Johana Hnêna Thu Puan Chhuah
22 Vântirhkoh chuan nunna lui tui fîm tak* mi entîr a, chu chu Pathian leh Berâm No lalṭhutthlêng aṭanga luang chhuakin, 2 kawtthlêr lai takah chuan a luang thla a. Chu lui kam tuakah chuan kum khata vawi 12 rah ṭhîn nunna thingte a awm a, chumi awmzia chu thla tin vawi khat a rah ṭhîn tihna a ni. A hnahte chu hnamte tih damna tûr a ni.
3 Anchhia rêng rêng a awm tawh lo vang. Nimahsela, chu khuaah chuan Pathian leh Berâm No lalṭhutthlêng a awm ang a, Pathian bâwihte chuan a hnênah rawngbâwlna thianghlim an hlân ang; 4 a hmêl an hmu ang a, an chalah a hming a chuang bawk ang. 5 Tin, zân a awm tawh lo vang a, khâwnvâr êng leh ni êng an mamawh tawh lo vang, Pathian Jehova’n* anni chu a ên dâwn si a; tichuan, chatuanin lal niin ro an rêl ang.
6 Tin, vântirhkoh chuan ka hnênah: “Hêng thute hi a rinawmin* a dik a, thu sawi tûra zâwlneite thlarauva thâwk khumtu Pathian Jehova* chuan thil lo thleng thuai tûrte a bâwihte hnêna entîr tûrin a vântirhkoh a rawn tîr a ni. 7 Ngai teh! Ka lo kal thuai dâwn e. Tu pawh he lehkha ziala hrilh lâwkna thute zâwm apiang chu an hlim e,” a ti a.
8 Kei Johana hi chûng thilte hriaa hmutu chu ka ni. Ka hriata ka han hmuh chuan, chûng thilte min hmuhtu vântirhkoh chu chibai bûk tûrin a ke bulah ka bawkkhup a. 9 Nimahsela, ani chuan: “Eng thil nge i tih tâk? Hetiang hian ti suh! Kei chu nangmah leh i unau zâwlneite leh he lehkha ziala thu zâwmtute bâwihpui mai ka ni. Pathian chauh chibai i bûk tûr a ni,” tiin min hrilh a.
10 Ani chuan: “He lehkha ziala hrilh lâwkna thute hi châr suh, hun ruat chu a hnai tawh si a. 11 Mi fel lo chu fel lo takin awm zawm zêl sela, mi bawlhhlawh chuan thil bawlhhlawhte ti zawm zêl rawh se; nimahsela, mi fel chu fel takin awm zawm zêl sela, mi thianghlim chu thianghlim takin awm zawm zêl rawh se.
12 “‘Ngai teh! Ka lo kal thuai dâwn e, mi tin an thil tih ang zêla ka pêk tûr lâwmman chu ka hnênah a awm. 13 Kei hi Alpha leh Omega,* a hmasa ber leh hnuhnûng ber, a bul leh a tâwp chu ka ni. 14 Nunna thing rah an ei theihna tûr leh khawpui kawngkhârtea an luh theihna tûra an kawrfual su faite chu an hlim e. 15 Chu khaw pâwnah chuan ui te, ramhuaizâwl te, nungchang bawlhhlawhnaa* inhmang te, tualthattu te, milem betu te leh, dâwt sawi nuam ti leh dâwt sawi chîng zawng zawngte an awm a ni.’
16 “‘Kei Isua hian kohhrante tâna hêng thilte i hnêna hriattîr tûr hian ka vântirhkoh ka rawn tîr a ni. Kei hi Davida zung leh a thlah, vârparh arsi êng tak chu ka ni,’” tiin min hrilh bawk a.
17 Tin, thlarau leh mo chuan, “Lo kal rawh u!” tiin an sâwm reng a. Chu sâwmna hria apiang chuan, “Lo kal rawh u!” ti rawh se. Tu pawh tuihâl apiang lo kal rawh se; tu pawh a duh apiangin nunna tui hi a thlâwnin in rawh se.
18 “He lehkha ziala hrilh lâwkna thu hria apiangte chu hei hi ka hriattîr e: Tu pawhin hêng thute hi a belhchhah chuan, he lehkha ziala inziak hremnate hi Pathianin a chungah a belhchhah ve ang; 19 chutiang bawkin, tu pawhin he lehkha ziala hrilh lâwkna thute hi a lâk bo chuan, Pathianin he lehkha ziala inziak nunna thing rah a ei a phal lo vang a, khaw thianghlima a luh pawh a phal hek lo vang.
20 “Hêng thute hriattîrtu hian, ‘Ni e, ka lo kal thuai dâwn e’ a ti a.” Kei chuan:
“Amen! Lo kal ta che, Lalpa Isu,” ka ti a.
21 Lalpa Isua khawngaihna nasa tak chu mi thianghlimte hnênah awm rawh se.