Philemona Hnêna Lehkhathawn

1 Krista Isua avânga mi tâng kei Paula leh kan unaupa Timothea hian kan hnathawhpui duh tak Philemona te, 2 kan unaunu Aphii te, kan sipaipui Arkippa te leh, i ina inkhâwm ṭhîn kohhrante kha chibai kan bûk a che u:

3 Pathian kan Pa leh Lalpa Isua Krista hnên aṭanga khawngaihna nasa tak leh thlamuanna* in hnênah awm rawh se.

4 Ka ṭawngṭainaahte chuan i hming lamin ka Pathian hnênah lâwmthu ka sawi fo ṭhîn a, 5 i rinna te, Lalpa Isua leh mi thianghlim zawng zawng i hmangaihnate ka lo hre ṭhîn a ni. 6 Mi dangte neih ang rinna i neih khân, Krista avânga kan neih thil ṭha tinrêng pawm tlat tûra a chêttîr theih nân che ka ṭawngṭai ṭhîn. 7 I hmangaihna chungchâng ka lo hriatin lâwmna leh thlamuanna nasa tak ka nei a ni; unaupa, nangmah avângin mi thianghlimte thinlung tih harhin a awm si a.

8 Chuvângin, thil dik ti tûra thu pe tûr chein, Kristaah chuan thuneihna nasa tak nei mah ila, 9 kei Paula, upa tawh tak, Krista Isua avânga tâng mêk hian hmangaihna avângin a ngenin ka ngên zâwk a che. 10 Tân ina ka tân* laia ka fa lo ni ta Onesima tân hian i hnênah ka ngensak a ni. 11 A hma khân i tân a ṭangkai lo va, tûnah erawh chuan i tân leh ka tân a ṭangkai tawh a ni. 12 Ka hmangaih êm êm Onesima hi i hnênah ka rawn tîr kîr e.

13 Ani hi chanchin ṭha avânga ka tân chhûng hian, i aia ka rawng min bâwlsak tûrin hetah hian ka tâna awmtîr reng ka duh a. 14 Nimahsela, i remtihna lo chuan eng mah tih ka duh lo; chutiang chuan, i thil ṭha tih chu tih luihna vâng ni lovin, i duh thu ngeia tih a ni thei ang. 15 Rei lo tê* a awm bosan che hi, kumkhuaa amah i neih lêt theihna tûr a ni mai thei asin; 16 nimahsela, bâwih ang chauh ni tawh lovin, bâwih aia hlu tak, unau duh tak ang zâwkin. Ani hi ka hmangaih êm êm a, nang phei chuan bâwih ang leh Lalpaa unau duh tak angin i hmangaih lehzual ang. 17 Chuvângin, ṭhiana* min ngaih chuan keimah min lawm dân tûr ang chiahin, ngilnei takin lo lâwm ang che. 18 Chu bâkah, i chungah thil eng pawh a ti sual emaw, i thil eng pawh a bâ emaw a nih chuan, ka batah ngai ang che. 19 Kei Paula’n ka kut ngeia ka ziah a nih hi, a bâte chu ka rûl leh ang. Nimahsela, nang pawhin ka lakah chu aia tam chu i bâ tih i hria e. 20 Ni e, unaupa, he ṭanpui ka dîlna che hi Lalpaah chuan min remtihsak hrâm rawh; Kristaah chuan ka thinlung ti harh ang che.

21 Ka dîlna hi min tihsak ang tih ka ring nghet tlat a, chu aia nasa zâwk mahin i ti ang tih ka hriat avângin i hnênah hetiang hian ka ziak a ni. 22 Chu bâkah, thlenna tûr min lo buatsaihsak bawk ang che, in ṭawngṭainate avânga chhuah zalena awmin, rawn tlawh theih che u ka inbeisei si a.

23 Krista Isua rin avânga ka tânpui Epaphra hian chibai a bûk a che; 24 tin, ka hnathawhpui Marka te, Aristarka te, Dema te leh, Luka te hian chibai an bûk bawk a che.

25 In rilru put hmang avângin Lalpa Isua Krista khawngaihna nasa tak chu in hnênah awm rawh se.