Philippi Khuaa Mite Hnêna Lehkhathawn
1 Paula leh Timothea, Krista Isua bâwihte hian Krista nêna inpumkhat Philippi khuaa mi thianghlim awm zawng zawng leh, upate* leh kohhranho rawngbâwltute hnênah he lehkhathawn hi kan ziak a ni:
2 Pathian kan Pa leh Lalpa Isua Krista khawngaihna nasa tak leh thlamuanna* in hnênah awm rawh se.
3 In tâna ka ṭawngṭai apiangin ka Pathian hnênah lâwmthu ka sawi ṭhîn a. 4 In vaia tân lâwm takin ka ngensak reng ṭhîn che u a ni. 5 Chu chu chanchin ṭha in pawm nî hmasa ber aṭanga tûn thlenga a puan chhuahnaa in tel ve vâng a ni. 6 Pathianin nangmahnia hna ṭha a ṭan tawh chu Krista Isua nîah a thawk zo vang tih ka ring nghet tlat a ni. 7 Ka thinlunga in awm avâng leh Pathian khawngaihna nasa tak min ṭâwmpuitute in nih avângin, hetianga in vaia ka ngaihtuah che u hi a âwm a ni. Tin, khaidiat ka bun lai te, chanchin ṭha ka humhim lai te leh, dân ang taka ka tih ngheh laite khân min ṭanpui si a.
8 Krista Isua’n a ngainat che u angin ka ngaina che u a; chuvângin, in vaia ka ngaihzia che u chu Pathianin min hriatpui a ni. 9 In hmangaihna chu hriatna dik leh hriatthiamna famkim nêna a pun zual zêl theihna tûrin ka ṭawngṭai reng ṭhîn, 10 thil pawimawh zâwkte in fiah theihna tûrin; tichuan, Krista nî thlengin sawisêl bo leh mi dangte ti tlu lovin in awm thei ang a, 11 Pathian ropuina tûr leh fakna tûrin, Isua Krista ṭanpuinain felna rahin in lo khat thei bawk ang.
12 Tin, unaute u, ka dinhmun chu chanchin ṭha theh darhna tûr a lo ni ta hlauh zâwk tih in hriat ka duh a ni. 13 Tichuan, Krista avânga khaidiat ka bunte hi Lal Vêngtu* zawng zawngte leh mi dang zawng zawngte zîngah hriat a lo ni ta a. 14 Tin, Lalpaa unau tam zâwkte chuan khaidiat ka bunte avâng hian inrintâwkna an nei a, hlau lova Pathian thu sawi tûrin huaisenna nasa lehzual an lantîr a ni.
15 Ni e, mi ṭhenkhat chuan îtsîkna leh elrelna rilru neiin Krista chanchin an hril ṭhîn a, mi dangte erawh chuan rilru put hmang ṭha tak neiin an hril thung. 16 Rilru put hmang ṭha neia hriltute chuan, chanchin ṭha humhim tûra ruat ka ni tih an hriat avângin, Krista chanchin chu hmangaihna avângin an puang a ni. 17 Nimahsela, îtsîkna leh elrelna avânga puangtute chuan, rilru put hmang thianghlim tak an nei lo va, khaidiat ka bun lai hian buaina min siamsak* an tum a ni. 18 Chu chuan eng nge a rah chhuah? A derin emaw, a takin emaw Krista chanchin chu kawng tinrênga puan chhuah a nih phah zâwk a, chu chuan min ti lâwm a ni. Ka lâwm zêl bawk ang. 19 Isua Krista thlarau ṭanpuina leh in ṭawngṭaina avângin chhandam ka ni ang tih ka hre si a. 20 Eng kawngah mah tih mualphovin ka awm lo vang tih ringin, ka beisei tlat a; nimahsela, tûn hmaa ka tih ṭhin ang khân dam emaw, thi emaw pawh ni ila, hlau lova thu sawiin Krista chu ka chawimawi zêl ang.
21 Ka nun chuan Krista tâna nung ka ni a, ka thih pawhin chu chu ka tân hlâwkna a ni. 22 Tisaa ka nung zawm zêl dâwn a nih chuan, ka hnathawh aṭangin rah tam lehzual ka chhuah thei ang; nimahsela, eng nge thlan zâwk tûr ka hre lo. 23 He thil pahnihah hian thlan tûr zâwk hre lovin ka awm, Krista hnêna awm tûra kal ka duh si a, chu chu a ṭha zâwk hle a ni. 24 Nimahsela, nangmahni avângin tisaa la awm reng hi ka tân a ṭûl zâwk si a. 25 Chu chu ring nghet tlatin hma in sâwnna tûr leh rinnaa lâwmna in neihna tûrin, in vaia hnênah ka awm zawm zêl ang tih ka hria. 26 Chutichuan, in hnêna ka awm leh hunah keimah avângin Krista Isuaa in lâwmna a khat liam thei ang.
27 Krista chanchin ṭha nêna inmil chauhvin nung rawh u; chutichuan, nangmahni hmu tûrin ka lo kal emaw, kal lo emaw, thlarau hmun khata ding nghetin, chanchin ṭha rinna thu chu inpumkhat takin in ṭan tih ka hre thei ang. 28 Tichuan, eng kawngah mah nangmahni dotute tih hlauhvin in awm lo vang. Chu thil ngei chu an tân tih boral an ni dâwn tih finfiahna a ni ang a, in tân erawh chuan chhandam in ni dâwn tih finfiahna a ni ang; chu finfiahna chu Pathian laka mi a ni. 29 Krista ring tûr chauh ni lovin, a tâna hrehawm tuar tûr pawha chanvo hlu pêk in ni si a. 30 Beihna ka tawh in hmuh ang chiah kha nangni pawhin in tâwk mêk a, chu chu tûn thleng hian ka la tâwk reng tih in hria e.