Johana Hnêna Thu Puan Chhuah

16 Tin, hmun thianghlim aṭanga lo chhuak awin vântirhkoh pasarihte hnênah: “Kal ula, thlêng kum pasarih chhûnga Pathian thinurna kha leiah leih baw rawh u,” tia a sawi ka hria a.

2 Vântirhkoh pakhatna chu a kal chhuak a, a thlêng kum chhûnga awm chu leiah a leih baw ta a. Tichuan, sakawlh chhinchhiahna neite leh a lim chibai bûktute chu pânchhia na takin a bâwm a.

3 Vântirhkoh pahnihna chuan a thlêng kum chhûnga awm chu tuifinriatah a leih bua a. Tichuan, tuifinriat chu mitthi thisen angin a lo chang a, a chhûnga nunna nei thil siam zawng zawng chu an thi ta vek a.

4 Vântirhkoh pathumna chuan a thlêng kum chhûnga awm chu luiahte leh tuikhurahte a leih bua a. Tichuan, tui chu thisenah a lo chang ta a. 5 Tin, tuite chunga thuneitu vântirhkohvin: “Nang, Pathian rinawm, awm Mêka leh awm Tawha, hetianga ro i rêl avâng hian i fel e, 6 mi thianghlimte leh zâwlneite thisen an leih bua a, chumi avâng chuan anni chu thisen i intîr a ni; chu chu an phû rêng si a,” tia a sawi ka hria a. 7 Maichâm aṭanga aw lo chhuakin: “Ni e, Engkimtithei Pathian Jehova,* i rorêlnate chu a dikin a fel a ni,” tia a sawi ka hre bawk a.

8 Vântirhkoh palina chuan a thlêng kum chhûnga awm chu nîah a leih bua a; tichuan, nî chu mite meia a kan phalsak a ni. 9 Tin, mei sa tak chuan mite chu a kâng a; nimahsela, sim ahnêkin Pathian hming an sawi chhe zâwk a, chûng hrite chunga thiltihtheihna neitu Pathian chu an chawimawi hek lo.

10 Vântirhkoh panganain a thlêng kum chhûnga awm chu sakawlh lalṭhutthlêngah chuan a leih bua a. Tichuan, a lalram chu a lo thim ta a, mite chuan nâ an tawrh avângin an leite an seh a; 11 nimahsela, an thil sual tihte chu sim ahnêkin, an nâte leh an pânte avâng chuan vân Pathian chu an sawichhe zâwk a ni.

12 Vântirhkoh paruknain a thlêng kum chhûnga awm chu Euphrates luipuiah a leih bua a; tichuan, ni chhuahna lam* aṭanga lo kal lalte kawng buatsaih tûrin a tui chu a lo kang chat ta a.

13 Tin, dargon kâ aṭang te, sakawlh kâ aṭang te leh, zâwlnei der kâ aṭangte chuan chungû ang tak thlarau bawlhhlawh* pathum lo chhuak ka hmu a. 14 Chûngte chu ramhuaite thusawi a ni a, thil makte* an ti a, Pathian Engkimtitheia indona ni ropui taka hruai khâwm tûrin, lei pum puia lalte hnênah an kal chhuak a.

15 “Ngai teh! Rûkru angin ka lo kal dâwn e. Harhvâng taka awm a, saruaka a kal loh nân leh mite’n a zahmawh an hmuh loh nâna a kawrfual ha chu a hlim e.”

16 Anni chuan lalte chu hmun pakhat, Hebrai ṭawnga Armageddon* an tihah chuan an hruai khâwm ta a.

17 Vântirhkoh pasarihnain a thlêng kum chhûnga awm chu boruakah a leih bua a. Chu veleh, hmun thianghlima lalṭhutthlêng aṭang chuan: “Leih buak zawh a ni ta!” tiin aw ring tak a lo chhuak ta nghâl a. 18 Tin, kâwlte lo phein, aw rite leh khawpui rite a lo chhuak a, lîr nasa takin a lo nghîng bawk a, leia mihring awm achinah chutianga râpthlâk leh nasa chuan a la nghîng ngai lo. 19 Khaw ropui tak chu hmun thumah a lo inṭhen a, khawvêl puma khawpuite pawh a lo chim a; Pathianin a thinurna nasa tak uain chu intîr tûrin Babulon Khaw Ropui chu a hre reng a ni. 20 Chu bâkah, thliarkâr tinrêngte chu a bo ta a, tlângte pawh hmuh tûr a awm ta lo. 21 Tichuan, rial lian tak, talent* khat vêla rit ṭheuh vân aṭangin mite chungah a tla a, rialin chhiatna a thlen chu a nasat êm avângin mite chuan Pathian an sawichhe ta a.