Philippi Khuaa Mite Hnêna Lehkhathawn
2 Tin, Kristaa infuihna rêng rêng te, hmangaihnaa inthlamuanna rêng rêng te, thlarau lama inkawmhona rêng rêng te,* lainatna leh khawngaihna rêng rêngte a awm a nih chuan, 2 rilru hmun khat puin, hmangaihna thuhmun neiin, inpumkhat tlatin,* ngaihtuahna hmun khat neiin ka lâwmna ti famkim rawh u. 3 Elrel leh inngaihhlut avânga eng mah ti lovin, inngaitlâwm takin mahni aiin mi dangte chungnung zâwkah* ngai rawh u. 4 Mahni ṭhatna tûr chauh zawng lovin, mi dangte ṭhatna tûr pawh zawng bawk rawh u.
5 Krista Isua pawhin a neih he rilru put hmang hi nei ve rawh u. 6 Ani chu Pathian ang ni mah se, Pathian tluka insiam chu ngaihtuah pawh a ngaihtuah ngai lo. 7 A thil neih engkim kalsan a,* bâwih anga insiamin mihring a lo ni a.* 8 Chu mai a ni lo, mihring anga a lo kal khân,* nasa taka inngaitlâwmin thih thlengin thu a zâwm a ni, nghaisakna bana* thihna ngei chu. 9 Chumi avâng chuan, Pathianin dinhmun sâng zâwk luahtîrin a chawimawi a, hming zawng zawnga hming chungnungber a pe a ni; 10 vâna awm te, leia awm te leh, lei hnuaia awmte Isua hminga an ṭhingṭhit nân leh, 11 Pa Pathian ropui nân, “Isua Krista chu Lalpa a ni,” tih lei tinrêngin an puanna tûrin.
12 Chuvângin, ka duh takte u, in hnêna ka awm lai chauhva thu âwih lo va, ka awm loh lai pawha in âwih lehzual ang hian, chhandam in nih theih nân hlau leh khûr chungin theih tâwp chhuah zawm zêl rawh u. 13 Pathian ngei chu a lâwm zâwng anga thil ti tûra nangmahni ti chaktu* leh, thil tih châkna leh thiltihtheihna petu che u a ni si a. 14 Phunnawina leh inhnialnate awm lovin thil engkim ti ṭhîn rawh u. 15 Ti êngtute anga in awmna khawvêl, chhuan rilru kawi leh awm herhte zîngah hian Pathian fa, bawlhhlawh kai lo, sawisêl bo leh pawi sawi lo in nih theihna tûrin, 16 nunna thu chu nghet takin vuan reng rawh u. Tichuan, a thlâwn maiin ka tlân lo tih leh ka thawhrimna a thlâwn lo tih hriain, Krista nîah chuan lâwm nachhan tûr ka nei thei ang. 17 In rinna avânga in tih ṭhin inthawina leh rawngbâwlna thianghlimahte* chuan, in tûr thilhlan anga leih buak ni dâwn mah ila ka lâwm a, nangni pawh ka lâwmpui bawk che u a ni. 18 Chutiang bawkin, nangni pawh lâwm ula, min lâwmpui bawk rawh u.
19 Tin, in chanchin ka hriat huna tih chaka ka awm theihna tûrin, in hnêna Timothea rawn tirh thuai Lalpa Isuaah chuan ka beisei a ni. 20 Hetiang rilru pu, nangmahni ngaihsak tak zettu tûr hi mi dang tu mah ka nei si lo va. 21 Mi dang zawng zawngte chuan anmahni ṭhatna tûr chauh an zawng a, Isua Krista duh zâwng an zawng lo. 22 Nimahsela, fain a pa a thawhpui angin chanchin ṭha theh darhnaa min thawhpuizia chu amah ngeiin a finfiah tawh tih in hriat kha. 23 Chuvângin, ka chunga thil thleng tûr ka hriat veleh ani hi in hnêna rawn tirh ka beiseia chu a ni a. 24 A nihna takah chuan, keimah ngei hi ka lo kal thuai ang tih Lalpaah chuan ka ring tlat a ni.
25 Nimahsela, tûnah chuan ka unaupa, ka hnathawhpui, ka sipaipui leh, ka rawng min bâwlsak tûra in rawn tirh palai ni bawk Epaphrodita hi in hnêna rawn tirh a ṭûlin ka hria a ni. 26 In vaiin a ngai êm êm che u a, a dam lo tih in hriat avângin a rilru a hrehawm hle bawk. 27 Ani chu thi lek lekin a dam lo ngei a; nimahsela, Pathianin a chungah zah a ngai a. A nihna takah chuan, a indawta lungngaihna ka tawrh lohna tûrin a chungah chauh ni lovin, ka chungah pawh zah a ngai a ni. 28 Chuvângin, amah in hmuh huna in lâwm leh theihna tûr leh, kei pawh ka lungngaihna a ziaawm theihna tûrin a rang thei ang berin ka rawn tîr a ni. 29 Lalpa zuitute in lawm ṭhin dân angin ani chu hlim takin lo lâwm ula, hetiang mi hi ngaihlu hle rawh u. 30 Krista hna* thawkin a thi lek lek a, heta in awm loh avângin in aia ka rawng bâwlin a nun a thâp a ni.*