Petera Lehkhathawn Pahnihna
3 Duh takte u, hei hi in hnêna ka lehkhathawn pahnihna a ni a, a pakhatna ang bawk khân in thil hriat tawh sa hriat nawntîr che uin, in ngaihtuah theihna fîm tak hmang tûrin ka fuih che u a ni; 2 zâwlnei thianghlimte’n an lo sawi lâwk tawh leh Lalpa leh Chhandamtu thupêk, in tirhkohte’n an sawite kha in hriat reng theihna tûrin. 3 A hmasain hei hi hre rawh u, ni hnuhnûngahte chuan thil ṭha nuihsawhtute an lo chhuak ang a, anmahni châkna ang zêla hruaia awmin: 4 “A lo awm lehna thutiam chu khawiah nge? Kan pi leh pute hun lai aṭanga tûn thlengin eng mah a la inthlâk danglam lo va, siam tirh aṭanga a awm ang chiahin engkim a la awm hi!” an ti ang.
5 Hmân aṭangin vânte hi a awm tawh tih leh Pathian thuin tui leh lei hi ṭhen hran a ni a, tui chuan lei a hual vêl tih thu dik hi an haider lui a; 6 chuvângin, tui a lêt khân, chutih hun laia khawvêl chu tih boral a ni ta a ni. 7 Nimahsela, chu Pathian thu avâng vêk chuan, tûna vânte leh lei awm mêk hi Pathian ngaihsak lote chunga rorêlna leh tih boralna nî a thlen hma loh chu hâl tûra khêk a ni.
8 Amaherawhchu, duh takte u, Jehova* ngaihah chuan ni khat hi kum sângkhat ang a ni a, kum sângkhat pawh ni khat ang a ni tih theihnghilh suh u. 9 Mi ṭhenkhat ngaih angin Jehova* chu a thutiamte hlen kawngah a muang lo ve, tu ma boral duh lo va, mi zawng zawng an sim a duh avângin in chungah a dawhthei zâwk a ni. 10 Nimahsela, Jehova* nî chu rûkru angin a lo thleng ang, chumi nîah chuan vânte chu nasa taka riin a boral ang a, vânte leh leia thil awmte hi a sat êm avângin a tui ral ang a, lei leh a chhûnga hnathawhte hi hâl tûra hnutchhiah a ni ang.
11 Chûng thil zawng zawng chu chutianga tui ral vek tûr a nih avângin, thianghlim takin in nung tûr a ni a, Pathian ngaihsak mi in ni tih thil tihin in lantîr tûr a ni. 12 Tin, Jehova* nî lo thleng tûr chu inring rengin nghâk ula, theihnghilh suh u. Chumi nîah chuan vânte chu a kâng ral ang a, leia thil awmte hi a sat êm avângin a tui ral ang. 13 Nimahsela, a thutiam angin vân tharte leh lei thar, a chhûnga felna awm chu kan nghâk a ni.
14 Chuvângin, duh takte u, chûng thilte in nghah avâng chuan a tâwpah Pathianin bawlhhlawh kai lo, sawisêl bo leh, thlamuang taka* in awm a hmuh theihna tûr che uin theih tâwp chhuah rawh u. 15 Chu bâkah, kan Pathian dawhtheihna chu chhandamnaah ngai rawh u, kan unaupa duh tak Paula pawhin Pathianin finna a pêk ang zêla in hnêna a ziak ang khân, 16 ani chuan chûngte chu a lehkhathawn zawng zawngah khân a sawi a ni. Nimahsela, chûng zînga thu ṭhenkhat chu hriatthiam a har a, hriatna nei lo leh mi nghet lo, anmahni chhiatna tûra Pathian Lehkha Thu dang pawh la kawi ṭhînte chuan chûng thute chu an la kawi a ni.
17 Chutichuan, duh takte u, chûng thu chu in hriat lâwk avângin, dân nei lote thil sual tiha hruai bova in awm lohna tûr leh, in nghet ṭha lai in tlûk lohna tûrin invêng ṭha rawh u. 18 Amaherawhchu, kan Lalpa leh Chhandamtu Isua Krista khawngaihna nasa tak chu dawn belh zêl tum ula, amah hriatna neih belh zêl tum rawh u. Tûnah leh chatuan thlengin a hnênah ropuina awm rawh se. Amen.