Johana Hnêna Thu Puan Chhuah
4 Chumi hnuah chuan, ngai teh! Vânah kawngkhâr inhawng ka hmu a, min betu aw ka hriat hmasak ber chu tawtawrâwt ri ang a ni a, ani chuan: “Hetah hian lo chho la, nakina thil lo thleng ngei tûrte ka hmuhtîr ang che,” a ti a. 2 Chumi hnuah chuan, Pathian thlarau ka chungah a lo thleng ta nghâl a, ngai teh! Vânah chuan lalṭhutthlêng a inhûng a, chutah chuan tu emaw a ṭhu a. 3 Lalṭhutthlênga Ṭhua lan dân chu jasper lung leh sardius lung ang a ni a, lalṭhutthlêng hual vêl chuan emerald lung rawng ang chhimbâl hi a zâm a.
4 Lalṭhutthlêng hual vêlah chuan lalṭhutthlêng 24 a awm a, chûng lalṭhutthlêngahte chuan thawmhnaw vâra inthuam upa 24 ṭhu ka hmu a, rangkachak lallukhum an khum ṭheuh va. 5 Lalṭhutthlêng aṭang chuan kâwlphe te, aw te leh, khawpui rîte a lo chhuak a; lalṭhutthlêng hmaah chuan khâwnvâr alh pasarih a awm a, chûngte chu Pathian thlarau pasarihte kha an ni. 6 Lalṭhutthlêng hmaah chuan crystal lung* ang maia fîm, dârthlalang tuifinriat ang hi a awm a.
A lai tak lalṭhutthlêng awmna leh lalṭhutthlêng chheh vêlah chuan thil nung pali, an hnung lam leh hma lam mita khat an awm a. 7 Thil nung pakhatna chu sakeibaknei ang a ni a, thil nung pahnihna chu bâwng pa tuai ang a ni a, thil nung pathumna chuan mihring hmêl ang a pu a, thil nung palina chu mupui thlâwk lai ang a ni. 8 Thil nung palite chuan thla paruk an nei ṭheuh va, an thlate chu mitin a khat a. Anni chuan: “Pathian Engkimtithei Jehova,* awm tawha leh awm mêka leh lo la awm tûra chu a thianghlim e, a thianghlim e, a thianghlim e,” tiin nilêng zankhuain an sawi ṭhîn.
9 Chûng thil nung palite’n lalṭhutthlênga Ṭhua, chatuana Nung Renga chu ropuina leh chawimawina pea lâwmthu an hrilh apiangin, 10 upa 24-te chu lalṭhutthlênga Ṭhua hmaah chuan an bawkkhup a, chatuana Nung Renga chu chibai an bûk a; tin, lalṭhutthlêng hmaah chuan an lallukhumte chu dah thlain: 11 “Nang, kan Pathian Jehova,* ropuina te, chawimawina te leh, thiltihtheihnate dawng tlâk i ni e, nangin engkim i siam a, chûngte chu i duh avânga awm leh siam an ni si a,” tiin an sawi ṭhîn.