Timothea Hnêna Lehkhathawn Pahnihna
1 Kei Paula, Krista Isua avânga lo awm nunna thutiam ang zêla Pathian duh zâwng anga Krista Isua tirhkoh hian, 2 ka fa duh tak Timothea hnênah:
Pa, Pathian leh kan Lalpa Krista Isua hnên aṭanga khawngaihna nasa tak te, zahngaihna te leh, thlamuannate* i hnênah awm rawh se.
3 Kan pi leh pute tih ṭhin angin, chhia leh ṭha hriatna thiang tak nêna a hnêna rawngbâwlna thianghlim ka hlan ṭhin Pathian chungah ka lâwm a, a chhûn a zâna ka ṭawngṭainaahte chuan ka hre reng ṭhîn che a ni. 4 I mittuite kha ka hre reng a, lâwmnaa ka khah theihna tûrin hmuh che ka châk hle. 5 Vervêkna tel lo i rinna kha ka hre reng si a, chu chu a tîrin i pi Loisii leh i nu Euniki teah chuan a awm a; tin, chu rinna chu i la nei reng tih ka ring nghet tlat bawk.
6 Chuvângin, i chunga kut ka nghah laia i dawn Pathian thilthlâwnpêk i hnêna awm kha, mei anga chhêm alh reng tûrin ka hriat nawntîr a che. 7 Pathian chuan hlauhna thlarau min pe lo va, thiltihtheihna leh hmangaihna leh rilru fîm tak neihna thlarau min pe zâwk si a. 8 Chuvângin, kan Lalpa chungchâng hriattîr zak lo la, amah avânga mi tâng kei pawh hi min zahpui hek suh; amaherawhchu, Pathian thiltihtheihna rinchhanin chanchin ṭha avânga hrehawm tawrh inpeih ang che. 9 Kan thil tihte vâng ni lovin, a thiltum leh khawngaihna nasa tak avânga min chhandamin, mi thianglim ni tûrin min ko va. Chu khawngaihna nasa tak chu hun rei tak a liam hmain Krista Isua hmangin min pe a; 10 tin, min Chhandamtu Krista Isua lo lanna hmangin tûnah hian chu chu chiang taka tih lan a ni ta. Ani chuan thihna nuai bovin, chanchin ṭha hmangin nunna leh taksa ṭawih thei lo neih theih dân kan hnênah a ti lang ta si a. 11 Chu chanchin ṭha puang chhuak tûr chuan thuhriltu leh tirhkoh leh zirtîrtua ruat ka ni.
12 Chuvâng chuan, hêng thilte pawh hi ka tuar a ni; nimahsela, ka zak lo ve. Tin, ka Rina chu ka hria a, a hnêna ka kawltîr pawh rorêlna nî thlengin a vênghim thei tih ka ring nghet tlat bawk a ni. 13 Ka hnên aṭanga i hriat thu ṭhate kha, Krista Isua nêna inpumkhatna aṭanga lo awm rinna leh hmangaihna nên vuan tlat la. 14 I hnêna kawltîr he thil hlu tak hi keimahnia chêng thlarau thianghlim hmangin vênghim ang che.
15 Asia* rama awm zawng zawng, Phugela leh Hermogena te chenin min hawisan ta tih i hria e. 16 Lalpa chuan Onesiphora leh a chhûngte chungah zahngaihna lantîr rawh se; ani chuan min ti harh fo va, ka khaidiat bun pawh min zahpui si lo. 17 Chutih ahnêkin, Rom khuaa a awm lai khân ngun takin min zawng chhuak ta zâwk a. 18 Rorêlna nîah chuan, Lalpa Jehova’n* a chungah zahngaihna lantîr rawh se. Ephesi khuaa a rawngbâwlna zawng zawng pawh kha chiang takin i hria e.