Johana Hnêna Thu Puan Chhuah

2 “Ephesi kohhrana vântirhkoh hnênah chuan heti hian ziak rawh: A kut ding lama arsi pasarih keng a, rangkachak khâwnvâr dahna pasarih zînga kala khân hêng thute hi a sawi a ni: 2 ‘I thil tih te, i thawhrimna te, i chhelna te leh, mi sual i ngaih theih lohziate ka hria, tirhkoh ni si lo tirhkohva inchhâlte chu i fiah a, dawthei an nihzia i hai lang tih pawh ka hria. 3 Chhelna i lantîr bawk a, ka hming avânga thil tam tak i tuar chung pawhin i chau si lo. 4 Amaherawhchu, a tîra i neih hmangaihna kha i hloh tâk avângin ka dem che a ni.

5 “‘Chuvângin, i tlûksan tâk kha hre reng la, sim la, a tîra i thil tihte kha ti leh rawh. I sim loh chuan i hnênah ka lo kal ang a, i khâwnvâr dahna kha a awmna hmun aṭangin ka la sawn ang. 6 Nimahsela, ṭhatna eng emaw i la nei: Nikola pâwl thil tihte i huat hi, chu chu kei pawhin ka haw ve a ni. 7 Thlarauvin kohhrante hnêna thu a sawi hi beng nei chuan hre rawh se: Khawvêl hnehtu chu Pathian paradis-a nunna thing rah a ei ka phalsak ang,’ tiin.

8 “Smurna kohhrana vântirhkoh hnênah chuan heti hian ziak rawh: ‘Hmasabera leh Hnuhnûngbera,’ thia lo nung leh taa khân hêng thute hi a sawi a ni: 9 ‘I hrehawmzia leh i retheihzia ka hria—nimahsela, i hausa si a—Juda mi anga inchhâlte leh nangmah sawichhetute pawh ka hria, anni chu Juda mi an ni lo va, Setana pâwla* mi an ni zâwk. 10 I tawrh mai tawh tûr thilte chu hlau suh. Ngai teh! Kawng tinrênga fiah in nih theihna tûrin Diabola chuan in zînga ṭhenkhat hi tân inah a khung zêl ang che u a, ni sâwm chhûng hrehawm in tuar ang. Thih thlengin rinawm rawh; tichuan, nunna lallukhum ka pe ang che. 11 Thlarauvin kohhrante hnêna thu a sawi hi beng nei chuan hre rawh se: Khawvêl hnehtu chu thih hnihna chuan engti kawng mahin a ti na thei lo vang,’ tiin.

12 “Pergamos kohhrana vântirhkoh hnênah chuan heti hian ziak rawh: Ngûnhnâm hriam tawn, hriam tak leh sei tak neia khân hêng thute hi a sawi a ni: 13 ‘I awmna ka hria, chu chu Setana lalṭhutthlêng awmna a ni; amaherawhchu, ka lakah i rinawm reng a,* Setana awmna, i chênna khawpuia ka thuhretu rinawm Antipa an tih hlum lai pawh khân min rinna i phatsan si lo va.

14 “‘Nimahsela, demna che tlêm azâwng ka nei, Israel fate’n milem hnêna thil hlan an ei theih nân leh nungchang bawlhhlawhnaa* an inhman theih nâna an hmaa tlûkna dah tûra Balaka zirtîrtu Balaama zirtîrna pawmtute i hnênah an awm si a. 15 Chutiang bawkin, Nikola pâwl zirtîrna pawmtute i hnênah an awm bawk a ni. 16 Chuvângin, sim rawh. I sim loh chuan ka lo kal thuai ang a, ka kâ aṭanga chhuak ngûnhnâm sei takin anni chu ka do vang.

17 “‘Thlarauvin kohhrante hnêna thu a sawi hi beng nei chuan hre rawh se: Khawvêl hnehtu chu manna thuhrûk ṭhenkhat ka pe ang a, lung vâr ka pe bawk ang. Chu lung vârah chuan a dawngtu tih chauh lo chuan mi dang tu mahin an hriat loh hming thar a inziak a ni,’ tiin.

18 “Thuatira kohhran vântirhkoh hnênah chuan heti hian ziak rawh: Pathian Fapa, a mitte mei alh ang leh a kête dâr ṭha chî anga khân hêng thute hi a sawi a ni: 19 ‘I thil tih te, i hmangaihna te, i rinna te, i rawngbâwlna te, i chhelnate ka hria, tûna i thil tihte hi a tîra i thil tihte aiin a tam zâwk tih ka hre bawk.

20 “‘Nimahsela, demna che ka nei, kha hmeichhia, zâwlnei nu anga inchhâl Jezebeli kha i pawmzam avângin, ani chuan nungchang bawlhhlawhnaa* inhmang tûr leh milem hnêna thil hlante ei tûrin ka bâwihte chu zirtîrin a hruai sual a ni. 21 Tin, ani chu sim tûrin hun ka pe a; nimahsela, a nungchang bawlhhlawh* chu a sim duh lo. 22 Ngai teh! Ani chu natna khumah ka paih dâwn a ni, a hnêna uirê ṭhînte chu a thil tih ang an tihte an sim loh chuan hrehawm nasa takah ka paih lût ang. 23 A fate chu thihna hriin ka ti hlum ang, kei hi ngaihtuahna chhûngril ber* leh thinlung enfiahtu ka ni tih kohhran zawng zawngin an hriat theihna tûrin; tin, in thil tihte ang zêlin ka rûl ṭheuh vang che u.

24 “‘Amaherawhchu, Thuatira khuaa awm mi dang, Jezebeli zirtîrna zâwm lo va, “Setana hnên aṭanga lo kal zirtîrna dik lo”* hre lotute hnênah chuan hei hi ka sawi a ni: In chungah phurrit dang ka nghat lo. 25 In tih reng ṭhin angin, ka lo kal hma loh chuan in thil neih kha vawng tlat rawh u. 26 Khawvêl hnehtu leh a tâwp thlenga ka thil tihte ang titu hnênah chuan hnamte chunga thuneihna ka pe ang, 27 ka Pa hnên aṭanga thuneihna ka dawng ang chiahin. Tin, thuneihna ka pêka chuan thîr tiangin mite ro a rêlsak ang a, anni chu hlum bêl angin an keh sawm ang. 28 Tin, a hnênah vârparh arsi ka pe ang. 29 Thlarauvin kohhrante hnêna thu a sawi hi beng nei chuan hre rawh se,’ tiin.