Matthaia Ziak

21 Jerusalem khaw thlen hma, Oliv Tlânga awm Bethphage khua an thlen chuan Isua’n a zirtîrte zînga pahnih a tîr a. 2 An hnênah: “In hmaa khuaah sâwn va kal ula, sabengtung inthlung leh a bula a tuai in hmu ang. Phelh ula, ka hnênah rawn kai ang che u. 3 Mi tu pawhin in hnênah eng pawh a sawi chuan, ‘Lalpa’n a mamawh a ni,’ in ti ang a. Tichuan, a kaihtîr nghâl mai ang che u,” a ti a.

4 Chutiang chiah chuan a thleng a ni; zâwlnei hmanga lo sawi tawh kha a thlen famkim theih nân: 5 “‘En teh! I lal chu thuhnuairawlh takin sabengtung chungah, sabengtung tuai chung ngeia chuangin i hnênah a lo kal e,’ tiin Zion fanu chu hrilh rawh,” tih hi.

6 Tichuan, zirtîrte chu an kal a, Isua’n a hrilh ang ngeiin an va ti a. 7 Sabengtung leh a tuai chu an rawn kai a, a chungah zirtîrte chuan an kawrfualte an phah a, ani chu a chuang ta a. 8 Mipui tam zâwkin an kawrfualte chu kalkawngah an lo phah a, mi dangte chuan tûmkau sâtin an phah bawk a. 9 Chu bâkah, a hma lama kalte leh amah zuitu mipuite chuan: “Aw Pathian, Davida Fapa hi chhandam rawh! Jehova* hminga lo kal chu malsâwmin awm rawh se! Chungnung bera awm aw Pathian, ani hi chhandam rawh!” tiin an au va.

10 Jerusalem khuaa a luh chuan, a khaw pumin: “Ani hi tu nge ni?” tiin an inzâwt a. 11 Mipuite chuan: “Zâwlnei Isua, Galili rama Nazaret khuaa mi a nih hi!” tiin an chhâng a.

12 Tichuan, Isua chu biak inah a lût a, sumdâwngte leh anmahni dâwrtute chu a hnawt chhuak vek a, pawisa thlengtute dawhkânte leh ṭhuro zuartute ṭhutthlêngte chu a nam thlûksak a. 13 An hnênah: “‘Ka in chu ṭawngṭaina in tia koh a ni ang,’ tih ziak a ni; nimahsela, nangni erawh chuan suamhmangte pûkah in siam a nih hi!” a ti a. 14 Tin, biak inah chuan mitdel leh kebaite a hnênah an lo kal a, ani chuan a lo ti dam hlawm a.

15 Nimahsela, puithiam lalte leh dân hre mite’n a thil mak tihte bâkah, “Aw Pathian, Davida Fapa hi chhandam rawh!” tia au naupangte an hmuh chuan an lungni lo hle a. 16 A hnênah: “Hêngho thusawi hi i hria em?” an ti a. Isua chuan: “Hria e. ‘Naupangte leh nausênte kâ aṭangin fakna i tichhuak a,’ tih thu hi in chhiar ngai lo vem ni?” a ti a. 17 Anmahni a kalsan hnu chuan, khawpui ata chhuakin Bethani khuaah a kal a, chutah chuan a riak ta a.

18 Tin, zîng hma taka khawpuia a lêt leh lai chuan a ril a lo ṭâm ta a. 19 Kawng sîra theipui kûng a hmuh chu a va pan a; nimahsela, a hnah chauh lo chu eng mah a hmu lo. Tichuan: “Lo rah leh tawh ngai suh ang che,” a ti a. Tin, theipui kûng chu chawplehchilhin a vuai ta nghâl a. 20 Zirtîrte’n chu chu an hmuhin mak an ti hle a: “Engtin nge theipui kûng kha a lo vuai nghâl theih?” an ti a. 21 Isua’n an hnênah: “Tih tak meuhvin ka hrilh a che u, rinna in neih a, rinhlelhna in neih loh chuan, theipui kûng chunga ka tih ang chauh lo pawh hi in la ti ang. He tlâng hnênah hian, ‘Insawn la, tuifinriatah tla lût rawh,’ tia in sawi pawhin chutiang chuan a lo awm ang. 22 Tin, rinna nêna ṭawngṭaia in dîl zawng zawng chu in hmu ang,” a ti a.

23 Biak ina mite a zirtîr laiin, puithiam lalte leh vântlâng upate a hnênah an lo kal a: “Tu thuneihnain nge hêng thil hi i tih? Tuin nge thuneihna pe che?” tiin an zâwt a. 24 Isua’n an hnênah: “Kei pawhin thil pakhat ka zâwt ve ang che u. Min chhân theih chuan, hêng thilte hi tu thuneihnaa ti nge ka nih ka hrilh ang che u: 25 Johana khân tu thuneihnain nge mite a baptis? Vâna mi thu nge mihring thu?” a ti a. Tin, an ngaihtuahho va: “‘Vâna mi,’ kan tih chuan, ‘A nih leh, engati nge ani chu in rin loh?’ min ti ang a. 26 Mahse, ‘Mihring thu,’ kan tih chuan, mi zawng zawngin Johana chu zâwlneia an ngaih avângin, kan tân mipuite tih thinrim a hlauhawm bawk si,” an ti a. 27 Tichuan, Isua chu: “Kan hre lo,” tiin an chhâng a. Ani pawhin: “Hêng thilte hi tu thuneihnain nge ka tih ka hrilh bîk lo vang che u,” a ti a.

28 “Engtin nge in ngaih? Pa pakhatin fapa pahnih a nei a. A upa zâwk hnênah chuan va kalin, ‘Ka fapa, vawiin chu grêp huanah hna va thawk ta che,’ a ti a. 29 Ani chuan, ‘Ka peih lo,’ a ti a; nimahsela, a hnuah inchhîrin hnathawk tûr chuan a kal ta a. 30 A naupang zâwk hnênah pawh va kalin, a u hnêna a hrilh ang bawk chu a hrilh a. Ani chuan, ‘Aw le, ka pa,’ a ti a; nimahsela, a kal lo va. 31 An pahnihah chuan tuin nge a pa duh zâwng ti?” a ti a. Anni chuan: “A upa zâwkin,” an ti a. Isua’n an hnênah: “Tih tak meuhvin ka hrilh a che u, chhiahkhawntute leh nawhchizuarte’n Pathian Ramah an luh khalh ang che u. 32 Johana chu felna kawng hmuhtîr tûr che uin in hnênah a lo kal a; nimahsela, ani chu in ring si lo. Chhiahkhawntute leh nawhchizuarte erawh chuan ani chu an ring a, chu chu in hmuh hnu pawhin amah ring tûrin in inchhîr duh chuang lo.

33 “Tehkhin thu dang hi lo ngaithla teh u: Ram neitu pakhat a awm a, a ramah chuan grêp huan a siam a, a hung a, grêp sâwrna khur a lai a, a vênna tûr in sâng a sa bawk a; tichuan, huan enkawltute chu hlawh neia enkawltîrin hmun hla takah a zinsan ta a. 34 A rah lawh a lo hun chuan, a chanpual la tûrin huan enkawltute hnênah a bâwihte a tîr a. 35 Nimahsela, huan enkawltute chuan a bâwihte chu an lo man a, pakhat an vua a, pakhat an that a, pakhat lungin an dêng hlum a. 36 Tichuan, bâwih dang, a tirh hmasakte aia tam zâwk a tîr leh a; mahse, a hmaa mite chunga an tih ang bawk khân an lo ti leh a. 37 A tâwpah, ‘Ka fapa hi chu an lo zah mahna,’ tiin a fapa chu an hnênah a tîr ta a. 38 A fapa chu an hmuhin huan enkawltute chuan, ‘Ro luahtu tûr a nih saw. That ila, a ro luah tûr hi i neihsak ang u!’ an ti a. 39 Tichuan, an man a, grêp huan pâwnah hnûk chhuakin an ti hlum ta a. 40 Chutichuan, grêp huan neitupa a lo kal hunah, chûng huan enkawltute chungah chuan eng nge a tih ang?” a ti a. 41 Anni chuan a hnênah: “An sual êm avângin a ti boral vek ang a, grêp huan chu a rah lawh hun apianga a chanpual a hnêna rawn petu tûr, huan enkawltu dangte a enkawltîr ang,” an ti a.

42 Isua’n an hnênah: “Pathian Lehkha Thu-ah, ‘In satute lung duh loh kha a kila lung pawimawh ber a lo ni. Chu lung chu Jehova* hnên aṭanga lo kal a ni a, kan mit hmuhah a mak ropui hle,’ tih hi in chhiar ngai lo vem ni? 43 Chuvâng chuan hei hi ka hrilh che u a ni, Pathianin a Lalram chu in hnên aṭanga la bovin, a rah chhuah tûr hnam hnênah a pe ang. 44 Tin, chu lung chunga tla chu a keh sawm ang a, a delh phei chu a râwt dip ang,” a ti a.

45 Tin, puithiam lalte leh Pharisaite’n a tehkhin thute an han hriat chuan, an chungchâng a sawi a ni tih an hre ta a. 46 Amah chu man duh hle mah se, zâwlnei nia ngaitu mipuite chu an hlau a ni.