttu apiang che u chhâng tûrin inpeih sa reng rawh u; amaherawhchu, zaidam* tak leh zahna thûk tak nên chhâng ang che u.
16 Chhia leh ṭha hriatna thiang vawng reng rawh u; tichuan, kawng tinrênga sawichhiat in nihnaah, nangmahni sawichhetute chu Krista hnungzuitute in nih anga in nungchang ṭha avângin tih zahin an awm thei ang. 17 Thil sual tih avânga in tawrh aiin, Pathian rem tih zâwng a nih chuan, thil ṭha in tih avânga in tawrh chu a ṭha zâwk si a. 18 Pathian hnêna hruai in nih theih nân, mi fel lote tân mi fel Krista chu sualte avângin chatuan atân vawi khat a thi ta si a. Mihring angin thi mah se, vân nunna a chang ta a.* 19 Tin, thlarau taksa puin tân ina awm vântirhkohte hnênah chuan rorêlna thuchah a puang a. 20 Chûng vântirhkohte chu hmâna Nova hun lai, lawng tuk chhûng zawnga Pathianin dawhthei taka a nghah laia thuâwih lote kha an ni a. Lawngah chuan mi tlêm tê, mi pariat chauh tui lêtah khân chhandamin an awm a ni.
21 Chumi tlukpui baptisma chuan tûnah hian Isua Krista thawhlehna hmangin a chhandam mêk che u a ni. (Baptisma chu tisa bawlhhlawh tlen faina a ni lo va, chhia leh ṭha hriatna thiang nei tûra Pathian hnêna ngenna zâwk a ni.) 22 Isua Krista chu vânah lâwnin Pathian ding lamah a awm a, vântirhkoh te, thuneihna te leh, thiltihtheihnate chu a thuhnuaia dah a ni.