Matthaia Ziak
13 Chumi nî chuan, Isua chu in aṭanga chhuakin dîl kamah a va ṭhu a. 2 Mipui tam tak a hnênah an lo kal khâwm a; tichuan, lawngah chuangin a ṭhu a, mipui zawng zawng erawh chu dîl kamah chuan an ding a. 3 Anni chu tehkhin thu hmangin thu tam tak a zirtîr ta a: “Ngai teh u! Lo neitu pakhat buh chî theh tûrin a feh a. 4 A buh chi theh chu a ṭhen kawng sîrah a tla a; tichuan, savate’n an rawn ei zo ta a. 5 A ṭhen lung hmun lei panah a tla a, lei a chhah loh avângin rang takin a ṭo nghâl a. 6 Mahse, nî a lo sat tâk hnu chuan a lo vuai a, zung a kaih loh avângin a ro ta a. 7 A ṭhen hnimhlîngnei zîngah a tla a, hlîng chu lo ṭhangin buh chîte chu ṭhang thei lo tûrin a dîp a. 8 Nimahsela, a ṭhen erawh chu lei ṭhaah a tla a; tichuan, a lêt 100 te, a lêt 60 te leh, a lêt 30-tein rah a rawn chhuah a. 9 Beng nei chuan hre rawh se,” tiin.
10 Tichuan, a zirtîrte chu a hnênah lo kalin: “Engvângin nge mipuite hi tehkhin thute hmanga i zirtîr?” tiin an zâwt a. 11 Isua’n heti hian a chhâng a ni: “Vân Ram thurûk thianghlim chu in tân zawng hriat phal a ni a, anni tân erawh hriat phal a ni lo. 12 Tu pawh a nei apiang chu pêk belh a ni ang a; tichuan, tam tak a lo nei ang; nimahsela, tu pawh a nei lo apiang chu a neih sa pawh lâksak a ni ang. 13 Chuvângin a ni, tehkhin thu hmanga ka zirtîr ni; an en a, an hmu si lo va, an ngaithla a, an hre si lo va, a hriat pawh an hre thiam hek lo. 14 Isaia hrilh lâwkna hi an chungah a thleng famkim a ni: ‘A hriat zawng in hria ang a; nimahsela, a awmzia in hre lo vang, a en zawng in en ang a; nimahsela, in hmu lo vang. 15 Hêng mite thinlung hi lung ang maiin a sak a ni, an bengin hre mah se, an ngaithla duh lo, an maimitchhîng bawk a; chuti lo chuan, an mita hmuin an bengin an hria ang a, an thinlungin a awmzia hriain an hawikîr ang a, keiin ka lo ti dam hlauh dah ang e,’ tih hi.
16 “Nimahsela, nangni zawng hêngte hi in hmuha in hriat avângin in nihlawh e. 17 Tih tak meuhvin ka hrilh a che u, zâwlnei tam tak leh mi fel tam takin in thil hmuhte hi hmuh an châk ṭhîn a; nimahsela, an hmu si lo, in thil hriatte hi hriat an châk ṭhîn a; nimahsela, an hre si lo.
18 “Buh chi thehtu tehkhin thu hi ngaithla teh u. 19 Tu pawhin Lalram thuchah hriaa a awmzia a hriatthiam si loh chuan, Setana* lo kalin a thinlunga theh sa chu a rawn chhuhsak ṭhîn; chutiang mi chu kawng sîra tla chu a ni. 20 Lung hmun lei pana tla chu thu hriaa lâwm taka pawm nghâltu chu a ni. 21 Zung kaih lo mah se, eng emaw chen a dam a; nimahsela, Pathian thu avânga hrehawmna emaw, tih duhdahna emaw a lo awm veleh a tlu nghâl mai ṭhîn. 22 Hlîng zînga tla chu Pathian thu hretu chu a ni a; mahse, khawvêl* lungkhamna leh hausakna bumnain thuchah chu a dîp a, rah a chhuah ta lo a ni. 23 Lei ṭhaa tla erawh chu thuchah hriaa a awmzia pawh hretu chu a ni, chûng mite chuan rah an chhuah a, a ṭhen a lêt 100 te, a lêt 60 te leh, a lêt 30-tein an pung ṭhîn,” a ti a.
24 An hnênah tehkhin thu dang a sawi leh a: “Vân Ram chu a lova chi ṭha thehtu ang chu a ni. 25 Mite an muthilh hlânin a hmêlma a rawn kal a, buh zîngah chuan buh lemte rawn thehin a kal bo leh ta a. 26 Buh chu a lo ṭo va, a lo vuih chuan buh lem pawh chu a lo lang ve ta a. 27 Tichuan, lo neitupa bâwihte chu an lo kal a, a hnênah, ‘Ka pu, i lovah chi ṭha i theh lo vem ni? Engtin nge buh lemte saw a ṭo theih?’ an ti a. 28 Ani chuan an hnênah, ‘Hmêlmapa thil tih a nih chu,’ a ti a. A bâwihte chuan a hnênah, ‘Buh lemte chu kan va pawt dâwn em ni ang?’ an ti a. 29 Ani chuan, ‘Pawt rih lo ve, buh lem in pawh rualin buh tak in pawt tel palh hlauh ang e. 30 Buh seng thlengin ṭo za rawh se; tichuan, buh seng hunah buh âttute hnênah: Buh lem chu la khâwm hmasa a, hâl tûra têl khâwm tûr leh, buh takte chu ka buh zêma khung tûrin ka la hrilh ang,’ a ti a.”
31 An hnênah tehkhin thu dang a sawi leh a: “Vân Ram chu miin anṭam mu fang khat la a, a lova a theh ang chu a ni. 32 Chu chu thlai chî zawng zawnga tê ber a ni a; mahse, a rawn ṭhan len chuan thlai zînga lian ber leh thing a rawn ni a; tichuan, chunglêng savate rawn fuin a zârahte chuan an riak ṭhîn,” a ti a.
33 Tehkhin thu dang a hrilh leh a: “Vân Ram chu dawidim hmeichhiain a lâk a, a thawh vek thlenga chhangphut tehkhâwng lian tak thum* zînga a phûm ang chu a ni,” a ti a.
34 Isua’n chûng zawng zawng chu tehkhin thuin mipuite hnênah a sawi a. Tehkhin thu lovin an hnênah thu a sawi ngai lo. 35 Zâwlnei kal tlanga: “Tehkhin thu hmangin ka zirtîr ang a; a tîr* ata thil inthupte ka puang chhuak ang,” tia lo sawi tawh kha a thlen theihna tûrin.
36 Mipuite a hawtîr hnu chuan inah a haw a, a zirtîrte chu a hnênah lo kalin: “Lova buh lem tehkhin thu kha min hrilhfiah rawh,” an ti a. 37 Anni chu heti hian a chhâng a: “Chi ṭha thehtu chu mihring Fapa a ni a; 38 lo chu khawvêl hi a ni. Chi ṭha chu Ram fate an ni a, buh lem erawh chu Diabola* fate an ni. 39 Tin, a thehtu hmêlma chu Diabola a ni. Buh seng hun chu khawvêl* tâwp hun a ni a, a âttute chu vântirhkohte an ni. 40 Tin, buh lemte an la khâwma an hâl angin, khawvêl* tâwpah pawh chutiang chu a thleng ang. 41 Mihring Fapa hian a vântirhkohte a tîr chhuak ang a, anni chuan a Lalram aṭangin mi hruai sualtute leh thil sual titute chu an thiar chhuak ang a, 42 rawhtuina meipuiah an paih lût ang. Chutah chuan ṭap leh ha ṭhialin an awm ang. 43 Chutih hunah chuan mi felte erawh chu an Pa Lalramah nî angin an êng ang. Beng nei chuan hre rawh se.
44 “Vân Ram chu lova ro phûm rûk ang a ni a, chu chu miin a han hmuh chuan a thukru a, a lâwm êm avângin a neih zawng zawng a va hralh a, chu lo chu a lei ta a ni.
45 “Vân Ram chu sumdâwng miin a zawn tuikeplung ṭha tak ang chu a ni bawk a. 46 Tuikeplung hlu tak pakhat a hmu a; tichuan, a neih zawng zawng a hralh nghâl a, chu tuikeplung chu a lei ta a ni.
47 “Vân Ram chu tuifinriata lênkhang zâr, sangha chi tinrêng awhna ang chu a ni leh a. 48 A khah veleh vaukamah an hnûk chhuak a, ṭhuin a ṭha zawng chu an thlang a, bâwmah an dah a, a ṭha lo erawh chu an paih ṭhîn. 49 Khawvêl* tâwp hunah pawh chutiang chiah chuan a thleng ang. Vântirhkohte chuan kal chhuakin, mi fel zîng ata mi sualte chu an thliar hrang ang a, 50 rawhtuina meipuiah an paih ang. Chutah chuan ṭap leh ha ṭhialin an awm ang.
51 “Chûng thil zawng zawng awmzia chu in hria em?” a ti a. Anni chuan “Hria e,” tiin an chhâng a. 52 Tichuan, an hnênah: “Chuti a nih chuan, zirtîrtute zîngah tu pawh vân Ram chungchâng zirtîrna dawng tawh chu in neitu, a ro bâwm ata thil thar leh thil hlui phawrh chhuaktu ang chu a ni,” a ti a.
53 Isua’n chûng tehkhin thute a sawi zawh chuan, chuta ṭang chuan a kal chhuak a. 54 A seilenna khua a thlen hnu chuan, mite chu an inkhâwmna inah a zirtîr ṭan a, anni chuan mak an ti hle a: “He mi hian hetiang finna leh thil mak tih theihnate hi khawi aṭangin nge a neih? 55 Mistiri fapa ve mai a ni lâwm ni? A nu pawh Mari, a unaute pawh Jakoba, Josefa, Simona leh, Juda te an ni lâwm ni? 56 A farnute pawh kan zînga chêng ve tho an ni lâwm ni? A nih chuan, khawi aṭangin nge hêng a finna leh a thil mak tih theihnate hi a neih?” an ti a. 57 Tichuan, ani chu an ring duh ta lo va.* Nimahsela, Isua’n an hnênah: “Zâwlnei chu a seilenna khuaah leh ama inah chawimawiin a awm ngai lo,” a ti a. 58 Tichuan, rinna an tlâkchham avângin chutah chuan thil mak tam tak a ti lo.