Petera Lehkhathawn Pakhatna
5 Chutichuan, Krista tawrhnate hriatpuitu leh a ropuina tih lana la awm tûr ṭâwmpuitu, kei upa ve bawk hian in zînga kohhran upate hnênah heti hian ka ngên* a ni: 2 In hnuaia awm Pathian berâmte chu vêngin, ṭha takin enkawl rawh u, tih tûr a nih vâng ni lovin, Pathian hmaa inhuam tak zâwkin; hlêpna bawlhhlawh duh vâng ni lovin, châk tak zâwkin; 3 Pathian rochante chunga inti lal lovin, berâmte tâna entawn tûr ni zâwk rawh u. 4 Tichuan, berâm vêngtu lalber a lo lan hunah ropuina lallukhum chuai thei lo in dawng ang.
5 Chutiang bawkin, nangni la tlangvâl deuhte u, upate lakah intulût rawh u. Amaherawhchu, inngaitlâwm takin indâwr tawn ṭheuh rawh u,* Pathianin mi chapote a dodâl a, mi inngaitlâwmte erawh chu khawngaihna nasa tak a pe ṭhîn si a.
6 Chuvângin, a hun taka a chawimawi theihna tûr che uin, Pathian kut chak tak hnuaiah chuan inngaitlâwm takin awm ula, 7 anin a ngaihsak che u avângin, in lungkhamna* zawng zawng a chungah nghat vek rawh u. 8 Ngaihven reng ula, inring rengin awm rawh u! In hmêlma Diabola chu sakeibaknei rûm chunga a vâk angin, a ei theih tûr zawngin a vâk ruai ṭhîn. 9 Nimahsela, khawvêl puma in unau zawng zawngte pawhin, in hrehawm tawrh ang an tuar ve tih hriain Diabola chu dodâl ula, rinnaah nghet takin awm rawh u. 10 Rei lo tê hrehawm in tawrh hnuah, Krista nêna inpumkhat tûr leh chatuan ropuina chang tûra kotu che u Pathian, kawng tinrênga khawngaihna nasa tak petu ngei chuan a kimin a zirtîr ang che u. Ani chuan a ti nghetin a ti chak ang che u a, tih nghîn rual lohvin a siam ang che u. 11 Thiltihtheihna chu chatuanin a ta a ni si a. Amen.
12 Unaupa rinawm tak a ni tih ka hriat Silvana* ṭanpuinain nangmahni fuih tûr leh Pathianin in chunga a lantîr khawngaihna nasa tak hi a dikzia hriattîr tûr che uin, in hnênah thu tawi tê ka rawn ziak a nih hi. Chu khawngaihna nasa tak chu dawn zawm zêl tum tlat ang che u. 13 Babulon khuaa awm, nangmahni ang bawka thlan hmeichhia* hian chibai a bûk a che u; ka fapa Marka pawhin chibai a bûk a che u. 14 Hmangaihnaa infâwpin chibai inbûk tawn ṭheuh rawh u.
Nangni Krista nêna inpumkhata awm zawng zawngte hnênah thlamuanna* awm rawh se.