Johana Hnêna Thu Puan Chhuah

14 Tin, ngai teh! Berâm No Zion Tlânga ding ka hmu a, a bulah chuan an chala a hming leh a Pa hming inziak mi 1,44,000 ka hmu bawk a. 2 Vân aṭangin tui luang ri hum hum ri ang leh khawpui ri ring tak ang ri lo chhuak ka hria a; ka ri hriat chu an ṭingṭangte perh chunga hla satute zai ri ang a ni. 3 Lalṭhutthlêng leh thil nung palite leh upate hmaah chuan hla thar ni âwm tak hi an sa a, chu hla chu lei aṭanga Pathianin a lei tawh mi 1,44,000-te chauh lo chuan tu man an zir thei lo. 4 Chûng mite chu hmeichhe laka inti bawlhhlawh lote an ni a; a nihna takah chuan, nula thianghlim ang an ni. Berâm No kalna apianga zuitute an ni bawk. Pathianin ama tân leh Berâm No tâna rah hmasa ber ni tûra mihring zîng aṭanga a leite an ni a, 5 bumna thu an sawi ngai lo va, sawisêl kai lo an ni.

6 Tin, vântirhkoh dang vânlaizâwla thlâwk ka hmu a, leia awm hnam tinrêng te, chi tinrêng te, ṭawng tinrêng te leh, mi tinrêngte hnêna puan chhuah tûr chatuan daih chanchin ṭha a nei a. 7 Ani chuan aw ring takin: “Pathian chu hlau ula, chawimawi rawh u, a rorêl hun chu a lo thleng ta si a; chuvângin, vân te, lei te, tuifinriat te leh, tui hnate Siamtu chu chibai bûk rawh u,” a ti a.

8 Tin, vântirhkoh dang a pahnihnain a rawn zui a: “Ani chu a tluchhe ta! Babulon Khaw Ropui, nungchang bawlhhlawhnaa* inhman châkna nasa tak thlentu a uain, hnam zawng zawngte intîrtu chu a tluchhe ta!” tiin a sawi a.

9 Vântirhkoh dang a pathumnain anni chu a rawn zui a, aw ring takin: “Tu pawhin sakawlh leh a lim chibai bûk a, an kutah emaw, an chalah emaw chhinchhiahna an nei a nih chuan, 10 Pathian thinurna uain, a thinurna nova pawlh dal lohva thlit chhuah chu an in bawk ang a, vântirhkoh thianghlimte mit hmuhah leh Berâm No mit hmuhah mei leh kâta nghaisak an ni ang. 11 Chûng mite nghaisakna* khû chu chatuanin a chho vang a, sakawlh leh a lim chibai bûk a, a hming chhinchhiahna nei apiangte chu a chhûn a zâna nghaisak an ni ang. 12 Chuvângin, Pathian thupêkte zâwm a, Isua ring tlattu mi thianghlimte tân chuan chhelna neih a ngai a ni,” a ti a.

13 Tin, vân aṭanga aw lo chhuakin, “Heti hian ziak rawh: Tûn aṭang chuan, Lalpa nêna inpumkhata awm reng chunga thite chu an hlim e. Ni e, thlarau chuan an thawhrimnate aṭanga châwl tûrin a ti a ni; thil ṭha an lo tih tawh zawng zawngte chu Pathianin a hre reng si a,” tia a sawi ka hria a.

14 Tichuan, ngai teh! Chhûm vâr ka hmu a, chhûm chungah chuan mihring fapa ang tak, rangkachak lallukhum khum leh favah hriam tak keng a ṭhu a.

15 Biak in hmun thianghlim aṭang chuan vântirhkoh dang a lo chhuak a, chhûm chunga ṭhu hnênah chuan aw ring takin: “Ah a hun tâk avângin i favah kha lek chhuak la ât rawh, leia buh leh bâlte khu seng a hun tawh si a,” a ti a. 16 Tin, chhûm chunga ṭhu chuan a favah chu a han lek a, leia buh leh bâlte chu seng a ni ta a.

17 Vâna biak in hmun thianghlim aṭang chuan vântirhkoh dang a lo chhuak leh a, ani pawhin favah hriam tak a keng a.

18 Tin, maichâm aṭangin vântirhkoh dang a lo chhuak leh a, ani chuan mei chunga thuneihna a nei a. Favah hriam tak kengtu hnênah chuan aw ring takin: “I favah hriam tak kha lek chhuak la, leia grêp hrui rah bâwrte khu seng khâwm rawh, a rahte khu a hmin tawh si a,” a ti a. 19 Vântirhkoh chuan a favah chu lei chungah chuan a han lek a, leia grêp hruia a rahte chu seng khâwmin, Pathian thinurna grêp sâwrna khur lian takah chuan a theh lût a. 20 Khawpui pâwnah grêp rahte chu a sâwrna khurah chuan an rap sâwr a, grêp sâwrna khurah chuan thisen, sakawr thîr barh thlenga thûk leh kilometer 300* vêl thlenga thui a lo luang chhuak a.