Philippi Khuaa Mite Hnêna Lehkhathawn
4 Chuvângin, ka unau, ka hmangaih tak leh ka ngaih êm êm, ka lâwmna leh ka lallukhum, ka duh takte u, ka sawi tawh ang khân Lalpaah ding nghet rawh u.
2 Euodii leh Suntuki te kha Lalpaa rilru hmun khat pu tûrin ka ngên a ni. 3 Tin, nang, ka hnathawhpui dik tak,* khâng hmeichhiate kha ṭanpui zawm zêl tûrin ka ngên bawk a che. Anni chuan Klemena leh nunna bua hming chuang ka hnathawhpui dang zawng zawngte nên chanchin ṭha theh darhnaah theih tâwp chhuahin min thawhpui si a.
4 Lalpaah chuan lâwm fo rawh u. Ka sawi nawn leh ang, Lâwm rawh u! 5 A âwm tawk in hriatzia mi zawng zawng hriat ni rawh se. Lalpa chu kan bul hnaiah a awm e. 6 Eng thilah mah lungkhamna nei lo ula, engkimah ṭawngṭai leh ngênin, lâwmthu hril tel zêlin, in dîlnate chu Pathian hnênah hriattîrin awm zâwk rawh se. 7 Tichuan, hriatthiam phâk rual loh Pathian thlamuanna* chuan in thinlung leh in rilrute* chu Krista Isua hmangin a vênsak ang che u.
8 A tâwp berah chuan unaute u, a dik apiang te, a pawimawh apiang te, a fel apiang te, a thianghlim apiang te, a duhawm apiang te, a thangmawi apiang te, a ṭha apiang te leh, fak tlâk apiangte chu ngaihtuah* zêl rawh u. 9 Ka hnên aṭanga in zir te, in pawm te, in hriat te leh, in hmuhte ang khân ti ṭhîn rawh u; tichuan, Pathian thlamuanna chuan a awmpui ang che u.
10 Tûna min ngaihtuah thar leh tâk avâng hian Lalpaah chuan ka lâwm hle a ni. Min ngaihtuah ṭhîn mah ula, min ngaihtuahzia lantîrna hun remchâng in nei si lo va. 11 Hei hi mamawh ka neih vânga sawi ka ni lo, eng dinhmunah pawh awm ila lungawina neih ka zir tawh si a. 12 Tlêm tê neia awm dân leh tam tak neia awm dân ka hria a. Engkimah leh eng dinhmunah pawh puar taka awm dân leh rilṭâma awm dân bâkah, tam tak neia awm dân leh tlachhama awm dân thurûk ka zir tawh a ni. 13 Thiltihtheihna min petu avângin engkim hmachhawn tûrin chakna ka nei si a.
14 Eng pawh ni se, ka hrehawm tawrhnaa min ṭanpui avângin in ti ṭha e. 15 A nihna takah chuan, nangni Philippi mite hi chanchin ṭha in hriat hmasak ber hnua, Makedonia ram ka chhuahsan laia ka ṭanpuina pawm duh leh min ṭanpui lêt duh kohhran awm chhun in ni tih in hria e. 16 Thessalonika khuaa ka awm lai khân vawi khat chauh pawh ni lo, vawi hnih lai ka mamawhte min rawn thawn kha. 17 Thilpêk beisei ka ni lo va, hlâwkna nasa zâwk thlentu tûr che u thil ṭha in tih ka duh a ni. 18 Nimahsela, ka mamawh engkim ka nei a, chu aia tam zâwk mah ka nei a ni. Epaphrodita rawn ken, in thil min rawn thawnte ka dawn avângin eng mah tlâkchham ka nei lo, chûngte chu Pathian lawm zâwng, thil rimtui, inthawina pawm tlâk a ni si a. 19 Tichuan, ka Pathianin a ropuina nasatzia ang zêlin Krista Isua hmangin in mamawh zawng zawng a pe vek ang che u. 20 Kan Pathian leh Pa hnênah chatuanin ropuina awm rawh se. Amen.
21 Krista Isua nêna inpumkhat mi thianghlim zawng zawngte kha chibai min bûksak ang che u. Ka hnêna awm unaute hian chibai an bûk a che u. 22 Mi thianghlim zawng zawng, a bîk takin Kaisara chhûngte hian chibai an bûk a che u.
23 In rilru put hmang avângin, Lalpa Isua Krista khawngaihna nasa tak chu in hnênah awm rawh se.