Timothea Hnêna Lehkhathawn Pakhatna
4 Nimahsela, thlarauva thâwk khum thu* chuan heti hian chiang takin a sawi: Nakin hunah chuan mi ṭhenkhatin rinna an kal bosan ang a, bumna thute* leh ramhuaite zirtîrna thute an ngaihven ang, 2 chu chu an chhia leh ṭha hriatna thîr linga deh châr tawh ang, dâwt sawi hmang mi vervêkte vâng a ni. 3 Anni chuan inneih an khap a, rinna neitute leh hriatna dik neitute’n lâwmthu sawi chunga an ei tûra Pathianin a siamte chu ei lo tûrin mite thu an pe bawk. 4 Pathian thil siam tinrêng hi a ṭha a ni, lâwmthu sawina nêna dawn a nih chuan eng mah hnâwl tûr a ni lo, 5 Pathian thu leh ṭawngṭainaa tih thianghlim a ni tawh si a.
6 He thurâwn hi unaute hnênah pe la; tichuan, rinna thu leh ṭha taka i zawm ṭhin zirtîrna ṭhaa châwm Krista Isua rawngbâwltu ṭha i ni ang. 7 Amaherawhchu, pitarte thusawi, Pathian zah lohna thawnthu mai maite chu hnâwl la; chutih rualin, Pathian ngaihsak chu thiltuma neiin insawizawi ang che. 8 Taksa sawizawi hian hlâwkna chu a nei ve na a, Pathian ngaihsakna erawh hi chuan tûna nunna leh nunna lo la awm tûr atâna thutiam a neih avângin kawng engkimah a hlâwk a ni. 9 He thu hi a rinawmin, pawm vek tlâk a ni. 10 Mi chi tinrêng chhandamtu, a bîk takin mi rinawmte chhandamtu Pathian nung chungah kan beiseina kan nghah tawh avângin, nasa taka thawkin kan bei hrâm hrâm a ni.
11 Hêng thupêkte hi pein zirtîr zêl rawh. 12 Tu mah i naupanna ngaihnêptîr ngai suh. Chu aiin, thusawiah te, nungchangah te, rinnaah te, thianghlimnaahte mi rinawmte tân entawn tûr ni zâwk ang che. 13 Ka lo kal hma loh zawng, vântlâng hmaa lehkha chhiar kawngah te, thil ṭha ti tûra mi dang fuih kawngah te leh, zirtîr kawngahte inhmang zawm zêl rawh. 14 I chungchâng hrilh lâwkna nêna inmila upate’n i chunga kut an nghah laia i dawn thilthlâwnpêk kha ngaihthah suh. 15 Mi zawng zawngin i hmasâwnna chiang taka an hmuh theihna tûrin chûng thilte chu chhût ngun la, chûngah chuan inhmang zo rawh. 16 Nangmah leh i zirtîrnaah chuan fîmkhur reng la, chûng thilte ti hlawhtling tûr chuan theih tâwp chhuah zawm zêl rawh. Chutianga i tih chuan, nangmah leh i thu ngaithlatute i chhandam ang.