Johana Hnêna Thu Puan Chhuah
12 Tin, vânah chhinchhiahna ropui tak ka hmu a, hmeichhe pakhat hi nîin a inthuam a, a ke hnuaiah thla a awm a, arsi 12-a siam lallukhum a khum a. 2 Ani chuan nau a pai a, nau a vei avânga na tuar leh thlaphângin a ṭap a.
3 Vânah chuan chhinchhiahna dang ka hmu leh a. Ngai teh! Dragon sen lianpui, lu sarih leh ki sâwm nei, a lûtea lallukhum pasarih khum a lo lang a; 4 a mei chuan vâna arsi hmun thuma ṭhena hmun khat a hnûk a, leiah a paih thla a. Hmeichhiain nau a hrin huna a nau hrin a dawlh theihna tûrin, nau nei mai tawh tûr hmeichhe hmaah chuan dragon chu a ding reng a.
5 Hmeichhia chuan hnam zawng zawng thîr tianga rorêlsaktu tûr fapa a hring a. A fa chu Pathian hnênah, a lalṭhutthlêngah chuan lâk chhoh a ni ta nghâl a. 6 Tin, hmeichhia chu Pathianin hmun a buatsaihsakna, ni 1,260 chhûng châwm a nihna tûr thlalêrah chuan a tlânchhia a.
7 Tin, vânah chuan indona a lo chhuak a: Mikaela* leh a vântirhkohte chuan dragon chu an do va, dragon leh a vântirhkohte pawhin an do lêt a; 8 nimahsela, an hneh lo va,* vânah chuan an tân hmun a awm tawh hek lo. 9 Tichuan, dragon lianpui, rûlpui tar, Diabol-Setana an tih, khawvêl pum pui bumtu chu leiah paih thlâk a ni a, a vântirhkohte pawh a ruala paih thlâk an ni bawk a. 10 Tin, vânah chuan aw ring takin:
“Kan Pathian chhandamna te, thiltihtheihna te, a Lalram te leh, a Krista thuneihnate chu a lo thleng ta, kan Pathian hmaa a chhûn a zâna kan unaute hêk ṭhîntu chu leiah paih thlâk a ni ta si a! 11 Berâm No thisen avâng leh an thu hriattîr avângin Setana chu an hneh a ni; thihna an hmachhawn lai pawhin an nun* chân an hlau lo. 12 Chuvângin, nangni, vânte leh a chhûnga awmte u lâwm rawh u! Diabola chu a lo chhuk tâk avângin lei leh tuifinriat chunga thil thleng tûr chu a va râpthlâk dâwn êm! Hun tlêm tê chauh a nei tawh tih a inhriat avângin, ani chu a thinur êm êm a ni,” a tih ka hria a.
13 Tin, dragon chuan leiah paih thlâk a ni tih a inhriat chuan, fapa hringtu hmeichhia chu a ti duhdah ta a. 14 Nimahsela, rûlpui hmuh phâk lohna hmun, hun khat leh hunte leh hun chanve* chhûng châwm a nihna tûr thlalêra a awmna hmunah chuan a thlawh luh theihna tûrin, hmeichhe hnênah chuan mupui lian tak thla khing hnih pêk a ni a.
15 Tin, rûlpui chuan hmeichhia chu luia a tlâk hlumtîr theih nân, hmeichhe hnungah chuan lui ang tak tui hi a kâ aṭangin a phuh chhuak a. 16 Amaherawhchu, leiin hmeichhia chu ṭanpuiin a kâ a âng a, dragon-in a kâ aṭanga a phuh chhuah lui chu a lem zo ta a. 17 Tichuan, dragon chu hmeichhe chungah chuan a thinur ta hle a, hmeichhe thlah* la bâng, Pathian thupêkte zâwm a, Isua chungchâng hriattîrtute chu do tûrin a kal chhuak ta a.