Johana Hnêna Thu Puan Chhuah
7 Chumi hnuah chuan, leiah te, tuifinriatah te leh, thing rêng rêngahte eng thlî mah a thleh theih lohna tûrin, lei thli pali nghet taka chelhtu lei kil lia ding vântirhkoh pali ka hmu a. 2 Tin, Pathian nung chhinchhiahna keng vântirhkoh dang ni chhuahna lam* aṭanga chho ka hmu a, ani chuan lei leh tuifinriat ti chhe tûra thuneihna pêk vântirhkoh palite hnênah chuan aw ring takin, 3 “Kan Pathian bâwihte chu an chala kan chhinchhiah zawh hma loh chuan lei te, tuifinriat te leh, thingte chu ti chhe suh u,” tiin a hrilh a.
4 An chhinchhiah zât chu ka lo hria a, Israela thlah hnam tin aṭangin 1,44,000 chhinchhiah an ni:
5 Juda hnam aṭangin 12,000 chhinchhiah an ni tawh a;
Reubena hnam aṭangin 12,000;
Gada hnam aṭangin 12,000;
6 Asera hnam aṭangin 12,000;
Naphtalia hnam aṭangin 12,000;
Manasea hnam aṭangin 12,000;
7 Simeona hnam aṭangin 12,000;
Levia hnam aṭangin 12,000;
Isakara hnam aṭangin 12,000;
8 Zebuluna hnam aṭangin 12,000;
Josefa hnam aṭangin 12,000;
Benjamina hnam aṭangin 12,000 chhinchhiah an ni tawh.
9 Chumi hnuah chuan, ngai teh! Mipui tam tak, tu ma chhiar sên loh kawrfual vâr ha hnam tin zînga mi te, chi tin zînga mi te, mi tin zînga mi te leh, ṭawng tin zînga mite lalṭhutthlêng hmaah leh Berâm No hmaa ding ka hmu a, anni chuan tûmkau an keng ṭheuh va. 10 Anni chuan aw ring takin: “Lalṭhutthlênga ṭhu kan Pathian leh Berâm No chuan min chhandam ta,” tiin hlim takin an au va.
11 Vântirhkoh zawng zawng chu lalṭhutthlêng leh upate leh thil nung palite vêlah chuan an ding a, lalṭhutthlêng hmaah chuan bawkkhupa Pathian chibai bûkin, 12 “Amen! Fakna te, ropuina te, finna te, lâwmthu sawina te, chawimawina te, thiltihtheihna te leh, chaknate chu kan Pathian hnênah chatuanin awm rawh se. Amen,” an ti a.
13 Tin, upate zînga pakhat chuan: “Hêng kawrfual vâr hate hi tute nge an nih a, khawi aṭanga lo kal nge an nih?” tiin min zâwt a. 14 Chu veleh, kei chuan a hnênah: “Ka lalpa, nangman i hria a lâwm,” ka ti a. Ani chuan ka hnênah: “Hêng mite hi hrehawm nasa tak paltlangtute an ni a, an kawrfualte chu Berâm No thisena suin an ti vâr tawh a ni. 15 Chuvângin, Pathian lalṭhutthlêng hmaah awmin, a biak inah a chhûn a zânin rawngbâwlna thianghlim an hlân a; tin, lalṭhutthlênga Ṭhua chuan an chungah a puan in a zâr ang. 16 An ril a ṭâm leh tawh lo vang a, an tui a hâl leh tawh hek lo vang, ni sain a ti hrehawm tawh lo vang a, lum rêng rêng pawhin a ti hrehawm tawh hek lo vang, 17 a lai taka awm lalṭhutthlêng bula ding Beram No khân anni chu vêngin, nunna tuikhurahte a hruai dâwn si a. Tin, Pathianin an mit ata mittui zawng zawng a hru hul bawk ang,” a ti a.